କଟକ,୫।୨(କୁମାରଶ୍ରୀ): ମୁହଁରେ ବନ୍ଧା ଯାଇଥିବା ମାସ୍କ ଜୀବନ ରକ୍ଷା କରିପାରିବ। ସମ୍ପୃକ୍ତ ବ୍ୟକ୍ତିଙ୍କ ହୃଦ୍ଘାତ ହେବା ପୂର୍ବରୁ ବାଜିବ ଆଲାର୍ମ। ଶାରୀରିକ ଅସୁସ୍ଥତାକୁ ସୂଚାଇ ମାସ୍କ ଜରିଆରେ ଡାକ୍ତର, ନିକଟସ୍ଥ ହସ୍ପିଟାଲ, ଜରୁରିକାଳୀନ ଯୋଗାଯୋଗ ନମ୍ବର, ଏପରିକି ୧୦୮କୁ ସିଧାସଳଖ ଫୋନ୍ କଲ୍ ଯିବ। ଏଭଳି ଏକ ମାସ୍କ ତିଆରି କରି ଚର୍ଚ୍ଚାକୁ ଆସିଛନ୍ତି ରେଭେନ୍ଶା ବିଶ୍ୱବିଦ୍ୟାଳୟ ଆଇଟିଏମ୍ ବିଭାଗ ଶେଷବର୍ଷର ଛାତ୍ରୀ ଦେବଶ୍ରିତା ଦାସ। ଯାହାର ନଁା ଦେଇଛନ୍ତି, ଏଆଇ ପାୱାର ପୋର୍ଟେବୁଲ ସ୍ମାର୍ଟ ଅକ୍ସିଜେନ ମାସ୍କ ତଥା ‘ହାର୍ଟଗାର୍ଡ’। ତାଙ୍କର ଏଭଳି ଉଦ୍ଭାବନକୁ ନେଇ ଡାକ୍ତରୀ ମହଲରେ ମଧ୍ୟ ଆଲୋଚନା ଜୋର୍ ଧରିଛି।
ଛକ ନିବାସୀ ଦୀପକ ଦାସ ଏବଂ ଅର୍ପିତା ଦାସଙ୍କ ଝିଅ ଦେବଶ୍ରିତା। ତାଙ୍କ କହିବା ଅନୁସାରେ, ହୃଦ୍ଘାତରେ ଜେଜେବାପାଙ୍କୁ ହରାଇବା ପରେ ‘ହାର୍ଟଗାର୍ଡ’ ତିଆରି କରିବା ନେଇ ଚିନ୍ତା କରିଥିଲେ। ଏକ ବିବାହ ଭୋଜି କାର୍ଯ୍ୟକ୍ରମକୁ ଜେଜେବାପାଙ୍କ ସହ କେନ୍ଦୁଝର ଯାଇଥିବା ବେଳେ ସେଠାରେ ଅଭାବନୀୟ ଘଟଣା ଘଟିଯାଇଥିଲା। ଜେଜେବାପାଙ୍କ ମୃତ୍ୟୁ ତାଙ୍କୁ ବିଚଳିତ କରିଥିଲା। ଗତ ଦୁଇବର୍ଷ ହେବ ସେ ହାର୍ଟଗାର୍ଡ ତିଆରିରେ ଲାଗିଛନ୍ତି। ସେ ଏକ ସଫ୍ଟୱେୟାର ପ୍ରସ୍ତୁତ କରିଛନ୍ତି। ଆଲଗୋରିଦିମ ବ୍ୟବହାର ଦ୍ୱାରା ଏହି ସଫ୍ଟୱେୟାର ଶାରୀରିକ ଅସୁସ୍ଥତାକୁ ଦର୍ଶାଇ ପାରୁଛି। ମାସ୍କ ପିନ୍ଧିଥିବା ବ୍ୟକ୍ତି ଅସହଜ ଅନୁଭବ କଲେ କିମ୍ବା ହୃଦ୍ରୋଗ ଜନିତ କୌଣସି ସମସ୍ୟାର ସମ୍ମୁଖୀନ ହେଲେ ମାସ୍କରେ ଖଞ୍ଜା ଯାଇଥିବା ଆଲାର୍ମ ତୁରନ୍ତ ବାଜି ଉଠୁଛି। ଏଥିରେ ଜିପିଏସ୍ ଲୋକେଶନ ମଧ୍ୟ ମହଜୁଦ ରହିଛି। ଯଦ୍ଦ୍ବାରା ସମ୍ପୃକ୍ତ ବ୍ୟକ୍ତିଙ୍କ ଠିକଣା ତ୍ୱରିତ ଜଣାପଡ଼ିପାରୁଛି। କେବଳ ସେତିକି ନୁହେଁ, ମାସ୍କ ଜରିଆରେ ଅକ୍ସିଜେନ ଥେରାପୀ ମଧ୍ୟ ଦିଆଯାଇପାରୁଛି। ହାର୍ଟଗାର୍ଡ ମାସ୍କ ଉପରେ ଆହୁରି କାମ ବାକି ଅଛି। ଆଗାମୀ ଦିନରେ ସଫ୍ଟୱେୟାର ଡେଭଲପ୍ କରାଯିବା ସହିତ ମାସ୍କ ଜରିଆରେ ଇସିଜି ଏବଂ ରକ୍ତଚାପ ପରୀକ୍ଷା ମଧ୍ୟ କରାଯାଇ ପାରିବ ବୋଲି ଦେବଶ୍ରିତା କହିଛନ୍ତି।
କି, ରାଜ୍ୟ ସରକାରଙ୍କ ଦ୍ୱାରା ଆୟୋଜିତ ଷ୍ଟାର୍ଟଅପ ଇନୋଭେଟିଭ୍ ପ୍ରତିଯୋଗିତାରେ ଦେବଶ୍ରିତାଙ୍କ ପ୍ରକଳ୍ପ ଶ୍ରେଷ୍ଠ ବିବେଚିତ ହୋଇଥିଲା, ଯେଉଁଥିପାଇଁ ତାଙ୍କୁ ୧ ଲକ୍ଷ ଟଙ୍କାର ଆର୍ଥିକ ପୁରସ୍କାର ମିଳିଥିଲା। ଏହି ପୁରସ୍କାର ରାଶି ବ୍ୟବହାର କରି ସେ ହାର୍ଟଗାର୍ଡ ମାସ୍କ ତିଆରି ଉପରେ ମନୋନିବେଶ କରିଥିଲେ। ମାସ୍କପୂର୍ଣ୍ଣ ରୂପରେ ପ୍ରସ୍ତୁତ ହେବାକୁ ଆଉ ୪ରୁ ୫ବର୍ଷ ସମୟ ଲାଗିବ ବୋଲି ସେ କହିଛନ୍ତି, ଯାହାର ବଜାର ମୂଲ୍ୟ ୨୫ହଜାର ଟଙ୍କା ରହିବ। ମାତ୍ର ସରକାରୀସ୍ତରରେ ସହାୟତା ମିଳିଲେ ହାର୍ଟଗାର୍ଡ ମାସ୍କ ଅଳ୍ପ ସମୟ ବ୍ୟବଧାନରେ ପ୍ରସ୍ତୁତ ହୋଇ ପାରିବ ଏବଂ ଏହାର ମୂଲ୍ୟ ମଧ୍ୟ ହ୍ରାସ ପାଇପାରିବ ବୋଲି ସେ କହିଛନ୍ତି।
