ନୂଆଦିଲ୍ଲୀ,୧୦।୨(ଆଇଏଏନ୍ଏସ୍):ଆଦାନୀ ଗ୍ରୁପ୍ର ଜାଲିଆତି ସମ୍ପର୍କରେ ଆମେରିକାର ଶର୍ଟ ସେଲ୍ କମ୍ପାନୀ ହିଣ୍ଡେନବର୍ଗ ରିସର୍ଚ୍ଚର ରିପୋର୍ଟର ତଦନ୍ତ ଜଣେ ଅବସରପ୍ରାପ୍ତ ସୁପ୍ରିମକୋର୍ଟ ବିଚାରପତିଙ୍କ ତତ୍ତ୍ୱାବଧାନରେ ଏକ କମିଟି ଦ୍ୱାରା କରାଇବା ପାଇଁ ଦାଏର ପିଟିଶନ୍ର ଶୁଣାଣି ଶୁକ୍ରବାର ସର୍ବୋଚ୍ଚ ଅଦାଲତ କରିବେ। ହିଣ୍ଡେନବର୍ଗ ରିସର୍ଚ୍ଚ ଆଣିଥିବା ଅଭିଯୋଗକୁ ଆଦାନୀ ଗ୍ରୁପ୍ ଅଗ୍ରାହ୍ୟ କରିଆସିଛି। ସିଜେଆଇ ଡି.ଓ୍ବାଇ. ଚନ୍ଦ୍ରଚୂଡ଼ଙ୍କ ଅଧ୍ୟକ୍ଷତାରେ ଜଷ୍ଟିସ ପି.ଏସ୍. ନରସିଂହ ଏବଂ ଜେ.ବି. ପର୍ଡିଓ୍ବାଲାଙ୍କ ଖଣ୍ଡପୀଠରେ ଜରୁରୀ ଶୁଣାଣି ପାଇଁ ଆଇନଜୀବୀ ବିଶାଳ ତିଓ୍ବାରି ନିବେଦନ କରିଥିଲେ। ଏହି ପ୍ରସଙ୍ଗରେ ଅନ୍ୟ ଏକ ପିଟିଶନର ଶୁଣାଣି ୧୦ ତାରିଖରେ ହେବାକୁ ଥିବାରୁ ଏହାକୁ ମଧ୍ୟ ଏକସଙ୍ଗେ ଶୁଣାଣି କରିବାକୁ ତିଓ୍ବାରି ଖଣ୍ଡପୀଠଙ୍କୁ କହିଥିଲେ। ଆଇନଜୀବୀ ଏମ.ଏଲ୍. ଶର୍ମା ଦାଏର କରିଥିବା ଜନସ୍ବାର୍ଥ ମାମଲାରେ ହିଣ୍ଡେନବର୍ଗ ରିସର୍ଚ୍ଚର ମୁଖ୍ୟ ଆମେରିକାର ନାଟେ ଆଣ୍ଡରସନ୍ ଏବଂ ତାଙ୍କ ଭାରତୀୟ ସଂସ୍ଥା ଆପରାଧିକ ଷଡ଼ଯନ୍ତ୍ର କରି ଗତ ମାସ ୨୫ ତାରିଖ ପୂର୍ବରୁ ଓ ପରେ ଶହ ଶହ ବିଲିୟନ ଡଲାର ଶର୍ଟ ସେଲ୍ କରିଥିବା ଅଭିଯୋଗ ହୋଇଛି। ସେମାନେ ଆଦାନୀ ଗ୍ରୁପ୍ ବିରୋଧରେ ମନଗଢ଼ା ଖବର ପ୍ରକାଶ କରି ଶେୟାର ବଜାରରେ କ୍ରାସ୍ କରାଇ କମ୍ ଦରରେ ସେମାନଙ୍କ ଶର୍ଟ ସେଲ୍ ସ୍ଥିତି ବଢ଼ାଇଥିବା ପିଟିଶନରେ ଉଲ୍ଲେଖ କରାଯାଇଛି।
