ଇସଲାମାବାଦ୍, ୨୭।୮: ଆଫ୍ରିକା ଏବେ ପୋଲିଓ ମୁକ୍ତି ହୋଇଛି। ଏନେଇ ବିଶ୍ୱ ସ୍ବାସ୍ଥ୍ୟ ସଂଗଠନ ପକ୍ଷରୁ ଘୋଷଣା କରାଯାଇଛି। ପାକିସ୍ତାନ ଏବଂ ଆଫଗାନିସ୍ତାନରେ ଏବେ ବି ପୋଲିଓ ରହିଥିବା ସଂଗଠନ ପକ୍ଷରୁ ସୂଚନା ଦିଆଯାଇଛି। ତେବେ ପାକିସ୍ତାନରେ ଜାରି ରହିଥିବା ପୋଲିଓ ମୁକ୍ତ ଅଭିଯାନରେ ବହୁ ବାଧା ସୃଷ୍ଟି ହେଉଥିବା ଅଭିଯୋଗ ହେଉଛି। ଦେଶରେ ପୋଲିଓ ଟିକାର ବ୍ୟାପକ ହେର୍ଫେର୍ ହେଉଥିବା କୁହାଯାଉଛି। ଏଠାରେ ପୋଲିଓ ଟିକା ଚୋରୀ କରୁଥିବା ଅଭିଯୋଗରେ ଜଣେ ସ୍ବାସ୍ଥ୍ୟ ଅଧିକାରୀ ଏବଂ ତାଙ୍କ ସହାୟକଙ୍କୁ ସ୍ପେଶାଲ ଟାସ୍କ୍ ଫୋର୍ସ ପକ୍ଷରୁ ଗିରଫ କରାଯାଇଛି। ଦୀର୍ଘଦିନ ଧରି ସମ୍ପୃକ୍ତ ଅଧିକାରୀ ଜଣକ ଉପରେ ତୀକ୍ଷ୍ଣ ଦୃଷ୍ଟି ରଖାଯାଇଥିଲା। ପରେ ଟିକା ଚୋରୀର ପର୍ଦ୍ଦାଫାଶ୍ ହୋଇଥିଲା। ତାଙ୍କ ପାଖରୁ ୫ ଲକ୍ଷ ଟଙ୍କାର ପୋଲିଓ ଟିକା ଜବତ ହୋଇଛି। ଲାହୋରରେ ଏଭଳି ଟିକା ହେରଫେର୍ ହେଉଥିବା କୁହାଯାଉଛି। ୨ ଅଭିଯୁକ୍ତଙ୍କୁ କୋର୍ଟରେ ହାଜର କରାଯିବ ବୋଲି କୁହାଯାଉଛି।
