ଚଣ୍ଡିଗଡ଼,୩୦।୮: ହରିୟାଣା ସ୍ବାସ୍ଥ୍ୟମନ୍ତ୍ରୀ ଆରତୀ ସିଂହ ରାଓଙ୍କ ଘରେ ଏବେ ଖଉସିର ଲହରି। ଏହି ଖୁସି ତାଙ୍କ ମାଆ ହେବାର, ହଁ, ଆରତୀ ସରୋଗେସି ମାଧ୍ୟମରେ ସିଙ୍ଗଲ ମଦର ହୋଇଛନ୍ତି ଏବଂ ଏକ ପୁତ୍ର ସନ୍ତାନକୁ ଜନ୍ମ ଦେଇଛନ୍ତି। ତାଙ୍କ ପୁଅର ନାମ ରାଓ ଜୟବୀର ସିଂହ ରଖାଯାଇଛି। ଏହି କୁନି ଅତିଥି, ଯିଏ ଏବେ ତିନି ମାସର, ତାଙ୍କ ଜୀବନରେ ନୂଆ ଖୁସି ଏବଂ ଆଶା ଆଣିଛନ୍ତି। ଏହି ଖବର କେବଳ ତାଙ୍କ ପରିବାର ନୁହେଁ ବରଂ ତାଙ୍କ ପ୍ରଶଂସକ ଏବଂ ସମର୍ଥକମାନଙ୍କୁ ମଧ୍ୟ ଉତ୍ସାହରେ ଭରି ଦେଇଛି।
ଆରତୀ ରାଓ ସରୋଗେସି ମାଧ୍ୟମରେ ମାଆ ହେବାକୁ ନିଷ୍ପତ୍ତି ନେଇଥିଲେ, ଯାହା ତାଙ୍କ ବ୍ୟକ୍ତିଗତ ଜୀବନର ଏକ ସୁନ୍ଦର ମୁହୂର୍ତ୍ତ। ତାଙ୍କ ପୁଅ ଜୟବୀର ସିଂହ ତାଙ୍କ ମନ୍ତ୍ରୀ ବାସଭବନରେ ପାଳିତ ହେଉଛନ୍ତି। ଯଦିଓ ରାଓ ପରିବାର ଏହି କଥାକୁ ଗୋପନ ରଖିଥିଲେ, ତାଙ୍କ ବ୍ୟକ୍ତିଗତ ସହାୟକ ନବୀନ ଯାଦବ ଏହାକୁ ନିଶ୍ଚିତ କରିଛନ୍ତି। ଏହା ବିଶ୍ୱାସ କରାଯାଉଛି ଯେ ଜୟବୀର ଆଗାମୀ ସମୟରେ ତାଙ୍କ ମାଆଙ୍କ ପିତା ରାଓ ଇନ୍ଦ୍ରଜିତ ସିଂହଙ୍କ ରାଜନୈତିକ ଯାତ୍ରାକୁ ଆଗକୁ ବଢ଼ାଇ ପାରିବେ।
ଆରତୀ ରାଓ ସରୋଗେସି ମାଧ୍ୟମରେ ମାଆ ହେବା ପାଇଁ ସମସ୍ତ ଆଇନଗତ ପ୍ରକ୍ରିୟା ଅନୁସରଣ କରିଥିଲେ। ସେ ପ୍ରଥମେ କୋର୍ଟରୁ ଅନୁମତି ନେଇଥିଲେ ଏବଂ ପରେ ସମଗ୍ର ପ୍ରକ୍ରିୟା ଅନୁସରଣ କରିଥିଲେ। ପରିବାର ଏହି ନିଷ୍ପତ୍ତିରେ ତାଙ୍କୁ ପୂର୍ଣ୍ଣ ସମର୍ଥନ କରିଥିଲେ।
ଆରତୀ ରାଓ ହେଉଛନ୍ତି କେନ୍ଦ୍ର ମନ୍ତ୍ରୀ ରାଓ ଇନ୍ଦ୍ରଜିତ ସିଂହଙ୍କ ଝିଅ ଏବଂ ହରିୟାଣାର ପୂର୍ବତନ ମୁଖ୍ୟମନ୍ତ୍ରୀ ରାଓ ବୀରେନ୍ଦ୍ର ସିଂହଙ୍କ ନାତୁଣୀ। ତାଙ୍କ ସାନ ଭଉଣୀ ଭାରତୀ ରାଓ, ଯିଏ ଦୁଇଟି ପୁଅର ମାଆ ଏବଂ ରାଜନୀତିରୁ ଦୂରରେ ରହନ୍ତି। ଆରତୀ ତାଙ୍କ ପିତାଙ୍କ ଚିନ୍ତାଧାରାରେ ଅନୁପ୍ରାଣିତ ହୋଇ ରାଜନୀତିକୁ ଆସିଥିଲେ ଏବଂ ତାଙ୍କ ଚିନ୍ତାଧାରା ଆଗକୁ ନେଉଛନ୍ତି। ତାଙ୍କ ଜେଜେବାପା ରାଓ ବୀରେନ୍ଦ୍ର ସିଂହ ମଧ୍ୟ ଆଟେଲିର ବିଧାୟକ ଥିଲେ ଏବଂ ହରିୟାଣାର ମୁଖ୍ୟମନ୍ତ୍ରୀ ହୋଇଥିଲେ।
