କେସିଙ୍ଗା, ୬।୬ (ତୁମେଶ୍ୱର ସାହୁ): କଳାହାଣ୍ଡି ଜିଲାର କେସିଙ୍ଗା ସହରରେ ଅବସ୍ଥିତ ଗୋଷ୍ଠୀ ସ୍ୱାସ୍ଥ୍ୟକେନ୍ଦ୍ରରେ ସମସ୍ତ ପ୍ରକାର ମୌଳିକ ଭିତ୍ତିଭୂମି ଥିବା ସତ୍ତ୍ୱେ ବିଭିନ୍ନ ସମସ୍ୟା ଦେଖାଦେଉଛି। ରାଜ୍ୟ ସରକାରଙ୍କ ନିୟମ ଅନୁଯାୟୀ ଜାତୀୟ ରାଜପଥ ପାର୍ଶ୍ୱରେ ଥିବା ଗୋଷ୍ଠୀ ସ୍ୱାସ୍ଥ୍ୟକେନ୍ଦ୍ରଗୁଡ଼ିକରେ ଟ୍ରମା ସେଣ୍ଟର ସ୍ଥାପନ କରାଯିବାର ବ୍ୟବସ୍ଥା ରହିଛି। ଏହି ଯୋଜନା ଅନୁସାରେ କେସିଙ୍ଗା ଗୋଷ୍ଠୀ ସ୍ୱାସ୍ଥ୍ୟକେନ୍ଦ୍ରକୁ ଚିହ୍ନଟ କରାଯାଇଥିବା ସହ ଜଣେ ନୋଡାଲ ଅଧିକାରୀଙ୍କୁ ମଧ୍ୟ ନିଯୁକ୍ତ କରାଯାଇଛି। କିନ୍ତୁ ଏପର୍ଯ୍ୟନ୍ତ ଟ୍ରମା ସେଣ୍ଟର କାର୍ଯ୍ୟକ୍ଷମ ହୋଇପାରିନାହିଁ।
ନିୟମ ଅନୁଯାୟୀ, ଦୁର୍ଘଟଣାଜନିତ ରୋଗୀଙ୍କ ଚିକିତ୍ସା ଟ୍ରମା ସେଣ୍ଟରରେ ହେବା କଥା। ମାତ୍ର ଗୁରୁତର ରୋଗୀମାନଙ୍କୁ ଭବାନୀପାଟଣାକୁ ରେଫର କରାଯାଉଛି। ସେଠାରୁ ଅଧିକ ଉନ୍ନତ ଚିକିତ୍ସା ପାଇଁ ବୁର୍ଲା କିମ୍ବା କଟକ ପଠାଯାଉଥିବା ବେଳେ ଅନେକ ସମୟରେ ରୋଗୀ ବାଟରେ ମୃତ୍ୟୁବରଣ କରୁଛନ୍ତି। ତେଣୁ ଦୁର୍ଘଟଣାଜନିତ ରୋଗୀଙ୍କୁ ନିର୍ଦ୍ଦିଷ୍ଟ ଟ୍ରମା ସେଣ୍ଟରରେ ଚିକିତ୍ସା କରାଗଲେ ଅନେକ ଜୀବନ ରକ୍ଷା ପାଇପାରିବ ବୋଲି ମତ ପ୍ରକାଶ ପାଉଛି।
ଚଳିତ ବର୍ଷ ଜାନୁଆରୀ ୨୬ ତାରିଖରେ ଘଟିଥିବା ଏକ ସଡ଼କ ଦୁର୍ଘଟଣାରେ ଜଣେ ମୃତ୍ୟୁବରଣ କରିଥିବା ବେଳେ ୧୫୪ ଜଣ ଆହତଙ୍କୁ ଗୋଷ୍ଠୀ ସ୍ୱାସ୍ଥ୍ୟ କେନ୍ଦ୍ରର ଅଧୀକ୍ଷକ ଓ କର୍ମଚାରୀଙ୍କ ଅକ୍ଲାନ୍ତ ପରିଶ୍ରମ ଫଳରେ ଚିକିତ୍ସା ଯୋଗାଇ ଜୀବନ ରକ୍ଷା କରାଯାଇଥିଲା। ସେହିପରି ଫେବୃଆରୀରେ ୧୨୮ ଜଣ, ମାର୍ଚ୍ଚରେ ୧୧୨ ଜଣ, ଏପ୍ରିଲରେ ୧୧୦୪ ଜଣ ଏବଂ ମେ ମାସରେ ୧୧୯ ଜଣ ଦୁର୍ଘଟଣାଜନିତ ରୋଗୀଙ୍କୁ ଚିକିତ୍ସା ଯୋଗାଇ ଦିଆଯାଇଥିବା ବେଳେ ୩ ଜଣଙ୍କର ମୃତ୍ୟୁ ଘଟିଛି।ଏହି ଟ୍ରମା ସେଣ୍ଟରକୁ ଯଥାଶୀଘ୍ର କାର୍ଯ୍ୟକ୍ଷମ କରିବା ପାଇଁ ଜନସାଧାରଣଙ୍କ ମଧ୍ୟରେ ଦାବି ଜୋର ଧରିଛି।
ସେହିପରି ‘ଆମ ହସ୍ପିଟାଲ’ ଯୋଜନାରେ ଗତ ଦୁଇ ବର୍ଷ ହେଲାଣି ଗୋଷ୍ଠୀ ସ୍ୱାସ୍ଥ୍ୟକେନ୍ଦ୍ରର ମରାମତି, ବହିର୍ବିଭାଗ ଓ ଅନ୍ତଃବିଭାଗର ବିଭିନ୍ନ କୋଠରୀର ଉନ୍ନୟନ କାର୍ଯ୍ୟ ଅପେକ୍ଷାରତ ରହିଛି। ପ୍ରାୟ ୫୦ ବର୍ଷ ଧରି ବିଦ୍ୟୁତ ତାର ବଦଳାଯାଇ ନ ଥିବାରୁ ବାରମ୍ବାର ସର୍ଟ ସର୍କିଟ ହୋଇ ତାରଗୁଡ଼ିକ ପୋଡ଼ି ନଷ୍ଟ ହେଉଛି। ଅନେକ ସ୍ଥାନରେ ଲାଗିଥିବା ସିସିଟିଭି କ୍ୟାମେରା ମଧ୍ୟ ଅଚଳ ହୋଇ ପଡ଼ିଛି।
ଏହି ସମସ୍ୟାଗୁଡ଼ିକ ସମ୍ପର୍କରେ ଜି.ଡି. ବିଭାଗକୁ ବହୁବାର ଚିଠି ଲେଖାଯାଇଥିଲେ ମଧ୍ୟ ଆଜି ପର୍ଯ୍ୟନ୍ତ କୌଣସି କାର୍ଯ୍ୟାନୁଷ୍ଠାନ ହୋଇନାହିଁ। ଗୋଷ୍ଠୀ ସ୍ୱାସ୍ଥ୍ୟ କେନ୍ଦ୍ରର ବିଭିନ୍ନ ଉନ୍ନୟନମୂଳକ କାର୍ଯ୍ୟ ପାଇଁ ରାଜ୍ୟ ସରକାର ୪ କୋଟି ୫୦ ଲକ୍ଷ ଟଙ୍କା ମଞ୍ଜୁର କରିଥିବା ବେଳେ ଦୁଇ ବର୍ଷ ବିତିଯାଇଥିଲେ ମଧ୍ୟ ଜିଲା ସିଡିଏମ୍ ଓ ପିଏଚ୍ଓ କାର୍ଯ୍ୟାଳୟ ପକ୍ଷରୁ ଟେଣ୍ଡର ଡକାଯାଇ ନ ଥିବାରୁ କାର୍ଯ୍ୟ ଆରମ୍ଭ ହୋଇପାରୁନାହିଁ।
ହସ୍ପିଟାଲରେ ୧୫ ଜଣ ଡାକ୍ତର ରହିବାର ବ୍ୟବସ୍ଥା ଥିଲେ ମଧ୍ୟ ବର୍ତ୍ତମାନ ମାତ୍ର ୪ ଜଣ ଡାକ୍ତର କାର୍ଯ୍ୟରତ ଅଛନ୍ତି। ସେଥିମଧ୍ୟରୁ ଜଣଙ୍କୁ ଡେପୁଟେସନରେ ପଠାଯାଇଛି। ଫଳରେ କେବଳ ୩ ଜଣ ଏମ୍ବିବିଏସ୍ ଡାକ୍ତର ରୋଗୀ ସେବାରେ ନିୟୋଜିତ ଅଛନ୍ତି। ଏହାସହ ଜଣେ ସ୍ତ୍ରୀରୋଗ ବିଶେଷଜ୍ଞ, ଜଣେ ଶିଶୁରୋଗ ବିଶେଷଜ୍ଞ ଏବଂ ଜଣେ ଦନ୍ତ ଚିକିତ୍ସକ କାର୍ଯ୍ୟରତ ଅଛନ୍ତି। ୧୨ ଜଣ ଷ୍ଟାଫ୍ ନର୍ସ ମଧ୍ୟ ସେବା ଯୋଗାଉଛନ୍ତି।
ଏତେ କମ୍ ଡାକ୍ତର ଥିଲେ ମଧ୍ୟ ଅଧୀକ୍ଷକ ଓ ଡାକ୍ତରମାନଙ୍କ ମିଳିତ ଉଦ୍ୟମରେ ୨୦୨୫-୨୬ ଆର୍ଥିକ ବର୍ଷରେ ପ୍ରାୟ ୭୦ ହଜାର ରୋଗୀଙ୍କୁ ଚିକିତ୍ସା ଯୋଗାଇ ରୋଗୀ ସେବାରେ ଅଗ୍ରଣୀ ଭୂମିକା ନିଭାଯାଉଛି। ସେହିପରି ଏହି ସମୟ ମଧ୍ୟରେ ପ୍ରାୟ ୬,୯୮୦ ଜଣ ଗର୍ଭବତୀ ଓ ପ୍ରସୂତି ମହିଳାଙ୍କୁ ଚିକିତ୍ସା ସେବା ପ୍ରଦାନ କରାଯାଇଛି। ପ୍ରତି ମାସରେ ପ୍ରାୟ ୭୦୦ରୁ ୮୦୦ ଜଣ ଗର୍ଭବତୀ ମହିଳାଙ୍କୁ ଚିକିତ୍ସା କରାଯାଉଛି। ଏହାସହ ୨୦୨୫-୨୬ ଆର୍ଥିକ ବର୍ଷରେ ପ୍ରାୟ ୧,୫୦୦ ଜଣ ଗୁରୁତର ରୋଗୀଙ୍କୁ ଭବାନୀପାଟଣାକୁ ସ୍ଥାନାନ୍ତରିତ କରାଯାଇଛି।
ଏ ସମ୍ପର୍କରେ କେସିଙ୍ଗା ଗୋଷ୍ଠୀ ସ୍ୱାସ୍ଥ୍ୟ କେନ୍ଦ୍ରର ଅଧୀକ୍ଷକ ଡା. ରବୀନ୍ଦ୍ରନାଥ ଖଟୁଆଙ୍କୁ ପଚାରିବାରୁ ସେ କହିଥିଲେ ଯେ, ହସ୍ପିଟାଲର ଉନ୍ନତି ପାଇଁ ବିଭାଗୀୟ ଅଧିକାରୀମାନଙ୍କୁ ବାରମ୍ବାର ଚିଠି ଲେଖାଯାଉଛି। କିନ୍ତୁ କାର୍ଯ୍ୟାନ୍ୱୟନ ହେଉନଥିବାରୁ ବିଭିନ୍ନ ସମସ୍ୟା ରହିଛି। ତଥାପି ଆବଶ୍ୟକତା ଅନୁଯାୟୀ ଡାକ୍ତର ନଥିଲେ ମଧ୍ୟ ହସ୍ପିଟାଲ ପକ୍ଷରୁ ରୋଗୀ ସେବା ନିରନ୍ତର ଭାବେ ଜାରି ରହିଛି।
