କୋରାପୁଟ , ନନ୍ଦପୁର,୨୮।୨(ଅମିତାଭ ବେହେରା/ତୁଷାର କାନ୍ତ ମହାନ୍ତି ): ହାଶିଶ ତେଲ ଜବତ ଘଟଣାରେ ଦୀର୍ଘ ସମୟ ଧରି ଚାଲିଥିବା ହାଶିଶ ତେଲ ତସକରୀ ଘଟଣାରେ ପୋଲିସ ୭ ଜଣଙ୍କୁ ଗିରଫ କରିଛି ବୋଲି ଶନିବାର ଖବରଦାତା ସମ୍ମିଳନୀରେ ଡିଆଇଜି କନୱାର ବିଶାଳ ସିଂ ସୂଚନା ଦେଇଛନ୍ତି। ଏହି ସମ୍ମିଳନୀରେ ଏସପି ରୋହିତ ବର୍ମା ମଧ୍ୟ ଉପସ୍ଥିତ ଥିଲେ। ତେବେ ଘଟଣାର ମୁଖ୍ୟ ମାଷ୍ଟରମାଇଣ୍ଡ ଭାବେ କେରଳର ଏଲେନ ଜୟରାଜ (୩୩)ଙ୍କ ନାମ ସାମ୍ନାକୁ ଆସିଛି। ତାଙ୍କ ବିରୋଧରେ ପୂର୍ବରୁ ଗୁରୁତର ଅପରାଧ ଓ ଏନ୍ଡିପିଏସ ଆଇନ ମାମଲା ରହିଥିବା ତଥ୍ୟ ମିଳିଛି। ପୋଲିସ ତଦନ୍ତରେ ପ୍ରକାଶ, ଅଭିଯୁକ୍ତମାନେ ଗଞ୍ଜେଇ ବହୁ ପରିମାଣରେ ସଂଗ୍ରହ କରି ଉଚ୍ଚ ପ୍ରଯୁକ୍ତି ମାଧ୍ୟମରେ ମଲ୍ଟି-ଷ୍ଟେଜ ଏକ୍ସଟ୍ରାକ୍ସନ ପ୍ରକ୍ରିୟାରେ ହାଶିଶ ତେଲ ତିଆରି କରୁଥିଲେ। ଏହି କାମ ପାଇଁ ଗୁପ୍ତ ଲ୍ୟାବ ସେଟଅପ କରାଯାଇଥିବା ବେଳେ ପ୍ରେସର କୁକର, ପାଇପ, ଡ୍ରମ, ଏବଂ ଇସୋପ୍ରୋପିଲ ଆଲକୋହଲ ପରି ରାସାୟନିକ ପଦାର୍ଥ ବ୍ୟବହାର ହେଉଥିବା ଜଣାପଡ଼ିଛି। ଫର୍ମେଣ୍ଟେସନ, ଡିଷ୍ଟିଲେସନ ଓ ନିୟନ୍ତ୍ରିତ ତାପ ପ୍ରକ୍ରିୟାରେ ଉଚ୍ଚ ଶୁଦ୍ଧତାର ତେଲ ପ୍ରସ୍ତୁତ କରାଯାଉଥିଲା। ଏହି ଘଟଣାରେ ମାଷ୍ଟର ମାଇଣ୍ଡ ଜୟରାଜ (୩୩) ଙ୍କ ସମେତ କେରଳର କିରଣ ଡି (୩୩), ଆନନ୍ଦ ରାଜ (୨୮), ବିଥୁ ବି (୩୪) ସିଣ୍ଡିକେଟ ସଦସ୍ୟ ଭାବେ ଜଡିତ ଥିବା ବେଳେ ମାଲକାନଗିରିର ଲଇଚନ ଖିଲ୍ଲା (୨୫) ଓ କୋରାପୁଟର ସାଧୁ ପାଙ୍ଗି (୪୫) ଲକ୍ଷ୍ମଣ ଖିଲ ( ୨୩) ସ୍ଥାନୀୟ ଲଜିଷ୍ଟିକ୍ସ ସହଯୋଗୀ ଭାବେ କାମ କରୁଥିବା ପୋଲିସ କହିଛି। ସମସ୍ତଙ୍କୁ ଆଦାଲତରେ ଉପସ୍ଥାପନ କରାଯାଇଛି।
ପୋଲିସ ସୂଚନା ଅନୁଯାୟୀ, କୋରାପୁଟ ଅଞ୍ଚଳକୁ ଆଧାର କରି ଏହି ଗୁପ୍ତ ଉତ୍ପାଦନ କେନ୍ଦ୍ର ଚାଲୁଥିଲା। ବହୁ ପରିମାଣର ସାମଗ୍ରୀ ଓ ଯନ୍ତ୍ରପାତି ଜବତ ହୋଇଛି। ଏହା ପଛରେ ଆହୁରି କେହି ଜଡିତ ଅଛନ୍ତି କି ନାହିଁ, ସେନେଇ ତଦନ୍ତ ଜାରି ରହିଛି।
