ମୁମ୍ବାଇ,୩।୩: T୨୦ ବିଶ୍ୱକପ୍ ୨୦୨୬ର ସେମିଫାଇନାଲରେ ଭାରତ ଓ ଇଂଲଣ୍ଡ ମଧ୍ୟରେ ହେବାକୁ ଯାଉଛି ମହାଲଢ଼େଇ। ଏହି ଗୁରୁତ୍ୱପୂର୍ଣ୍ଣ ମ୍ୟାଚ ପାଇଁ ଭାରତୀୟ ଦଳ ମୁମ୍ବାଇରେ ପହଞ୍ଚି ସାରିଛି। କିନ୍ତୁ ଏହି ସମୟରେ ଏକ ଘଟଣା ସମସ୍ତଙ୍କୁ ଚକିତ କରିଦେଇଛି। ଦଳର ଅଧିନାୟକ ସୂର୍ଯ୍ୟକୁମାର ଯାଦବ, ଅଲରାଉଣ୍ଡର ହାର୍ଦ୍ଦିକ ପାଣ୍ଡ୍ୟା ଏବଂ ଶିବମ ଦୁବେ ଟିମ ସାଥୀଙ୍କୁ ଛାଡ଼ି ନିଜ ନିଜ ଘରକୁ ଚାଲିଯାଇଛନ୍ତି।
ମୁମ୍ବାଇ ବିମାନବନ୍ଦରରୁ ଏକ ଭିଡିଓ ସାମ୍ନାକୁ ଆସିଛି, ଯେଉଁଥିରେ ଅନ୍ୟ ଖେଳାଳିମାନେ ଦଳର ବସରେ ବସୁଥିବା ବେଳେ ଏହି ତିନି ଖେଳାଳି ନିଜ ନିଜ କାର୍ରେ ବସି ଘରକୁ ଯାଉଥିବା ଦେଖାଯାଇଛି। ସେମିଫାଇନାଲ ଭଳି ଏକ ବଡ଼ ମ୍ୟାଚ୍ ପୂର୍ବରୁ ଖେଳାଳିମାନେ କାହିଁକି ଟିମ୍ ହୋଟେଲରେ ନ ରହି ଘରକୁ ଗଲେ, ସେ ନେଇ ପ୍ରଶଂସକମାନେ ପ୍ରଶ୍ନ ଉଠାଇଛନ୍ତି।
ଏହି ତିନି ଜଣ ଯାକ ଖେଳାଳିଙ୍କ ଘର ମୁମ୍ବାଇରେ ହୋଇଥିବାରୁ ସେମାନେ ପରିବାର ସହ ସମୟ ବିତାଇବାକୁ ଘରକୁ ଯାଇଛନ୍ତି। ତେବେ ବିସିସିଆଇ (BCCI) ଏପରି ଅନୁମତି କିପରି ଦେଲା, ତାହାକୁ ନେଇ ଚର୍ଚ୍ଚା ଜୋର ଧରିଛି। ଯଦି ସେମିଫାଇନାଲ ଫଳାଫଳ ଭାରତ ସପକ୍ଷରେ ନ ଯାଏ, ତେବେ ଏହି ଘଟଣାକୁ ନେଇ ବିବାଦ ଆହୁରି ବଢ଼ିପାରେ।
Suryakumar Yadav, Hardik Pandya, and Shivam Dube live in Mumbai, so they left the team and went to their own homes in their personal cars instead of staying with the team.
Is there no rule in BCCI that even if a match is being played in the city where a player lives, he still… pic.twitter.com/tTqDAKv4Mp
— 𝐑𝐮𝐬𝐡𝐢𝐢𝐢⁴⁵ (@rushiii_12) March 2, 2026
କେବଳ ଏହି ଘଟଣା ନୁହେଁ, ବରଂ ଏହି ତିନି ଖେଳାଳିଙ୍କ ଫର୍ମ ମଧ୍ୟ ଦଳ ପାଇଁ ଚିନ୍ତାର ବିଷୟ ପାଲଟିଛି। ପାଣ୍ଡ୍ୟା ବୋଲିଂରେ ବେଶ ମହଙ୍ଗା ସାବ୍ୟସ୍ତ ହେଉଛନ୍ତି। ଚଳିତ ବିଶ୍ୱକପରେ ସେ ସବୁଠାରୁ ଅଧିକ ଛକା ଖାଇଥିବା ବୋଲର। ଅଧିନାୟକ ସୂର୍ଯ୍ୟକୁମାର ଆମେରିକା ବିପକ୍ଷରେ ୮୪ ରନର ଇନିଂସ ଖେଳିବା ପରେ ତାଙ୍କ ବ୍ୟାଟରୁ ଅର୍ଦ୍ଧଶତକ ଦେଖିବାକୁ ମିଳିନାହିଁ। ସେହିଭଳି ଶିବମ ଦୁବେଙ୍କ ଦଳର ମଧ୍ୟକ୍ରମରେ ପ୍ରଦର୍ଶନ ମଧ୍ୟ ସ୍ଥିର ରହୁନାହିଁ। ଏଭଳି ସ୍ଥିତିରେ ସେମିଫାଇନାଲ ପୂର୍ବରୁ ଖେଳାଳିଙ୍କ ଏପରି ଆଚରଣ ଏବଂ ଖରାପ ଫର୍ମ ଟିମ ଇଣ୍ଡିଆ ପାଇଁ ଅଡୁଆ ହେବନି ତ? ଏହାକୁ ନେଇ ଏବେ ସୋସିଆଲ ମିଡିଆରେ ବେଶ ଆଲୋଚନା ଚାଲିଛି।
