ବରଗଡ଼,୭।୯(ପ୍ରେମାନନ୍ଦ ଖମାରୀ):ବରଗଡ଼ ସହର ଉପକଣ୍ଠ ବରାହଗୁଡ଼ାସ୍ଥିତ କ୍ରୀଷ୍ଣା ବିକାଶ ଶିକ୍ଷାନୁଷ୍ଠାନରେ ଗୁରୁ ଉତ୍ସବ ମହାସମାରୋହରେ ପାଳିତ ହୋଇଯାଇଛି। ସକାଳ ପ୍ରାର୍ଥନା ସଭାରେ ସର୍ବପଲ୍ଲୀ ରାଧାକ୍ରୀଷ୍ଣନ୍ଙ୍କ ପ୍ରତିଛବି ସମ୍ମୁଖରେ ଅତିଥିଗଣ ଦୀପ ପ୍ରଜ୍ଜ୍ୱଳନ ଓ ମାଲ୍ୟାର୍ପଣ କରିଥିଲେ। ପରେ ଶିକ୍ଷୟିତ୍ରୀ ଶିକ୍ଷକଙ୍କ ଦ୍ୱାରା ପ୍ରାର୍ଥନା ସଭା ପରିଚାଳିତ ହୋଇଥିଲା। ଅପରାହ୍ନ ୪ଟାରେ ବିକାଶ ଅଡିଟୋରିୟମରେ ଅନୁଷ୍ଠିତ ଶିକ୍ଷକ ସମ୍ବର୍ନ୍ଧନା ସଭାରେ ବିକାଶ ଆବାସିକ ବିଦ୍ୟାଳୟର ସିନିୟର ସେକେଣ୍ଡାରୀ ଅଧ୍ୟକ୍ଷ ଚିତ୍ତରଞ୍ଜନ ପତି ସ୍ବାଗତ ଭାଷଣ ଓ ଅତିଥି ପରିଚୟ ପ୍ରଦାନ କରିଥିଲେ। ଏହି ଅବସରରେ ବରଗଡ଼ର ବିଭିନ୍ନ ସରକାରୀ ହାଇସ୍କୁଲର ରାଜ୍ୟପାଳ ପୁରସ୍କାରପ୍ରାପ୍ତ ଅଭିଜ୍ଞ ଶିକ୍ଷକମାନଙ୍କୁ ସମ୍ମାନିତ କରାଯାଇଥିଲା। ବିକାଶ ଶିକ୍ଷାନୁଷ୍ଠାନ ସମୂହର ଚେୟାରମ୍ୟାନ ଡି. ମୁରଲୀକ୍ରୀଷ୍ଣା ଯୋଗଦେଇ ବିକାଶ ଶିକ୍ଷାନୁଷ୍ଠାନର ଶିକ୍ଷକମାନଙ୍କ କଠିନ ପରିଶ୍ରମ ଯୋଗୁ ଆଜି ବିକାଶ ଭାରତର ତିନୋଟି ରାଜ୍ୟରେ ତାର ଶାଖା ପରିବର୍ଦ୍ଧିତ କରିବା ସହିତ ବିକାଶ ବିରାସତର ଉନ୍ନତିରେ ଶିକ୍ଷକଙ୍କ ଯଥେଷ୍ଟ ଅବଦାନ ରହିଛି ବୋଲି ସେ ମତବ୍ୟକ୍ତ କରିଥିଲେ। ମ୍ୟାନେଜିଂ ଡାଇରେକ୍ଟର ବିବେକ ଦାଶରୀ ନିଜ ଛାତ୍ର ଜୀବନର କଥା ମନେ ପକାଇ ଶିକ୍ଷକଙ୍କ ନିଷ୍ଠା ଯୋଗୁ ଆଜି ବିକାଶ ଶିକ୍ଷାନୁଷ୍ଠାନ ଉନ୍ନତିର ଶିଖରରେ ପହଞ୍ଚତ୍ଛି ବୋଲି କହିଥିଲେ। ଡାଇରେକ୍ଟର ଡଃ ସମରେନ୍ଦ୍ର ନାଥ ପଣ୍ଡା କିଣ୍ଡର୍ କସ୍ମସ୍, ଅଟଳ ଲ୍ୟାବ୍, ସ୍ମାର୍ଟ କ୍ଲାସ୍ ଓ ମେଣ୍ଟରିଂ ମାଧ୍ୟମରେ ବିକାଶ ବିଦ୍ୟାଳୟର ଶିକ୍ଷା ବ୍ୟବସ୍ଥାରେ ଉନ୍ନତି ପରିଲକ୍ଷିତ ହୋଇଛି ବୋଲି ମତବ୍ୟକ୍ତ କରିଥିଲେ। କାର୍ଯ୍ୟକାରୀ ଅଧ୍ୟକ୍ଷ ଶିଶିର ପ୍ରସାଦ ରାଉଳ ପଶ୍ଚିମ ଓଡ଼ିଶାର ସାଂସ୍କୃତିକ ଉନ୍ନତିରେ ଏହି ଶିକ୍ଷାନୁଷ୍ଠାନର ଯଥେଷ୍ଟ ଅବଦାନ ରହିଛି ବୋଲି ମତବ୍ୟକ୍ତ କରିଥିଲେ। ବରଗଡ଼ ଜିଲା ଅନ୍ତର୍ଗତ କ୍ରୀଷ୍ଣା ବିକାଶର ଶାଖା ବିଦ୍ୟାଳୟର ଶିକ୍ଷୟିତ୍ରୀ, ଶିକ୍ଷକମାନଙ୍କୁ ଉପହାର ଦେଇ ସମ୍ମାନିତ କରାଯାଇଥିଲା। ଶେଷରେ ଶିକ୍ଷୟିତ୍ରୀ, ଶିକ୍ଷକମାନଙ୍କ ଦ୍ୱାରା ଆକର୍ଷଣୀୟ ସାଂସ୍କୃତିକ କାର୍ଯ୍ୟକ୍ରମ ପରିବେଷଣ କରାଯାଇଥିଲା। ସମ୍ବର୍ଦ୍ଧନା କାର୍ଯ୍ୟକ୍ରମରେ ବିକାଶ ମଲ୍ଟି-ସ୍ପେଶାଲିଟି ହସ୍ପିଟାଲର ସିଇଓ ସି. ଏଚ୍. ରବି କୁମାର, ବରଗଡ଼ ସିମେଣ୍ଟ ନଗର ଇଂଲିଶ ମିଡିୟମ୍ ସ୍କୁଲର ଅଧ୍ୟକ୍ଷ ସନାତନ ମହାପାତ୍ର, ଡୁଙ୍ଗୁରୀ ସିମେଣ୍ଟ ନଗର ଇଂଲିଶ ମିଡିୟମ୍ ସ୍କୁଲର ଅଧ୍ୟକ୍ଷ ଗୁରୁଚରଣ ବାଗ, ବିକାଶ ଇନ୍ଷ୍ଟିଚ୍ୟୁଟ୍ ଫର୍ ସୋସିଆଲ୍ ୱେଲଫେୟାରର ଆଡ୍ମିନିଷ୍ଟ୍ରେଟିଭ ଇନ୍ଚାର୍ଜ ପ୍ରବୀଣ ଦୋରା, ଅଧ୍ୟକ୍ଷ ଡଃ ଡୋଲାମଣି ଶତପଥୀ, ବିକାଶ ଉଚ୍ଚ ମାଧ୍ୟମିକ ବିଦ୍ୟାଳୟର ଆଡ୍ମିନିଷ୍ଟ୍ରେଟିଭ ଅଫିସର ଏସ୍. କେ. ରାଓ, ବିକାଶ ଆବାସିକ ବିଦ୍ୟାଳୟର ଉପାଧ୍ୟକ୍ଷ ପ୍ରଦୀପ କୁମାର ସାହୁ ପ୍ରମୁଖ ଉପସ୍ଥିତ ଥିଲେ। ବିକାଶ ଉଚ୍ଚ ମାଧ୍ୟମିକ ବିଦ୍ୟାଳୟର ଅଧ୍ୟକ୍ଷ ନାରାୟଣ ରଥ ଧନ୍ୟବାଦ ଅର୍ପଣ କରିଥିଲେ। ସନ୍ଧ୍ୟାରେ ସାଂସ୍କୃତିକ କାର୍ଯ୍ୟକ୍ରମ ‘ଅଭିନୟ’ ପରିବେଷିତ ହୋଇଥିଲା।
