ନୂଆଦିଲ୍ଲୀ,୨୭।୧୦: ଭାରତ-ପାକିସ୍ତାନ ମଧ୍ୟରେ ଅକ୍ଟୋବର ୨୪ରେ ଟି-୨୦ ବିଶ୍ୱକପ୍ର ପ୍ରଥମ ମୁକାବିଲା ଖେଳାଯାଇଥିଲା। ଏଥିରେ ୧୦ ଉଇକେଟରେ ପରାଜିତ ହୋଇଥିଲା ଭାରତୀୟ ଟିମ୍। ପାକିସ୍ତାନ ଭାରତର ଚିର ପ୍ରତିନ୍ଦ୍ୱନ୍ଦ୍ୱୀ ହୋଇଥିବାରୁ ବିଜୟକୁ ନେଇ ପ୍ରଶଂସକଙ୍କ ମଧ୍ୟରେ ଜୋରଦାର କଥା କଟାକଟି ଦେଖିବାକୁ ମିଳୁଛି। ଏହି କ୍ରମରେ ଏବେ ଦୁଇ ପୂର୍ବ କ୍ରିକେଟରଙ୍କ ମଧ୍ୟରେ ଟୁଇଟର ଫାଇଟ୍ ଚର୍ଚ୍ଚାର ବିଷୟ ପାଲଟିଛି।
ପାକିସ୍ତାନର ପୂର୍ବତନ ଦ୍ରୁତ ବୋଲର ମହମ୍ମଦ ଆମିର ଭାରତର ପୂର୍ବତନ ସ୍ପିନର ହରଭଜନ ସିଂହଙ୍କ ପୁରୁଣା ମ୍ୟାଚ୍ର ଏକ ଭିଡିଓ ଟୁଇଟରରେ ଶେୟାର କରିଥିଲେ। ଉକ୍ତ ମ୍ୟାଚ୍ଟି ଭାରତ ପାକିସ୍ତାନ ମଧ୍ୟରେ ଥିଲା। ଭିଡିଓଟିରେ ଶାହିଦ ଆଫ୍ରିଦି(ଲାଲା) ହରଭଜନଙ୍କ ଚାରି ବଲ୍ରେ ଚାରିଟି ଛକା ମାରିଥିବା ଦେଖାଯାଇଥିଲା। ପାଖାପାଖି ୧୫ ବର୍ଷ ପୂର୍ବେ ଲାହୋରରେ ଖେଳାଯାଇଥିବା ଉକ୍ତ ମ୍ୟାଚ୍ର ଭିଡିଓ ଶେୟାର କରି ଆମିର ଲେଖିଥିଲେ, ‘ଭଜ୍ଜି ମୁଁ ଆପଣଙ୍କ ବୋଲିଂ ଦେଖିବାରେ ବ୍ୟସ୍ତ ଥିଲି, ଯେତେବେଳେ ଲାଲା ଚାରି ବଲ୍ରେ ଚାରି ଛକା ମାରିଥିଲେ। କ୍ରିକେଟରେ ଏପରି ହୁଏ, ହେଲେ ଟେଷ୍ଟ କ୍ରିକେଟରେ ଟିକେ ବେଶି ହୋଇଗଲା। ’ଏହାର ଜବାବରେ ହରଭଜନ କହିଥିଲେ, ଲଡ୍ସରେ ନୋ ବଲ୍ କିଭଳି ହୋଇଯାଇଥିଲା। କେତେ ନେଇଥିଲ, କିଏ ଦେଇଥିଲା। ଟେଷ୍ଟ କ୍ରିକେଟରେ ନୋ ବଲ୍ କିଭଳି ହୋଇପାରେ। ତୁମ ଉପରେ ଏବଂ ତୁମ ସମର୍ଥକଙ୍କ ଉପରେ ଲାଜ ଲାଗେ, ଯିଏ ଏହି ସୁନ୍ଦର ଖେଳକୁ ବରବାଦ କରୁଛନ୍ତି।
ହରଭଜନଙ୍କ ପ୍ରତିକ୍ରିୟା ପଢ଼ି ପୁଣି ଜବାବ ଦେଇଥିଲେ ଆମିର। ସେ ଟୁଇଟ୍ କରିଥିଲେ, ‘ହରଭଜନ, ପଛରେ ଲାଗିଲା କି, ଦୌଡ଼-ଦୌଡ଼ ଲାଲା ଆସିଲା’। ଏଭଳି ଅପଶବ୍ଦ ଶୁଣିବା ପରେ ହରଭଜନ ରାଗରେ ଲାଲ ହୋଇଯାଇଥିଲେ। ସେ ଆଉ ଏକ ଟୁଇଟ୍ କରି ଆମିରଙ୍କ ପୁରୁଣା ଦିନକୁ ମନେ ପକାଇଦେଇଥିଲେ। ଆମିର ସ୍ପଟ୍ ଫିକ୍ସିଂ ମାମଲାରେ ଛନ୍ଦି ହେବା ବେଳର ଫଟୋ ଶେୟାର କରି ହରଭଜନ କହିଥିଲେ, ଆମିର ତୁମ ଭଳି ଲୋକଙ୍କ ପାଇଁ କେବଳ ଟଙ୍କା, ଟଙ୍କା, ଟଙ୍କା… ନା ଇଜ୍ଜତ ନା ଆଉ କିଛି, କେବଳ ଟଙ୍କା। ଦେଶବାସୀ ଏବଂ ସମର୍ଥନଙ୍କୁ କୁହ ତୁମକୁ କେତେ ମିଳିଥିଲା। ତୁମ ଭଳି ଲୋକଙ୍କ ସହ କଥା ହେବାକୁ ମୋତେ ଘୃଣା ଲାଗେ। ତୁମେମାନେ ଏହି ଖେଳର ବେଜିତ କରିଛ। ନିଜ କୁକର୍ମ ଜରିଆରେ ଲୋକଙ୍କୁ ବୋକା ବନାଇଛ ବୋଲି ସେ କହିଥିଲେ। ଏବେ ଏହି କ୍ୟାଟ୍ଫାଇଟ୍ ବେଶ ଚର୍ଚ୍ଚାର ବିଷୟ ପାଲଟିଛି।
