ମୁମ୍ବାଇ: ବଲିଉଡ ରଙ୍ଗିଲା ଗର୍ଲ ଉର୍ମିଳା ମାତୋଣ୍ଡକର ୪୮ ବର୍ଷ ବୟସରେ ପଦାର୍ପଣ କରିଛନ୍ତି । ଫେବୃୟାରୀ ୪, ୧୯୭୪ରେ ମୁମ୍ବାଇରେ ଜନ୍ମ ନେଇଥିବା ଉର୍ମିଳା ଅଭିନୟ ସହ ରାଜନୀତିରେ ବି ନିଜର ଜଲୱା ଦେଖାଇ ଦେଇଛନ୍ତି । ଜଣେ ଶିଶୁ କଳାକାର ଭାବେ ପ୍ରଥମେ ଉର୍ମିଳା ତାଙ୍କ ଅଭିନୟ କ୍ୟାରିୟର ଆରମ୍ଭ କରିଥିଲେ । ଫିଲ୍ମ ‘ମାସୁମ’ରେ ସେ ଶିଶୁ କଳାବାର ଭାବେ ନଜର ଆସିଥିଲେ । ଏଥିରେ ତାଙ୍କ ଅଭିନୟକୁ ସମସ୍ତେ ଖୁବ୍ ପସନ୍ଦ କରିଥିଲେ । ଏଥିରେ ଥିବା ଗୀତ ‘ଲକଡି କି କାଡି କାଠି ପେ ଘୋଡା’ ହିଟ୍ ହେବା ପରେ ସେ ଷ୍ଟାର ପାଲଟି ଯାଇଥିଲେ ।
ଏହାପରେ ଉର୍ମିଳା ନିର୍ଦ୍ଦେଶକ ରାମ ଗୋପାଳ ବର୍ମାଙ୍କ ଫିଲ୍ମ ‘ରଙ୍ଗିଲା’ରେ ନଜର ଆସିଥିଲେ । ଏହା ବି ସୁପର ହିଟ୍ ହୋଇଥିଲା । ଏହାପରେ ସେ ପଡିଯାଇଥିଲେ ରାମ ଗୋପାଳ ବର୍ମାଙ୍କ ପ୍ରେମରେ । ତାଙ୍କ ନିର୍ଦ୍ଦେଶନାରେ ଅଭିନେତ୍ରୀ ସତ୍ୟା, ଭୁତ ଓ କୌନ ଭଳି ଫିଲ୍ମ କରିଥିଲେ ବି ତାହା ହିଟ୍ ହୋଇ ନ ଥିଲା । ଏପଟେ ପ୍ରେମରେ ପଡି ଉର୍ମିଳା ଧିରେ ଧିରେ ତାଙ୍କ କ୍ୟାରିୟରକୁ ନଷ୍ଟ କରି ଦେଇଥିଲେ ବୋଲି କୁହାଯାଏ । କାରଣ ରାମ ଗୋପାଳ ବର୍ମାଙ୍କ ସହ ରିଲେସନକୁ ନେଇ କେହି ନିର୍ଦ୍ଦେଶକ ତାଙ୍କୁ ଫିଲ୍ମରେ ସୁଯୋଗ ଦେବାକୁ ପଛଘୁଞ୍ଚା ଦେଇଥିଲେ । ତେବେ ଉଭୟ ନିଜର ରିଲେସନଶିପକୁ ନେଇ କେବେ ମୁହଁ ଖୋଲି ନାହାନ୍ତି । ଏମିତିକି କିଛିଦିନ ପରେ ଉଭୟ ଅଲଗା ହୋଇଯାଇଥିଲେ । ଏହାପରେ ଉର୍ମିଳା କଶ୍ମୀର ମଡେଲ ତଥା ବିଜନେସ ମ୍ୟାନ ମୋହସିନ ଅଖତର ମିରଙ୍କୁ ୨୦୧୬ରେ ବିବାହ କରିଥିଲେ । ଏବେ ଉର୍ମିଳା ବଲିଉଡଠାରୁ ଦୂରେଇ ଯାଇଥିବା ବେଳେ ସକ୍ରିୟ ରାଜନୀତିରେ ପାଦ ରଖିଛନ୍ତି ।
