ମୁମ୍ବାଇ: ବଲିଉଡରେ ଏବେ ବିବାହ ଋତୁ ଚାଲିଛି । ଜଣକ ପରେ ଜଣେ ସେଲିବ୍ରିଟି ବିବାହ ବନ୍ଧନରେ ବାନ୍ଧି ହେଉଛନ୍ତି । ଏହି କ୍ରମରେ ଏବେ ସବୁଠାରୁ ଆଗରେ ରହିଛନ୍ତି କିଆରା ଆଡଭାନୀ ଓ ସିଦ୍ଧାର୍ଥ ମାଲହୋତ୍ରା । ଏହି ଯୋଡି କେବେ ବିବାହ କରିବେ ତାହା ଜଣା ନ ଥିଲେ ବି ପ୍ରତିଦିନ ଏମାନଙ୍କ ରିଲେସନକୁ ନେଇ କିଛି ନା କିଛି ଖବର ସାମ୍ନାକୁ ଆସୁଛି । ତେବେ ବିବାହ ତାଲିକାରେ ଏବେ ଏଣ୍ଟ୍ରି ମାରିଛନ୍ତି ଅଭିନେତ୍ରୀ ହଂସିକା ମୋଟୱାନି । ହଂସିକାଙ୍କ ବିବାହ ପକ୍କା ହୋଇଯାଇଥିବା ଜଣାପଡିଛି । ଅଭିନେତ୍ରୀ ଚଳିତ ବର୍ଷ ବିବାହ କରିବେ ବୋଲି ଶୁଣାଯାଉଛି । ହେଲେ ହଂସିକାଙ୍କ ପକ୍ଷରୁ ଏ ନେଇ କୌଣସି ସ୍ପଷ୍ଟ ସୂଚନା ଦିଆଯାଇନାହିଁ । କିନ୍ତୁ ତାଙ୍କ ବିବାହକୁ ନେଇ କିଛି ଖବର ଏବେ ଶୁଣିବାକୁ ମିଳୁଛି ।
ହଂସିକା ଜୟପୁରରେ ଥିବା ୪୫୦ ବର୍ଷ ପୁରୁଣା ମୁଂଡୋତା କିଲାରେ ବିବାହ କରିବେ ବୋଲି କୁହାଯାଉଛି । ଆସନ୍ତା ଡିସେମ୍ବରରେ ସେ ଏହି କିଲାରେ ବିବାହ କରିବେ । ସେଥିପାଇଁ ଏବେଠାରୁ କୁଆଡେ ପ୍ରସ୍ତୁତି ଆରମ୍ଭ ହୋଇଗଲାଣି । ଖବର ଅନୁଯାୟୀ, ବିବାହର ସମସ୍ତ କାର୍ଯ୍ୟ ଏହି କିଲାରେ କରାଯିବ ବୋଲି କୁହାଯାଉଛି । ହଂସିକା ଜଣେ ବିଜନେସମ୍ୟାନଙ୍କୁ ବିବାହ କରୁଥିବା ଆଲୋଚନା ହେଉଛି । ଏବେ ପର୍ଯ୍ୟନ୍ତ ହଂସିକା ମୋଟୱାନିଙ୍କ ବିବାହ ତାରିଖ ସ୍ପଷ୍ଟହୋଇ ନ ଥିବା ବେଳେ ଡିସେମ୍ବରରେ ବିବାହ କରିବାକୁ ସେ ପ୍ରସ୍ତୁତ ହେଉଥିବା କୁହାଯାଉଛି । ସାଂସ୍କୃତିକ ଭାବେ ସମୃଦ୍ଧ ଜୟପୁର ସହରରେ ଅତିଥିମାନଙ୍କ ଆଗମନ ପାଇଁ ବହୁ ପୂର୍ବରୁ ସମସ୍ତ ବ୍ୟବସ୍ଥା କରାଯାଉଛି ।
ହଂସିକାଙ୍କ ସମ୍ପର୍କରେ କଥା ହେଲେ ଏହି ଅଭିନେତ୍ରୀ ଶିଶୁ କଳାକାର ଭାବେ ଶାକା ଲାକା ବୁମ ବୁମ, କ୍ୟୁଂକି ସାସ ଭି କଭି ବୋହୂ ଥି ଓ ସୋନ ପରି ଭଳି ଟେଲିଭିଜନ ଧାରାବାହିକରୁ କ୍ୟାରିୟର ଆରମ୍ଭ କରିଛନ୍ତି । ଏହାସହ ହ୍ରିତିକ ରୋଶନଙ୍କ ହିଟ୍ ମୁଭି କୋଇ ମିଲ ଗୟାରେ ବି ସେ ଅଭିନୟ କରିଛନ୍ତି । ଏହାପରେ ସେ ବଲିଉଡରେ ଆପ କା ସୁରୁର, ମନି ହୋ ତୋ ହନି ହୈ ଭଳି ଫିଲ୍ମରେ କାମ କରିବା ପରେ ସାଉଥ୍ ଇଣ୍ଡଷ୍ଟ୍ରିରେ ଧାମାଲ କରିଛନ୍ତି ।