କେନ୍ଦୁଝର,୧୮।୧୦(ନରେଶ ଚନ୍ଦ୍ର ପଟ୍ଟନାୟକ): କେନ୍ଦୁଝର ପୌରପାଳିକା ଅଧୀନ ଜିଲାପାଳଙ୍କ କାର୍ଯ୍ୟାଳୟଠାରୁ ଅନତି ଦୂର ସରକାରୀ ବସ୍ଷ୍ଟାଣ୍ଡ ପରିସରରେ ଥିବା ସୁଲଭ ଶୌଚାଳୟରେ ପାଣି ସମସ୍ୟା ଲାଗି ରହିଛି। ଫଳରେ ଦିନର ଅଧାରୁ ଅଧିକ ସମୟ କାମରେ ଲାଗୁ ନ ଥିବା ବେଳେ ଯାତ୍ରୀ ଓ ସ୍ଥାନୀୟ ଲୋକେ ହନ୍ତସନ୍ତ ହେଉଛନ୍ତି। ଏ ନେଇ ପୂର୍ବରୁ ବାରମ୍ବାର ଅଭିଯୋଗ ହୋଇଥିଲେ ବି ସମସ୍ୟାର ସମାଧାନ ହେଉ ନଥିବାରୁ ଅସନ୍ତୋଷ ବୃଦ୍ଧି ପାଉଛି।
ସୂଚନା ଅନୁଯାୟୀ, ଜିଲାପାଳଙ୍କ କାର୍ଯ୍ୟାଳୟ ନିକଟ ଛକରେ ସରକାରୀ ବସ୍ଷ୍ଟାଣ୍ଡ ବ୍ୟତିତ ଏକାଧିକ ଘରୋଇ ବସ୍ଷ୍ଟପ ରହିଛି। ଏଣୁ ଯାତ୍ରୀ ତଥା ଅନ୍ୟ ସ୍ଥାନୀୟ ଲୋକମାନେ ଏହି ଶୌଚାଳୟ ଉପରେ ନିର୍ଭର କରିଥାନ୍ତି। ଶୌଚାଳୟକୁ ଆଗରୁ ଘରୋଇ ସଂସ୍ଥା ପରିଚାଳନା କରୁଥିଲା। ଏବେ ପୌର ପ୍ରଶାସନ ଲୋକଙ୍କଠାରୁ ଫି ଆଦାୟ କରି ସେବା ଯୋଗାଇଆସୁଛି। ଏଠାରେ ସ୍ଥାୟୀ ପାଣି ସୁବିଧା ନ ଥିବାରୁ ଟ୍ୟାଙ୍କର ଯୋଗେ ପାଣି ଯୋଗାଣ ହେଉଥିଲା। ତେବେ କିଛି ମାସ ହେଲା ଟ୍ୟାଙ୍କର ପାଣି ଯୋଗାଣ ବନ୍ଦ ହୋଇଯାଇଥିବାରୁ ଅଧା ଦିନ ଶୌଚାଳୟ ବନ୍ଦ ରହୁଛି। ଯେବେ ପାଇପରେ ପାଣି ଆସୁଛି ଶୌଚାଳୟ କାର୍ଯ୍ୟକ୍ଷମ ହେଉଛି। ବିଶେଷତଃ ସକାଳୁ କିଛି ଘଣ୍ଟା ଜଳ ଯୋଗାଣ ହୋଇଥାଏ। ବିଦ୍ୟୁତ୍ କାଟ ହେଲେ ଜଳ ଯୋଗାଣ ବନ୍ଦ ପରେ ଅପେକ୍ଷା କରିଥିବା ଲୋକେ ଅକଥନୀୟ ଦୁର୍ଦ୍ଦଶା ଭୋଗୁଛନ୍ତି। ପାଖରେ ବିକଳ୍ପ ବ୍ୟବସ୍ଥା ନ ଥିବାରୁ ବିଶେଷ କରି ମହିଳାମାନେ ବହୁ ଅସୁବିଧାର ସମ୍ମୁଖୀନ ହେଉଛନ୍ତି। ଅନେକ ସମୟରେ ଅଯଥା ଖର୍ଚ୍ଚାନ୍ତ ହୋଇ ହୋଟେଲକୁ ଯିବାକୁ ବାଧ୍ୟ ହେଉଛନ୍ତି ବୋଲି ଜିଲା ମୁଖ୍ୟାଳୟକୁ କାମରେ ଆସି ହିନସ୍ତା ହୋଇଥିବା କରୁଣାକର ସାହୁ କହିଛନ୍ତି। ପୌରପାଳିକା ନିର୍ବାହୀ ଅଧିକାରିଣୀ ଡା. ମଧୁସ୍ମିତା ସାମାନ୍ତରାୟ କହିଛନ୍ତି, ତୁରନ୍ତ ପାଣି ସମସ୍ୟା ଦୂର କରାଯାଇ ଶୌଚାଳୟକୁ ପୂର୍ଣ୍ଣ କାର୍ଯ୍ୟକ୍ଷମ କରିବାକୁ ପଦକ୍ଷେପ ନିଆଯାଉଛି।
ଅନ୍ୟପକ୍ଷେ ୧୦ ଲକ୍ଷରୁ ଊର୍ଦ୍ଧ୍ୱ ବେୟରେ ଜିଲାପାଳଙ୍କ କାର୍ଯ୍ୟାଳୟ ପରିସରରେ ନିର୍ମାଣ ହୋଇଥିବା ଶୌଚାଳୟ ମଧ୍ୟ ରକ୍ଷଣାବେକ୍ଷଣ ଅଭାବରୁ ଶୋଚନୀୟ ହୋଇପଡ଼ିଛି। ପରିସରରେ ଅସ୍ବାସ୍ଥ୍ୟକର ପରିବେଶ ସୃଷ୍ଟି କରୁଥିବାରୁ ଏହାକୁ ଭାଙ୍ଗି ଦିଆଯାଉ, ନଚେତ କାର୍ଯ୍ୟକ୍ଷମ କରାଯାଉ ବୋଲି ପୂର୍ବତନ ବିଧାୟକ ସୁବର୍ଣ୍ଣ ନାୟକ ଦାବି କରିଛନ୍ତି।
