ଓ୍ବାଶିଂଟନ/ନୂଆଦିଲ୍ଲୀ, ୬।୧ : କେଶ ଝଡ଼ିବା ସମସ୍ୟା ଅତି ସାଧାରଣ। କିନ୍ତୁ ଏନେଇ ଏବେ ସାବଧାନ ରହିବାକୁ ପଡ଼ିବ। ଏହା କରୋନାର ନୂଆ ଭାରିଆଣ୍ଟ୍ ଓମିକ୍ରନ୍ରେ ଆକ୍ରାନ୍ତ ହେବାର ଲକ୍ଷଣ ବୋଲି ଡାକ୍ତରମାନେ ଚେତାବନୀ ଦେଇଛନ୍ତି। ନିକଟରେ ହୋଇଥିବା ଏକ ଗବେଷଣାରୁ ଏହା ଜଣାପଡିଛି। ସମସ୍ତଙ୍କୁ ଜଣା ଯେ କରୋନା ସଂକ୍ରମଣ ବିଶ୍ୱରେ ଦ୍ରୁତ ଗତିରେ ବ୍ୟାପିବାରେ ଲାଗିଛି।
ଏହାର ଲକ୍ଷଣ ମଧ୍ୟରେ, ଜ୍ୱର, କାଶ, ନିଶ୍ୱାସ ନେବାରେ ଅସୁବିଧା ଏବଂ ଗନ୍ଧ କିମ୍ବା ସ୍ବାଦର କ୍ଷମତା ନଷ୍ଟ ହେବା ଆଦି ରହିଛି। ଏପରିକି ଅନେକଙ୍କ କ୍ଷେତ୍ରରେ କୌଣସି ଲକ୍ଷଣ ମଧ୍ୟ ପ୍ରକାଶ ପାଇ ନ ଥାଏ। ମାତ୍ର ଗବେଷଣାରୁ ଜଣାପଡିଛି ଯେ କରୋନାର ଦୁଇଟି ନୂତନ ଲକ୍ଷଣ ଆକ୍ରାନ୍ତଙ୍କଠାରେ ଦେଖାଯାଉଛି ।
ଓମିକ୍ରନ୍ ଆକ୍ରାନ୍ତଙ୍କଠାରେ ‘ଲାଲ ରଙ୍ଗର ଆଖି’ ଅବା କେଶ ଝଡ଼ିବା ଲକ୍ଷଣ ଦେଖିବାକୁ ମିଳୁଛି ବୋଲି ଗଷେକ ସୂଚନା ଦେଇଛନ୍ତି। କରୋନା ଭୂତାଣୁ ଆଞ୍ଜିଓଟେନସିନ-କନଭର୍ଟିଙ୍ଗ ଏନଜାଇମ-୨ (ଏସିଇ-୨) ନାମକ ଏକ ଏନଜାଇମ ମାଧ୍ୟମରେ ସୁସ୍ଥ ଲୋକଙ୍କଠାରେ ପ୍ରବେଶ କରିଥାଏ। ଏଥି ସହିତ, ବର୍ତ୍ତମାନ ଡାକ୍ତରମାନେ ମଧ୍ୟ ସନ୍ଦେହ କରୁଛନ୍ତି ଯେ କରୋନା ଆଖି ମାଧ୍ୟମରେ ଶରୀରରେ ପ୍ରବେଶ କରୁଛି।
ବିଶେଷଜ୍ଞମାନେ କୁହନ୍ତି ଯେ ଯେତେବେଳେ କରୋନା ଏସିଇ-୨ ଏନଜାଇମ ମାଧ୍ୟମରେ ଶରୀରରେ ପ୍ରବେଶ କରେ ଏହାକୁ ଲୋକେ ଏକ ସାଧାରଣ ଭାଇରାଲ ସଂକ୍ରମଣ ବୋଲି ଭାବିଥାନ୍ତି। ରିପୋର୍ଟ ଅନୁଯାୟୀ, ଆଖିରେ ପ୍ରବେଶ କରିବା ପରେ କରୋନାଭାଇରସ ରେଟିନା ଏବଂ ଏପିଥେଲିଆଲ କୋଷିକା ସଂକ୍ରମିତ କରିଥାଏ। ଏହି ଉଭୟ କୋଷିକାଗୁଡ଼ିକ ଆଖିର ଅଂଶ ଏବଂ ଆଖିପତାକୁ ଧଳା କରିବା ପାଇଁ କାର୍ଯ୍ୟ କରିଥାନ୍ତି। ଏହା କରୋନାର ଏକ ନୂତନ ଲକ୍ଷଣ।
ଏହାଯୋଗୁ କେବଳ ଆଖି ଲାଲ ହୋଇଯାଏ ନାହିଁ, ବରଂ ଫୁଲିଯାଇ ଆଖିରୁ ପାଣି ବୋହିବା ସହିତ ଯନ୍ତ୍ରଣା ମଧ୍ୟ ଆରମ୍ଭ ହୋଇଥାଏ। କରୋନାର ଏହି ନୂତନ ଲକ୍ଷଣ ଉପରେ ବର୍ତ୍ତମାନ ଗବେଷଣା ଚାଲିଛି। ଆମେରିକୀୟ ଏକାଡେମୀ ଅଫ ଡର୍ମାଟୋଲୋଜି ଆସୋସିଏଶନ ପକ୍ଷରୁ ସୂଚନା ପ୍ରଦାନ କରାଯାଇଛି ଯେ, ଏହି ଲକ୍ଷଣ ଜ୍ୱର ଯୋଗୁ ମଧ୍ୟ ହୋଇପାରେ।
ଅପରପକ୍ଷରେ କେଶ ଝଡିବା ସାଧାରଣତ ଜ୍ୱର କିମ୍ବା ଅସୁସ୍ଥତା ଯୋଗୁ ୨-୩ ମାସ ପର୍ଯ୍ୟନ୍ତ ଲାଗି ରହିଥାଏ। କୌଣସି ଶାରୀରିକ ସମସ୍ୟା ନଥିଲେ ମଧ୍ୟ ସୁସ୍ଥ ଦେଖାଯାଉଥିଲେ ବି ଯଦି କେଶଝଡ଼ା ଲାଗି ରହିଛି ତେବେ ଏହା ଅଣଦେଖା ନ କରିବାକୁ ଗବେଷକ କହିଛନ୍ତି। ଏହା କରୋନା ଭୂତାଣୁ ସଂକ୍ରମଣର କାରଣ ମଧ୍ୟ ହୋଇପାରେ। ଏପରି ପରିସ୍ଥିତିରେ ତୁରନ୍ତ କରୋନା ପରୀକ୍ଷା କରିବା ଆବଶ୍ୟକ । କରୋନା ଚିକିତ୍ସା ପରେ ୬ ରୁ ୯ ମାସ ମଧ୍ୟରେ ଆକ୍ରାନ୍ତଙ୍କ କେଶ ଝଡ଼ିବା ବନ୍ଦ ହୋଇଯାଏ ବୋଲି ଗବେଷକ କହିଛନ୍ତି।
