ବ୍ରହ୍ମପୁର ଅଫିସ,୮ା୫: ବ୍ରହ୍ମପୁର ମହାନଗର ନିଗମ(ବିଇଏମ୍ସି) ପକ୍ଷରୁ ସହରର ସୌନ୍ଦର୍ଯ୍ୟକରଣ ଓ ଲୋକଙ୍କ ସୁବିଧା ପାଇଁ ବିଭିନ୍ନ ଉନ୍ନୟନମୂଳକ କାର୍ଯ୍ୟ କରାଯାଉଛି। କିନ୍ତୁ କେତେକ କାର୍ଯ୍ୟ ଠିକ ଭାବେ ହେଉ ନ ଥିବାରୁ ଅସନ୍ତୋଷ ପ୍ରକାଶ ପାଇଛି। ନିଗମ ପକ୍ଷରୁ ମୁଖ୍ୟମନ୍ତ୍ରୀଙ୍କ କର୍ମ ତପତ୍ରତା ଅଭିଯାନ(ମୁକ୍ତା)ଯୋଜନାରେ ସ୍ବୟଂ ସହାୟିକା ଗୋଷ୍ଠୀଗୁଡିକୁ ନିୟୋଜିତ କରାଯାଇଛି। ଏହି ଯୋଜନାର କାର୍ଯ୍ୟଗୁଡିକ ମଧ୍ୟରେ ଉଦ୍ୟାନ ସୌନ୍ଦର୍ଯ୍ୟକରଣ, ଶିଶୁ ଉଦ୍ୟାନ, ଚଲାପଥ, ମିନି ପାର୍କ, ମୁକ୍ତାକାଶ ଜିମ୍, ଖେଳ ପଡିଆ ଭଳି ୩୩୫ ବିଭିନ୍ନ ଉନ୍ନୟନମୂଳକ କାର୍ଯ୍ୟ କରାଯାଇଛି। ଏଥିପାଇଁ ନିଗମ ପକ୍ଷରୁ ୨୫ କୋଟି ୧୨ ଲକ୍ଷ ୬ ହଜାର ଟଙ୍କା ଖର୍ଚ୍ଚ କରାଯାଇଛି। କିନ୍ତୁ ଏବେ କେତେକ ସ୍ଥାନରେ ଉନ୍ନୟନମୂଳକ କାର୍ଯ୍ୟ ଅଧାପନ୍ତରିଆ ହୋଇ ରହିଥିବା ବେଳେ କେତେକ କ୍ଷେତ୍ରରେ କାର୍ଯ୍ୟ ଶେଷ ହୋଇଛି। ନିଗମ ପକ୍ଷରୁ ନିର୍ମାଣ କରାଯାଉଥିବା ମୁକ୍ତାକାଶ ଜିମ୍ ଗୁଡିକୁ ନେଇ ବିଭିନ୍ନ ମହଲରେ ଅସନ୍ତୋଷ ଦେଖିବାକୁ ମିଳିଛି। ଏଥିମଧ୍ୟରୁ ୩୦ ନଂ ୱାର୍ଡ ଅନ୍ତର୍ଗତ ନେହେରୁନଗର ମୁଖ୍ୟ ରାସ୍ତାରେ ବର୍ତ୍ତମାନ ଏକ ମୁକ୍ତାକାଶ ଜିମ୍ ନିର୍ମାଣ କାର୍ଯ୍ୟ କରାଯାଉଛି। ଗତ କିଛି ଦିନ ତଳେ ମହାନଗର ପକ୍ଷରୁ ଏହା ପାର୍ଶ୍ୱରେ ଥିବା ଡ୍ରେନ୍ କାର୍ଯ୍ୟ ସମ୍ପୂର୍ଣ୍ଣ କରାଯିବା ପରେ ଏହି ମୁକ୍ତାକାଶ ଜିମ୍ କାର୍ଯ୍ୟ ଆରମ୍ଭ ହୋଇଛି। କିନ୍ତୁ ନର୍ଦ୍ଦମା ପାର୍ଶ୍ୱ ଜିମ୍କୁ ନେଇ ସ୍ଥାନୀୟ ବାସିନ୍ଦାଙ୍କ ମଧ୍ୟରେ ଅସନ୍ତୋଷ ଦେଖାଦେଇଛି। ଡ୍ରେନ୍ ପାର୍ଶ୍ୱରେ ଜିମଟି ହେବା ଦ୍ୱାରା ବର୍ଷା ଦିନରେ ଏହା ସମସ୍ୟା ସୃଷ୍ଟି କରିବ। ଏଥିସହ ଡ୍ରେନ୍ ପାର୍ଶ୍ୱରେ ଥିବାରୁ ମଶା ମାଛି ସାଙ୍ଗକୁ ଦୁର୍ଗନ୍ଧ ପରିବେଶ ସୃଷ୍ଟି ହେଉଛି। ଯାହାଦ୍ୱାରା ବରିଷ୍ଠ ନାଗରିକଙ୍କଠାରୁ ଆରମ୍ଭ କରି ଯୁବ ପିଢିମାନେ ଜିମ୍କୁ ବ୍ୟବହାର କରିବାକୁ ଆଗ୍ରହ ପ୍ରକାଶ କରୁ ନାହାନ୍ତି। ଡ୍ରେନ୍ ପାର୍ଶ୍ୱରେ ଜିମ୍ ପରିବର୍ତ୍ତେ ଅନ୍ୟତ୍ର ସ୍ଥାନାନ୍ତର କରିବାକୁ ଦାବି ହୋଇଛି।
ଏ ନେଇ ଉକ୍ତ ୱାର୍ଡ ଦାୟତ୍ୱରେ ଥିବା କନିଷ୍ଠ ଯନ୍ତ୍ରୀ ସ୍ବପ୍ନା ସାହୁଙ୍କୁ ପଚାରିବରୁ ୫୦ ଫୁଟ ବିଶିଷ୍ଟ ଚଉଡା ରାସ୍ତାରେ ମୁକ୍ତାକାଶ ଜିମ୍ ତିଆରି ନିୟମ ରହିଛି। ଜିମ୍ ପାର୍ଶ୍ୱରେ ଥିବା ଡ୍ରେନ୍ ଉପରେ ଘୋଡଣି ପକାଯାଇଛି। ଆଗାମୀ ଦିନରେ ଏଠାରେ ପେବର ବ୍ଲକ ପକାଯିବ। ଯାହାଦ୍ୱାରା ମୁକ୍ତାକାଶ ଜିମ୍ ବ୍ୟବହାର କରିବା ପାଇଁ କୌଣସି ସମସ୍ୟା ହେବ ନାହିଁ ବୋଲି ସେ କହିଛନ୍ତି।
