ବ୍ରହ୍ମପୁର,୧୨ା୪(ସ୍ମୃତି ରଞ୍ଜନ ମହାଲିକ): ବ୍ରହ୍ମପୁର ମହାନଗର ନିଗମ (ବିଇଏମ୍ସି) ପକ୍ଷରୁ ମୁକ୍ତା ଯୋଜନାରେ ସହରର ବିକାଶ ଚାଲିଛି। ୨୦୨୨-୨୩ ଆର୍ଥିକ ବର୍ଷରେ ୨୨.୭୪କୋଟି ଟଙ୍କା ବ୍ୟୟରେ ଏହି ଯୋଜନାରେ ୧୬୩ ପ୍ରକଳ୍ପ କରାଯାଇଛି। ୨୦୨୩-୨୪ ଆର୍ଥିକ ବର୍ଷରେ ୩୪.୭୪ କୋଟି ଟଙ୍କା ବ୍ୟୟରେ ୩୯୫ ପ୍ରକଳ୍ପ ନିର୍ମାଣ ଲକ୍ଷ୍ୟ ରହିଛି। କିନ୍ତୁ ଏହି ଯୋଜନାର ଅନେକ ପ୍ରକଳ୍ପ ବିଭିନ୍ନ କାରଣରୁ କାର୍ଯ୍ୟରେ ଆସିପାରୁନାହିଁ। ବିଇଏମ୍ସି ୮ ନଂ. ୱାର୍ଡରେ ଥିବା ଏକ ମୁକ୍ତାକାଶ ଜିମ୍ର ଦୃଶ୍ୟ ଏହା ପ୍ରମାଣିତ କରୁଛି।
୮ ନଂ. ଓ୍ବାର୍ଡ ପାଟରାସାହି ତଥା ଆଗାସାହି ପ୍ରାଥମିକ ସ୍ବାସ୍ଥ୍ୟକେନ୍ଦ୍ର ପଛ ପାର୍ଶ୍ୱରେ ମୁକ୍ତା ଯୋଜନାରେ ଅଳ୍ପଦିନ ତଳେ ଏକ ମୁକ୍ତାକାଶ ଜିମ ନିର୍ମାଣ କରାଯାଇଛି। ୱାର୍ଡ ନଂ. ୭, ୮, ୯ ବାସିନ୍ଦା ଏହାକୁ ବ୍ୟବହାର କରପାରିବେ। ଏଠାରେ ୫ଟି ଜିମ୍ ସାମଗ୍ରୀ ରହିଛି। ହେଲେ ସକାଳୁ ସନ୍ଧ୍ୟା ପର୍ଯ୍ୟନ୍ତ ଏଠାରେ କୁଢ଼ କୁଢ଼ ଆବର୍ଜନା ପଡୁଛି। ଏହି ରାସ୍ତାଟି ସାନ ବଜାର ଛକକୁ ସଂଯୋଗ କରୁଛି। ଉକ୍ତ ରାସ୍ତା ଦେଇ ପ୍ରତ୍ୟହ ବହୁ ମାଲବାହୀ ଟ୍ରକ ଯିବା ଆସିବା କରୁଛି। ରାତିରେ ଉକ୍ତ ଅଞ୍ଚଳ ଗୋରୁଙ୍କ ବିଶ୍ରାମସ୍ଥଳ ପାଲଟୁଛି। କେବଳ ସେତିକି ନୁହେଁ, ନିକଟରେ କାୈଣସି ଶାୈଚାଳୟ ନ ଥିବାରୁ ବଜାରରୁ ଆସୁଥିବା ସାଧାରଣ ଲୋକେ ଏହି ସ୍ଥାନରେ ପରିସ୍ରା କରୁଛନ୍ତି। ଏଭଳି ଦୂଷିତ ପରିବେଶ ମଧ୍ୟରେ ଜିମ୍ ଥିବାରୁ ସ୍ଥାନୀୟ ବାସିନ୍ଦା ଏହାକୁ ବ୍ୟବହାର କରିବାକୁ ମୁହଁ ମୋଡୁଛନ୍ତି। ପୂର୍ବରୁ ଏହି ସ୍ଥାନଟି ଆବର୍ଜନାରେ ପରିପୂର୍ଣ୍ଣ ରହୁଥିଲା। ଏ ବାବଦରେ ସ୍ଥାନୀୟ ଲୋକ ପ୍ରତିନିଧି ଅବଗତ ଥାଇ ମଧ୍ୟ କିଭଳି ସେଠାରେ ମୁକ୍ତାକାଶ ଜିମ୍ ସ୍ଥାପନ କରାଗଲା ବୋଲି ସ୍ଥାନୀୟ ବାସିନ୍ଦା ପ୍ରଶ୍ନ କରିଛନ୍ତି। ଏହା ଠିକାଦାରୀ ଅନୁକମ୍ପା ଛଡା ଅନ୍ୟକିଛି ନୁହେଁ ବୋଲି କହିଛନ୍ତି। ସେଠାରେ ଯଦି ଆବର୍ଜନା ପଡେ ଏବଂ ଜିମ୍ ସାମଗ୍ରୀଗୁଡିକ ଅବ୍ୟବହୃତ ଭାବେ ପଡି ରହେ ଚୋରି ହେବା ସମ୍ଭାବନା ରହିଛି ବୋଲି ସାଧାରଣରେ ମତ ପ୍ରକାଶ ପାଇଛି। ତେଣୁ ଜିମ ସାମଗ୍ରୀ ଅନ୍ୟତ୍ର ସ୍ଥାନାନ୍ତର କରାଯାଉ ନଚେତ ଉକ୍ତ ସ୍ଥାନଟି ପରିସ୍କାର କରାଯାଉ ବୋଲି ଦାବି ହେଉଛି। ଏ ନେଇ କର୍ପୋରେଟର ଜେ ଶ୍ରୀନିବାସ ରାଓ କହିଛନ୍ତି, ଉକ୍ତ ସ୍ଥାନରେ ଷ୍ଟିଲ ଗ୍ରୀଲ କରାଯିବ। ରାସ୍ତା ମଧ୍ୟ ମରାମତି କରାଯାଇ ପେଭର ପକାଯିବ। ସେଠାରେ ଯେଭଳି ଆବର୍ଜନା ନ ପଡିବ ସେ ନେଇ ପଦକ୍ଷେପ ଗ୍ରହଣ କରାଯିବ ବୋଲି କହିଛନ୍ତି।
