ରାୟଗଡ଼ା ଅଫିସ/ଟିକିରି,୪ା୮(ଡି.ଏନ୍.ଏ.): ରାୟଗଡ଼ା ଜିଲା କାଶୀପୁର ବ୍ଲକର ବିଭିନ୍ନ ପଞ୍ଚାୟତରେ ଲୋକେ ଝାଡ଼ାବାନ୍ତିରେ ଆକ୍ରାନ୍ତ ହୋଇ ମୃତ୍ୟୁ ଘଟିବା ଚିନ୍ତାଜନକ ପରିସ୍ଥିତି ସୃଷ୍ଟି କରିଛି। ଏଭଳି ସ୍ଥିତିରେ ଝାଡ଼ାବାନ୍ତିକୁ ନେଇ ଅଞ୍ଚଳବାସୀଙ୍କ ମଧ୍ୟରେ ଅନ୍ଧବିଶ୍ୱାସ ଗମ୍ଭୀର ରୂପ ନେଇଛି। ବୁଧବାର ରାତିରେ ଝାଡ଼ିବାନ୍ତିରେ ସର୍ବାଧିକ ପ୍ରଭାବିତ ଦୁୁଡୁକାବାହାଲ ପଞ୍ଚାୟତର ଟିଟିଗୁଡ଼ା ଗ୍ରାମରେ ଗୁଣିଗାରେଡି ସନ୍ଦେହରେ ଜଣେ ବୃଦ୍ଧଙ୍କୁ ଗାଁ ଦାଣ୍ଡରେ ବାନ୍ଧି ପିଟିପିଟି ହତ୍ୟା କରାଯାଇଛି। ସେ ହେଲେ ଗାଁର ଦଇ ମାଝି। ଟିକିରି ଥାନାରେ ଗୁରୁବାର ଏ ନେଇ ଅଭିଯୋଗ ପରେ ପୋଲିସ ତଦନ୍ତ କରି ୬ ଅଭିଯୁକ୍ତଙ୍କୁ ଗିରଫ କରିଛି। ସେମାନେ ହେଲେ ଗାଁର ମାନୁ ମାଝି(୩୨), ଲମ୍ବୁ ମାଝି(୨୨), ଦିନା ମାଝି(୬୦), ନର ମାଝି(୭୦), ଭୀମ ମାଝି(୩୨) ଏବଂ ରଜୀବ ମାଝି(୨୮)।
ସୂଚନା ଅନୁଯାୟୀ, ରାତି ୧୦ଟା ବେଳେ ଖାଇବା ସମୟରେ ଗାଁର ୬ ବ୍ୟକ୍ତି ଦଇଙ୍କ ଘରକୁ ଆସିଥିଲେ। ଗୁଣିଗାରେଡି କରି ଲୋକଙ୍କୁ ଝାଡ଼ାବାନ୍ତି ହେଉଛି କହି ଦଇଙ୍କ ସମେତ ତାଙ୍କ ପୁଅ ଦୁର୍ଯ୍ୟଙ୍କୁ ଘରୁ ଘୋଷାଡ଼ି ନେଇଥିଲେ। ଉଭୟଙ୍କୁ ରାସ୍ତା ଉପରେ ବିଦ୍ୟୁତ୍ ଖୁଣ୍ଟରେ ବାନ୍ଧି ଦେଇଥିଲେ। ୨ ଘଣ୍ଟା ପରେ କୌଶଳକ୍ରମେ ଦୁର୍ଯ୍ୟ ଖସିଯିବାକୁ ଚେଷ୍ଟା କରିବା ସମୟରେ ତାଙ୍କୁ ଟାଙ୍ଗିଆରେ ଆକ୍ରମଣ କରିଥିଲେ। ତେବେ ଦୁର୍ଯ୍ୟ କୌଣସି ପ୍ରକାରେ ଜୀବନ ବଞ୍ଚାଇ ଚାଲିଯାଇଥିଲେ ମଧ୍ୟ ଗୋଇଠା, ବିଧା ମାଡ଼ରେ ବାପା ଦଇଙ୍କ ମୃତ୍ୟୁ ଘଟିିଛି। ଅନ୍ୟପକ୍ଷେ ପାହାଡ଼ ଡେଇଁ ରାତି ୨ ଟା ଦୁର୍ଯ୍ୟ ଟିକିରି ଥାନାରେ ପହଞ୍ଚିଥିଲେ। ପୋଲିସ ତାଙ୍କୁ ଚିକିତ୍ସା ପାଇଁ ଡାକ୍ତରଖାନାରେ ଭର୍ତ୍ତି କରିଥିଲା। ଗୁରୁବାର ଦୁର୍ଯ୍ୟ ସାମାନ୍ୟ ସୁସ୍ଥ ହେବାପରେ ଥାନାରେ ଏତଲା ଦେଇଥିଲେ। ଏ ନେଇ ପୋଲିସ ୧୦୯/୨୨ରେ ଏକ ମାମଲା ରୁଜୁ କରିଛି।
