ନୂଆଦିଲ୍ଲୀ,୩।୮: ଦେଶରେ ଅଗଷ୍ଟ-୧ରୁ ଅନ୍ଲକ-୩ ଆରମ୍ଭ ହୋଇଛି। ଏଥିରେ ପୂର୍ବରୁ ଲାଗୁ ହୋଇଥିବା କେତେକ କଟକଣା ଉପରେ କେନ୍ଦ୍ରସରକାର କୋହଳ କରିଛନ୍ତି। ସେଥିମଧ୍ୟରୁ ଯୋଗ କେନ୍ଦ୍ର ଓ ଜିମ୍ ସାମିଲ ରହିଛି। ଅଗଷ୍ଟ ୫ରୁ ଦେଶରେ ପୁଣି ଯୋଗ କେନ୍ଦ୍ର ଓ ଜିମ୍ ଖୋଲିବା ପାଇଁ ସରକାର ଅନୁମତି ଦେଇଛନ୍ତି। ସୋମବାର ଏନେଇ କେନ୍ଦ୍ର ସ୍ବାସ୍ଥ୍ୟ ଓ ପରିବାର କଲ୍ୟାଣ ପକ୍ଷରୁ ଗାଇଡ୍ଲାଇନ ଜାରି କରାଯାଇଛି। ଏହି ଗାଇଡ୍ଲାଇନ ଅନୁସାରେ କଣ୍ଟେନମେଣ୍ଟ ଜୋନରେ ଥିବା ଯୋଗ କେନ୍ଦ୍ର ଓ ଜିମ୍କୁ ଖୋଲାଯିବ ନାହିଁ। ଏଥିସହ ୬୫ ବର୍ଷରୁ ଉର୍ଦ୍ଧ୍ୱ ବ୍ୟକ୍ତି, ଗର୍ଭବତୀ ମହିଳା, ଏକାଧିକ ରୋଗ ଥିବା ବ୍ୟକ୍ତି ଓ ୧୦ ବର୍ଷରୁ କମ୍ ବୟସ୍କ ପିଲାମାନଙ୍କୁ ଜିମ୍ ଓ ଯୋଗକେନ୍ଦ୍ରକୁ ଯିବା ପାଇଁ ବାରଣ କରାଯାଇଛି। ସୁରକ୍ଷା ଦୃଷ୍ଟିରୁ ଯେତେଦୂର ସମ୍ଭବ ବ୍ୟକ୍ତିମାନେ ପରସ୍ପରଠାରୁ ଅତିକମ୍ରେ ୬ ଫୁଟ ଦୂରତ୍ୱ ବଜାୟ ରଖିବା ଉଚିତ ବୋଲି ଉକ୍ତ ଗାଇଡ୍ଲାଇନରେ ଦର୍ଶାଯାଇଛି। ସେହିପରି ମାସ୍କ ଓ ଫେସ୍ କଭର ପିନ୍ଧିବା ବାଧ୍ୟତାମୂଳକ କରାଯାଇଛି। କିନ୍ତୁ ବ୍ୟାୟାମ କରିବା ସମୟରେ ଯେଉଁମାନେ ଶ୍ବାସକ୍ରିୟାରେ କଷ୍ଟ ଅନୁଭବ କରନ୍ତି ସେମାନେ ପ୍ରତିରକ୍ଷାମୂଳକ ଭାବେ ‘ଭାଇଜର୍’ ପିନ୍ଧିପାରିବେ। ସେହିଭଳି ବାରମ୍ବାର ହାତ ଧୋଇବା ଓ ହ୍ୟାଣ୍ଡ ସାନିଟାଇଜର୍ ବ୍ୟବହାର କରିବା ସହ ଆରୋଗ୍ୟ ସେତୁ ଆପ୍ ଡାଉନଲୋଡ କରିବା ଭଳି ନିୟମକୁ ବାଧ୍ୟତାମୂଳକ କରାଯାଇଛି।
