କୋକସରା, ୨୫।୧୧ (ଡି.ଏନ.ଏ)-ଶୀତୁଆ ସକାଳରେ ଶୀତର ମଜା ନେବା ସହ ପ୍ରକୃତି ରାଣୀ କୋଳରେ ଦିନ ଟିଏ ବିତାଇବାକୁ କିଏ ବା ନ ଚାହେଁ। ତେବେ ଆଜିକୁ ପ୍ରାୟ ୭ ମାସରୁ ଊର୍ଦ୍ଧ ହେବ ଲୋକେ କୋଭିଡ କଟକଣା ଯୋଗୁ ଘରୁ ଗୋଡ କାଢୁ ନାହାନ୍ତି। ଏଣେ ପର୍ଯ୍ୟଟକଙ୍କ ବିନା ଖାଁ ଖାଁ ଲାଗୁଛି ପର୍ଯ୍ୟଟନସ୍ଥଳି ଗୁଡିକ। କଳାହାଣ୍ଡିର ଅନ୍ୟତମ ପ୍ରକୃତିକୋଳରେ ଥିବା ପର୍ଯ୍ୟଟନସ୍ଥଳି ହେଉଛି ଗୁଡହାଣ୍ଡି ଡୋକରୀଚଞ୍ଚରା। କୋକସରା ବ୍ଲକ ଡୁଡୁକାଠେଙ୍ଗା ପଞ୍ଚାୟତ ଅନ୍ତର୍ଗତ ସାହାଜଖୋଲ ଜଙ୍ଗଲ ମଧ୍ୟରେ ଥିବା ଗୁଡହାଣ୍ଡି ଡୋକରୀ ଚଞ୍ଚରାରେ ବର୍ଷସାରା ପର୍ଯ୍ୟଟକଙ୍କ ଭିଡ ହୋଇଥାଏ। କୋଭିଡ କଟକଣା ଯୋଗୁ ଦୀର୍ଘ ମାସ ହେବ କୌଣସି ପର୍ଯ୍ୟଟକଙ୍କ ପାଦ ପଡିନାହିଁ। ପ୍ରାୟତଃ ବର୍ଷର ସେପ୍ଟେମ୍ବରରୁ ଜାନୁୟାରୀ ମାସ ପର୍ଯ୍ୟନ୍ତ ବଣଭୋଜି ପାଇଁ ପିକ୍ନିକ୍ କରିବାକୁ ରାଜ୍ୟ ତଥା ରାଜ୍ୟ ବାହାରୁ ଶହଶହ ସଂଖ୍ୟକ ପର୍ଯ୍ୟଟକଙ୍କ ଭିଡ ଲାଗିରୁହେ। ଏହା ବ୍ୟତୀତ ଏହି ପର୍ଯ୍ୟଟନରେ ରହିଛି ମଧୁମାଧବ ତୀର୍ଥ, ପ୍ରତିବର୍ଷ ରାମନବମୀ ସମୟରେ ଏଠାରେ ୭ଦିନ ଧରି ପ୍ରଭୂ ଶ୍ରୀ ରାମଚନ୍ଦ୍ରଙ୍କ ପୂଜାର୍ଚ୍ଚନା ହୋଇଥାଏ । ଏହି ସମୟରେ ମଧ୍ୟ ହଜାର ହଜାର ଶ୍ରଦ୍ଧାଳୁଙ୍କ ଭିଡ ହୁଏ । ତେବେ କରୋନା ଯୋଗୁ କେହି ଶ୍ରଦ୍ଧାଳୁ କିମ୍ବା ପର୍ଯ୍ୟଟକ ଆସି ନାହାଁନ୍ତି। ଝରଣାର କୁଳୁକୁଳୁ ନାଦ ସହ ଚଢେଇମାନଙ୍କ କିଚିରି ମିଚିରି ଶଦ୍ଦ ଭିତରେ ନିରବି ଯାଇଛି ପରିବେଶ। କେବେ କୋଭିଡ କଟକଣା ହଟିବ ଓ ପୁଣି କେବେ ପର୍ଯ୍ୟଟକଙ୍କ କୋଳାହଲରେ ଗୁଞ୍ଜରିତ ହେବ ଏହି ନିରବି ଯାଇଥିବା ପରିବେଶ ତାହାକୁ ହିଁ ଅପେକ୍ଷା ।
