ନୂଆଦିଲ୍ଲୀ,୧୯।୫: ଦ୍ରବ୍ୟ ଓ ସେବା ଟିକସ (ଜିଏସ୍ଟି) ବ୍ୟାପାରରେ ଆଇନ ପ୍ରଣୟନ କରିବା କ୍ଷମତା ଉଭୟ କେନ୍ଦ୍ର ଓ ରାଜ୍ୟ ସରକାରଙ୍କର ରହିଛି। ଜିଏସ୍ଟି କାଉନସିଲର ସମସ୍ତ ସୁପାରିସକୁ ରାଜ୍ୟଗୁଡ଼ିକ ଗ୍ରହଣ କରିବାକୁ ବାଧ୍ୟ ନୁହନ୍ତି। ତେବେ ଏହାର କେବଳ ପ୍ରେରଣାଦାୟକ ମୂଲ୍ୟ ରହିବ ବୋଲି ସୁପ୍ରିମକୋର୍ଟ ଗୁରୁବାର କହିଛନ୍ତି। ଜଷ୍ଟିସ୍ ଡି.ଓ୍ବାଇ. ଚନ୍ଦ୍ରଚୂଡ଼ଙ୍କ ଅଧ୍ୟକ୍ଷତାରେ ଗଠିତ ଖଣ୍ଡପୀଠ କହିଥିଲେ, ଏହା ଟିକସ ସମ୍ପର୍କିତ ବ୍ୟାପାର ହୋଇଥିବାରୁ ଆଇନ ପ୍ରଣୟନ କରିବା କ୍ଷମତା ଉଭୟ କେନ୍ଦ୍ର ଓ ରାଜ୍ୟ ସରକାରଙ୍କର ରହିଛି। ଏକ ବ୍ୟବହାରିକ ସମାଧାନରେ ପହଞ୍ଚତ୍ବା ଲାଗି ସୌହାର୍ଦ୍ଦ୍ୟପୂର୍ବକ କାର୍ଯ୍ୟ କରିବା ଲାଗି ଜିଏସ୍ଟି କାଉନସିଲ୍ର ଆବଶ୍ୟକତା ରହିଛି। ଗୁଜରାଟ ହାଇକୋର୍ଟଙ୍କ ରାୟ ବିରୋଧରେ ହୋଇଥିବା ପିଟିଶନର ବିଚାର ବେଳେ ଖଣ୍ଡପୀଠ ଭାରତୀୟ ସଂଘୀୟବାଦ ଉପରେ ଗୁରୁତ୍ୱ ଦେଇଥିଲେ। ଆମଦାନିକାରୀଙ୍କ ସାମଗ୍ରୀ ଉପରେ ସମନ୍ବିତ ଦ୍ରବ୍ୟ ଓ ସେବା କର (ଆଇଜିଏସ୍ଟି) ଲଗାଇବା ପାଇଁ କେନ୍ଦ୍ର ସରକାରଙ୍କ ବିଜ୍ଞପ୍ତିକୁ ହାଇକୋର୍ଟ ଖାରଜ କରିଦେଇଥିଲେ। ସର୍ବୋଚ୍ଚ ଅଦାଲତ ଉକ୍ତ ରାୟକୁ କାଏମ ରଖିଛନ୍ତି।
