ନୂଆଦିଲ୍ଲୀ,୨୯।୧୧ : କଲେଜିୟମ ପ୍ରସଙ୍ଗରେ ସରକାର ଏବଂ ସୁପ୍ରିମକୋର୍ଟ କଲେଜିୟମ ମଧ୍ୟରେ ବିବାଦ ଜାରି ରହିଛି। ସେପଟେ ସୁପ୍ରିମକୋର୍ଟ କଲେଜିୟମରୁ ହାଇକୋର୍ଟର ବିଚାରପତିଙ୍କ ନିଯୁକ୍ତି ସହ ଜଡିତ ୨୦ ଟି ଫାଇଲ ସରକାର ଫେରସ୍ତ କରିଥିବା ଜଣାପଡିଛି। ସରକାରଙ୍କ ପକ୍ଷରୁ ଏହା ମଧ୍ୟ କୂହାଯାଇଛି ଯେ କଲେଜିୟମ ଏଗୁଡିକର ପୁନର୍ବିଚାର କରିବା ଉଚିତ। ଏହି ଫାଇଲଗୁଡ଼ିକରେ ଆଡଭୋକେଟ ସୌରଭ ର୍କିପାଲଙ୍କ ନିଯୁକ୍ତି ଫାଇଲ ମଧ୍ୟ ଅନ୍ତର୍ଭୁକ୍ତ। ନିକଟରେ ସେ ନିଜେ ସମଲିଙ୍ଗୀ ହେବା ବିଷୟରେ ଖୋଲାଖୋଲି ଭାବେ କହିଥିଲେ।
ସୁପ୍ରିମକୋର୍ଟ ଏବଂ ହାଇକୋର୍ଟର ବିଚାରପତିଙ୍କ ନିଯୁକ୍ତି ପ୍ରକ୍ରିୟା ସହ ଜଡିତ ସୂତ୍ରରୁ ପ୍ରକାଶ ଯେ ସରକାର ନଭେମ୍ବର ୨୫ ରେ ଫାଇଲଗୁଡ଼ିକୁ କଲେଜିୟମକୁ ପଠାଇ ଦେଇଛନ୍ତି। କେବଳ ଏତିକି ନୁହେଁ, ସୁପାରିଶ କରାଯାଇଥିବା ନାମଗୁଡ଼ିକ ଉପରେ ଦୃଢ଼ ଆପତ୍ତି ମଧ୍ୟ ପ୍ରକାଶ କରାଯାଇଥିଲା। ଏହି ୨୦ ଟି ଫାଇଲ ମଧ୍ୟରୁ ୧୧ ଟି ନୂଆ ଫାଇଲ ଏବଂ ୯ ଟି ସୁପ୍ରିମକୋର୍ଟ କଲେଜିୟମ ଦ୍ୱାରା ପୁଣି ପଠାଯାଇଥିବା ଫାଇଲ ଥିଲା।
ବାସ୍ତବରେ ସୁପ୍ରିମକୋର୍ଟର ତତ୍କାଳୀନ ପ୍ରଧାନ ବିଚାରପତି ଏନ.ଭି ରମନାଙ୍କ ନେତୃତ୍ୱରେ ହୋଇଥିବା କଲେଜିୟମ ଆଡଭୋକେଟ ସୌରଭ ର୍କିପାଲଙ୍କୁ ଦିଲ୍ଲୀ ହାଇକୋର୍ଟରେ ବିଚାରପତି ଭାବରେ ନିଯୁକ୍ତ କରିବାକୁ ସୁପାରିଶ କରିଥିଲା। ସୌରଭ ର୍କିପାଲ ହେଉଛନ୍ତି ଭାରତର ପୂର୍ବତନ ପ୍ରଧାନ ବିଚାରପତି ବି.ଏନ ର୍କିପାଲଙ୍କ ପୁଅ। ଅକ୍ଟୋବର ୨୦୧୭ରେ ଦିଲ୍ଲୀ ହାଇକୋର୍ଟ କଲେଜିୟମ ଦ୍ୱାରା ର୍କିପାଲଙ୍କ ନାମ ସୁପ୍ରିମକୋର୍ଟ କଲେଜିୟମକୁ ପଠାଯାଇଥିଲା। କିନ୍ତୁ, ସୁପ୍ରିମକୋର୍ଟ କଲେଜିୟମ ର୍କିପାଲଙ୍କ ନାମ ବିଚାରକୁ ତିନିଥର ସ୍ଥଗିତ ରଖିଛନ୍ତି।
