ନୂଆଦିଲ୍ଲୀ,୧୯।୧୨ : ଅର୍ଥମନ୍ତ୍ରୀ ନିର୍ମଳା ସୀତାରମଣ କହିଛନ୍ତି ଯେ ପେଟେଣ୍ଟ ପାଇଁ ଦାଖଲ ହୋଇଥିବା ଆବେଦନଗୁଡିକର ଅନୁମୋଦନ ସମୟକୁ ଆହୁରି ହ୍ରାସ କରିବାକୁ କେନ୍ଦ୍ର ସରକାର ଉଦ୍ୟମ କରୁଛନ୍ତି। ଏହାକୁ ୭୨ମାସରୁ ୧୨ ରୁ ୨୪ ମାସକୁ ହ୍ରାସ କରାଯାଇସାରିଛି। ତେବେ ପୁଣି ଏହାକୁ କମ କରାଯିବାର ଯୋଜନା ରହିଛି। ଏକ କାର୍ଯ୍ୟକ୍ରମରେ କହିଛନ୍ତି ଯେ ପେଟେଣ୍ଟ ପାଇଁ ଘରୋଇ ଆବେଦନ ବୃଦ୍ଧି ପାଇବାରେ ଲାଗିଛି ଏବଂ ୨୦୨୧ ମସିହାରେ ମୋଟ ୫୮,୫୦୨ ଆବେଦନ କରାଯାଇଥିବାବେଳେ ୨୮,୩୯୧ଟି ମଞ୍ଜୁର ହୋଇଛି।
ଯେତେବେଳେ ୨୦୧୬ ରେ ଷ୍ଟାର୍ଟ ଅପ ନୀତି ଘୋଷଣା କରାଯାଇଥିଲା, ସେତେବେଳେ ଷ୍ଟାର୍ଟଅପଗୁଡ଼ିକୁ ପେଟେଣ୍ଟ ଆବେଦନ କରିବାରେ ସାହାଯ୍ୟ କରିବାକୁ ଅନେକ ନୀତି ଅଣାଯାଇଥିଲା। ୨୦୧୬ରେ, ଏକ ପେଟେଣ୍ଟ ଅନୁମୋଦନ ପାଇଁ ୭୨ ମାସ ସମୟ ଲାଗୁଥିଲା। ଡିସେମ୍ବର ୨୦୨୦ ପର୍ଯ୍ୟନ୍ତ ଶେଷ ଆକଳନ ଅନୁଯାୟୀ, ଅନୁମୋଦନ ସମୟ ୧୨ ମାସକୁ ଖସି ଆସିଛି, କେତେକ କ୍ଷେତ୍ରରେ ଏହା ୨୪ମାସ ମଧ୍ୟ ରହିଛି। ତେବେ ଆମେ ଏହାକୁ ଆହୁରି ହ୍ରାସ କରିବାକୁ ଚେଷ୍ଟା କରୁଛୁ ବୋଲି ସେ ସୂଚନା ଦେଇଛନ୍ତି।
