ବରଗଡ଼,୨୭।୬(ପ୍ରେମାନନ୍ଦ ଖମାରୀ): ବରଗଡ଼ ସହର ମଧ୍ୟରେ ରହିଥିବା ସରକାରୀ ବସଷ୍ଟାଣ୍ଡ ସାମାନ୍ୟ ବର୍ଷାରେ ବେହାଲ ହୋଇପଡିଛି। ପ୍ରତିବର୍ଷ ବର୍ଷାଦିନେ ବସଷ୍ଟାଣ୍ଡରେ ଏଭଳି ସମସ୍ୟା ଲାଗି ରହିଥିବାବେଳେ ଏପର୍ଯ୍ୟନ୍ତ ତାର କିଛି ସମାଧାନ କରା ନ ଯିବା ବିଭାଗୀୟ ଅପାରଗତାକୁ ପଦାରେ ପକାଇ ଦେଇଛି। ବସଷ୍ଟାଣ୍ଡରେ ଜଳ ନିଷ୍କାସନ ବ୍ୟବସ୍ଥା ଠିକ୍ ନ ଥିବା ଯୋଗୁ ଏଭଳି ସମସ୍ୟା ସୃଷ୍ଟି ହେଉଥିବାବେଳେ ଏଥିପାଇଁ ଯାତ୍ରୀଙ୍କୁ ହଟହଟାର ସମ୍ମୁଖୀନ ହେବାକୁ ପଡ଼ୁଛି। ସହର ସୌନ୍ଦର୍ଯ୍ୟକରଣକୁ ଗୁରୁତ୍ୱ ଦିଆଯାଉଥିବା ନେଇ ପ୍ରଶାସନ କହୁଥିବାବେଳେ ସାମାନ୍ୟ ବର୍ଷାରେ ସ୍ଥାନୀୟ ସରକାରୀ ବସଷ୍ଟାଣ୍ଡରୁ ସହରର ସୌନ୍ଦର୍ଯ୍ୟକରଣ ସ୍ପଷ୍ଟ ବାରି ହୋଇ ପଡ଼ୁଛି ବୋଲି ସ୍ଥାନୀୟ ଲୋକ ଏବଂ ବସ୍ ଯାତ୍ରୀମାନେ କହିଛନ୍ତି ।
ରବଗଡ଼ ବସଷ୍ଟାଣ୍ଡରୁ ସମ୍ବଲପୁରକୁ ପ୍ରତିଦିନ ସିଟି ବସ୍ ଯାତାୟାତ କରୁଛି। ସେହିପରି ସରକାରୀ ବସ୍ଗୁଡ଼ିକ ଏଠାରୁ ଜିଲା ବାହାରକୁ ମଧ୍ୟ ଯାଉଛି। ଫଳରେ ବସଷ୍ଟାଣ୍ଡ ଉପରେ ନିୟମିତ ବହୁସଂଖ୍ୟକ ଯାତ୍ରୀ ନିର୍ଭର କରିଥାନ୍ତି। ବସଷ୍ଟାଣ୍ଡ ପରିସରରେ ରହିଥିବା ଶୌଚାଳୟରେ ବର୍ଷ ବର୍ଷ ଧରି ତାଲା ଝୁଲୁଛି । ଅନ୍ୟପଟେ ସେହି ଶୌଚାଳୟ ଦେଇ ସଙ୍କୁଚିତ ଡ୍ରେନେଜ ବ୍ୟବସ୍ଥା ରହିଥିବାବେଳେ ବର୍ଷାରେ ବସଷ୍ଟାଣ୍ଡ ପରିସରରେ ଜମୁଥିବା ପାଣି ନିଷ୍କାସନ ହୋଇପାରୁନାହିଁ। ଫଳରେ ବସଷ୍ଟାଣ୍ଡ ଜଳାର୍ଣ୍ଣବ ହୋଇ ପଡ଼ୁଛି। ଏଭଳି ସ୍ଥିତିରେ ଯାତ୍ରୀମାନେ ବସ୍ରୁ ଓହ୍ଲାଇବା କିମ୍ବା ବସ୍କୁ ଚଢ଼ିବା ସମୟରେ ଅସୁବିଧାର ସମ୍ମୁଖୀନ ହେଉଛନ୍ତି । ତେବେ ସହରର ପ୍ରମୁଖ ପେଣ୍ଠସ୍ଥଳୀରେ ଏହି ବସଷ୍ଟାଣ୍ଡ ଥିବାବେଳେ ଉକ୍ତ ସମସ୍ୟା ସ୍ଥାନୀୟ ଜନ ପ୍ରତିନିଧି, ପ୍ରଶାସନକୁ ଅଛପା ରହିନାହିଁ । ଏହାସତ୍ତ୍ବେ ଏଭଳି ଏକ ପ୍ରମୁଖ ସମସ୍ୟା ପ୍ରତି ସଭିଁଏ ଆଖି ବୁଜିଦେବା ଘଟଣା ଏଠାରେ ଚର୍ଚ୍ଚାର ବିଷୟ ହୋଇଛି।
