ନୂଆଦିଲ୍ଲୀ, ୨୬ା୪ (ପି.ଟି.)-ଭାରତୀୟ ବକ୍ସର ଅମିତ ପଙ୍ଘାଲ (୫୨କେଜି) ସେଣ୍ଟ ପିଟରବର୍ଗସଠାରେ ଚାଲିଥିବା ଗଭର୍ନର୍ସ କପ୍ ବକ୍ସିଂ ପ୍ରତିଯୋଗିତାରେ ବ୍ରୋଞ୍ଜ ପଦକ ପାଇଛନ୍ତି। ସେମିଫାଇନାଲରେ ବିଶ୍ୱ ତଥା ଅଲିମ୍ପିକ ଚାମ୍ପିୟନ ଉଜବେକିସ୍ତାନର ସାଖୋବିଦ୍ଦିନ ଜୋଇରୋଭଙ୍କଠାରୁ ସେ ୫-୦ରେ ହାରିଯାଇଛନ୍ତି। ୨୦୧୯ ବିଶ୍ୱ ଚାମ୍ପିୟନଶିପ୍ ପରେ ଜୋଇରୋଭଙ୍କ ବିପକ୍ଷରେ ଭାରତୀୟ ବକ୍ସରଙ୍କ ଏହା ହେଉଛି ଦ୍ୱିତୀୟ ପରାଜୟ। ଚାମ୍ପିୟନଶିପ୍ର ଫାଇନାଲରେ ସେ ପରାଜିତ ହୋଇଯାଇଥିଲେ। ଜୁଲାଇ-ଅଗଷ୍ଟରେ ହେବାକୁଥିବା ଟୋକିଓ ଗେମ୍ସରେ ଉଭୟ ବକ୍ସର ଅଂଶଗ୍ରହଣ କରିବେ। ସୂଚନାଯୋଗ୍ୟ, ଚଳିତବର୍ଷ ପ୍ରଥମ ଭାଗରେ ବୁଲ୍ଗେରିଆରେ ଅନୁଷ୍ଠିତ ଷ୍ଟ୍ରାଣ୍ଡ୍ଜା ମେମୋରିଆଲ ଟୁର୍ନାମେଣ୍ଟରେ ଜୋଇରୋଭଙ୍କୁ ଭାରତର ଅନ୍ୟ ଜଣେ ବକ୍ସର ଦୀପକ କୁମାର ହରାଇ ଦେଇଥିଲେ। ଅମିତ ଜଣେମାତ୍ର ଭାରତୀୟ ଭାବେ ଗଭର୍ନର୍ସ କପ୍ରେ ପଦକ ପର୍ଯ୍ୟାୟକୁ ଉନ୍ନୀତ ହୋଇଥିଲେ। ଅଲିମ୍ପିକ ଯୋଗ୍ୟତା ହାସଲ କରିଥିବା ଆଶିଷ କୁମାର (୭୫କେଜି) ଓ ସୁମିତ ସାଙ୍ଗଓ୍ବାନ (୮୧କେଜି) ପ୍ରଥମ ପର୍ଯ୍ୟାୟରୁ ବିଦାୟ ନେଇସାରିଛନ୍ତି। ଅଲିମ୍ପିକ୍ସରେ ଯଦିଓ ପ୍ରଥମ ଥର ପଦାର୍ପଣ କରିବାକୁ ଯାଉଛନ୍ତି ଟୋକିଓରେ ହରିୟାଣାର ଏହି ବକ୍ସର ପଦକ ଦାବିଦାର ବୋଲି ବିବେଚନା କରାଯାଉଛି। ଗତ ୩ ବର୍ଷ ହେଲା ସେ ଭଲ ପ୍ରଦର୍ଶନ କରିଆସୁଛନ୍ତି। ଏସିଆନ ଗେମ୍ସ ଓ ଏସିଆନ ଚାମ୍ପିୟନଶିପ୍ରେ ସେ ସ୍ବର୍ଣ୍ଣ ପଦକ ଜିତିପାରିଛନ୍ତି। ୨୦୧୯ ବିଶ୍ୱ ଚାମ୍ପିୟନଶିପ୍ରେ ସେ ମଧ୍ୟ ଭାରତର ପ୍ରଥମ ଫାଇନାଲିଷ୍ଟ।
