ଶ୍ରୀନଗର,୧୪।୩: ଜମ୍ମୁ କଶ୍ମୀରର ପୂର୍ବତନ ମୁଖ୍ୟମନ୍ତ୍ରୀ ତଥା ପିଡିପି ମୁଖ୍ୟ ମେହବୁବା ମୁଫତି ସୀମାନ୍ତ ଜିଲା ପୁଞ୍ଚରେ ଏକ ସାଧାରଣ ସଭାରେ ଉଦବୋଧନ ଦେଇ କେନ୍ଦ୍ର ସରକାର ଏବଂ ଭାଜପା ଉପରେ ବର୍ଷିଛନ୍ତି। ସେ ଅଭିଯୋଗ କରି କହିଛନ୍ତି, ଦେଶକୁ ହିନ୍ଦୁ ରାଷ୍ଟ୍ର କରିବା ନୁହେଁ ବରଂ ଏହାକୁ ‘ଭାଜପା ରାଷ୍ଟ୍ର’ କରିବା ହେଉଛି ସରକାରଙ୍କ ଲକ୍ଷ୍ୟ। ଭାରତୀୟ ଜନତା ପାର୍ଟି ଭାରତକୁ ‘ଭାଜପା ରାଷ୍ଟ୍ର’ କରିବା ପାଇଁ ବିରୋଧୀ ଦଳ ଉପରେ ଆକ୍ରମଣ କରୁଛି। ଏଥିରେ ତାଙ୍କ ଦଳ (ପିଡିପି) ଚୁପ ରହିବ ନାହିଁ।
ମେହବୁବା ମୁଫତି ଆହୁରି ମଧ୍ୟ କହିଛନ୍ତି, ସେମାନେ (ଭାଜପା) ଭାରତକୁ ହିନ୍ଦୁ ରାଷ୍ଟ୍ର କରିବା ସପକ୍ଷରେ ନାହାଁନ୍ତି କିନ୍ତୁ ଏହାକୁ ଏକ ଭାଜପା ରାଷ୍ଟ୍ର କରିବା ପାଇଁ ସେମାନଙ୍କର ଉଦ୍ଦେଶ୍ୟ ରହିଛି, ଯେଉଁଠାରେ ସେମାନଙ୍କୁ ଅନୁସରଣ କରୁଥିବା ସମସ୍ତଙ୍କୁ ସ୍ବାଗତ କରାଯିବ। ଲୋକଙ୍କ ଦୁଃଖଦ ଚେହେରା ଜମ୍ମୁ କଶ୍ମୀରରେ ପରିସ୍ଥିତିକୁ ପ୍ରତିଫଳିତ କରୁଛି। ଏଠାରେ ହଜାର ହଜାର ଯୁବକ ଜେଲରେ ଅଛନ୍ତି ଏବଂ ଭୟର ବାତାବରଣ ସୃଷ୍ଟି ହୋଇଛି। ଦେଶର ସମସ୍ତ ରାଜନୈତିକ ଦଳ ଜାଗ୍ରତ ହୁଅନ୍ତୁ। ଆମେ ଚୁପ ରହିବା ନାହିଁ ଏବଂ ଲୋକଙ୍କ ପାଇଁ ଲଢିବା। ଧାରା ୩୭୦ ରଦ୍ଦ କରିବା ଅସାମ୍ବିଧାନିକ କିନ୍ତୁ ଅଧିକାଂଶ ନେତା ଚୁପ ରହିଛନ୍ତି। ଆମେ ଧାରା ୩୭୦କୁ ସୁଧ ସହିତ ଫେରାଇ ଆଣିବୁ।
