ନୂଆଦିଲ୍ଲୀ,୯।୩ : ସେଣ୍ଟ୍ରାଲ ପବ୍ଲିକ ସେକ୍ଟର ଏଣ୍ଟରପ୍ରାଇଜେସ (ସିପିଏସଏସ) କିମ୍ବା ସରକାରୀ ଏଜେନ୍ସି ହେଉ, ସରକାର ସେମାନଙ୍କ ଖାଲି ଜମି, କୋଠା କିମ୍ବା ସମ୍ପତ୍ତି ବିକ୍ରୟ କରି ପାଣ୍ଠି ସଂଗ୍ରହ କରିବାର ଯୋଜନା କରିଛନ୍ତି। ଏହି କାର୍ଯ୍ୟ ପାଇଁ କେନ୍ଦ୍ର ସରକାର ମଧ୍ୟ ଏକ କମ୍ପାନୀ ଗଠନ କରିଛନ୍ତି। ଏହି କମ୍ପାନୀର ନାମ ହେଉଛି ନ୍ୟାଶନାଲ ଲ୍ୟାଣ୍ଡ ମୋନେଟାଇଜେଶନ କର୍ପୋରେଶନ (ଏନ୍ଏଲ୍ଏମ୍ସି)।
ଏହି କମ୍ପାନୀ ସମ୍ପୂର୍ଣ୍ଣ ରୂପେ ସରକାରଙ୍କ ନିର୍ଦ୍ଦେଶରେ କାର୍ଯ୍ୟ କରିବ। ୨୦୨୧-୨୨ ଆର୍ଥିକ ବର୍ଷ ପାଇଁ ବଜେଟରେ ପ୍ରଥମ ଥର ଲାଗି ଏହି ଉପାୟରେ ସମ୍ପତ୍ତି ବିକ୍ରୟ ପାଇଁ ପ୍ରସ୍ତାବ ଦିଆ ଯାଇଥିଲା। ଏବେ ସରକାର ଏନେଇ ଏକ କମ୍ପାନୀ ଗଠନ କରିଛନ୍ତି।
ଅର୍ଥନୈତିକ ସର୍ଭେରେ ଉଲ୍ଲେଖ ଅଛି ଯେ, ଚଳିତ ବର୍ଷ ସାଧାରଣ ବଜେଟର ଗୋଟିଏ ଦିନ ପୂର୍ବରୁ ଉପସ୍ଥାପିତ ହୋଇଥିବା ଅଥନୈତିକ ସର୍ଭେରେ ନ୍ୟାଶନାଲ ଲ୍ୟାଣ୍ଡ ମୋନେଟାଇଜେଶନ କର୍ପୋରେଶନ ଗଠନ ବିଷୟରେ ଉଲ୍ଲେଖ କରାଯାଇଛି।
ସର୍ବେକ୍ଷଣରେ ଏହା କୁହାଯାଇଛି ଯେ ୩,୪୦୦ ଏକର ଜମି ଏବଂ କେନ୍ଦ୍ରୀୟ ପିଏସୟୁର ଅନ୍ୟାନ୍ୟ ସମ୍ପତ୍ତି ବିକ୍ରୟ ପାଇଁ ପ୍ରସ୍ତାବ ଏନ୍ଏଲ୍ଏମ୍ସିକୁ ପଠାଯାଇଛି।
ସରକାରୀ କମ୍ପାନୀ ଯେପରିକି ଏମ୍ଟିଏନ୍ଏଲ୍, ବିଏସ୍ ଏନ୍ ଏଲ୍, ବିପିସିଏଲ୍, ବି ଆଣ୍ଡ୍ ଆର୍ , ବିଇଏମ୍ଏଲ୍, ଏଚ୍ଏମ୍ଟି ଲିମିଟେଡ ଏବଂ ଇନଷ୍ଟ୍ରୁମେଣ୍ଟେଶନ ଲିମିଟେଡ ଲ୍ୟାଣ୍ଡ ମୋନେଟାଇଜେଶନ କର୍ପୋରେଶନରେ ସେମାନଙ୍କର ସମ୍ପତ୍ତିର ବିବରଣୀ ଦାଖଲ କରିଛନ୍ତି।
ଅଥନୈତିକ ସର୍ବେକ୍ଷଣର ରିପୋର୍ଟ ଅନୁଯାୟୀ, ୨୦୨୧-୨୨ରୁ ୨୦୨୪-୨୫ ମଧ୍ୟରେ କେନ୍ଦ୍ର ସରକାରଙ୍କ ପ୍ରମୁଖ ସମ୍ପତ୍ତି ବିକ୍ରୟରୁ ୬ ଲକ୍ଷ କୋଟି ଟଙ୍କା ଆୟ ହେବାର ସମ୍ଭାବନା ରହିଛି। ଏଥିମଧ୍ୟରୁ ପ୍ରାୟ ୮୩ ପ୍ରତିଶତ ସମ୍ପତ୍ତି ସଡକ, ରେଳବାଇ, ବିଦ୍ୟୁତ, ତୈଳ ଏବଂ ଗ୍ୟାସ ପାଇପଲାଇନ ତଥା ଟେଲି ଯୋଗାଯୋଗ କମ୍ପାନୀର ରହିଛି। ଅନେକ ସରକାରୀ କମ୍ପାନୀ ମଧ୍ୟ ଅଛନ୍ତି, ଯେଉଁମାନଙ୍କର ପୁଞ୍ଜି ପ୍ରତ୍ୟାହାର ହୋଇଛି କିମ୍ବା ବନ୍ଦ ହୋଇଯାଇଛି।
ଏପରି କମ୍ପାନୀଗୁଡିକ ପାଇଁ ସରକାର ଗ୍ରହଣ କରିଥିବା ଏହି ପଦକ୍ଷେପ ଅତ୍ୟନ୍ତ ଗୁରୁତ୍ୱପୂର୍ଣ୍ଣ। ନ୍ୟାଶନାଲ ଲ୍ୟାଣ୍ଡ ମୋନେଟାଇଜେଶନ କର୍ପୋରେଶନ ବୈଷୟିକ ପରାମର୍ଶ ଦେବା ସହିତ ସରକାରଙ୍କ ପାଣ୍ଠି ସଂଗ୍ରହ କାର୍ଯ୍ୟକ୍ରମକୁ ଆଗେଇ ନେବାରେ ସାହାଯ୍ୟ କରିବ।
