ମହାକାଳପଡ଼ା୧୭ା୧୦(ପ୍ରତାପ ଚନ୍ଦ୍ର ସ୍ବାଇଁ): କେନ୍ଦ୍ରାପଡ଼ା ଜିଲାର ଅନେକ ଶ୍ରମିକ ଦାଦନ ଖଟିବାକୁ ରାଜ୍ୟ ବାହାରେ ରହିଛନ୍ତି, ବିଶେଷ କରି ହାଇଦ୍ରାବାଦ , ଚେନ୍ନାଇ , ଗୁଜରାଟ , ଜାମ୍ମୁ କାଶ୍ମୀର , ବାଙ୍ଗାଲୋର , କେରଳ , ମୁମ୍ବାଇ , ଦିଲ୍ଲୀ , କୋଲକତା , ରାଜସ୍ଥାନ ଆଦି ସହରରେ ସେମାନେ କାମ କରୁଛନ୍ତି, କେବଳ ମହାକାଳପଡ଼ା ବ୍ଲକର ୩୦ ହଜାରରୁ ଊର୍ଦ୍ଧ୍ୱ ଦାଦନ ଶ୍ରମିକ ଅନ୍ୟ ରାଜ୍ୟର ଶିଳ୍ପାନୁଷ୍ଠାନ, ହୋଟେଲ ଓ ପାଣି ପାଇପ କାମରେ ନିୟୋଜିତ ହୋଇଛନ୍ତି ହେଲେ ରାଜ୍ୟ ସରକାରଙ୍କ ପକ୍ଷରୁ ରାଶନ କାର୍ଡ ସଂଶୋଧନ ଓ କେୱାଇସି ସଂଯୋଗ ପାଇଁ ଚଳିତ ମାସ ଶେଷ ତାରିଖ ଧାର୍ଯ୍ୟ କରାଯାଇଛି।
ନାମ ସହିତ ଆଧାର କାର୍ଡ ସଂଯୋଗୀକରଣ ସର୍ଭେ ସରିଲେ ନୂଆ ରାଶନ କାର୍ଡ ଯୋଗାଣ କରାଯିବ ବୋଲି ବିଭାଗ ପକ୍ଷରୁ ଘୋଷଣା କରାଯାଇଛି। ଏହାର ସୁଯୋଗ ନେଇ କେତେଜଣ ଡିଲର ରାଜ୍ୟ ବାହାରେ ମେଶିନ ଧରି ବୁଲୁଛନ୍ତି। ସେମାନେ ସେଠାରେ ଥିବା ଦାଦନ ଶ୍ରମିକଙ୍କ ପରିବାର ସଦସ୍ୟଙ୍କୁ ଭୋଟି ନାମ ସହିତ ଆଧାର ସଂଯୋଗ କରୁଛନ୍ତି। ଏଥିପାଇଁ ସେମାନେ ପ୍ରତି ଶ୍ରମିକ ପରିବାରଠାରୁ ୧ହଜାରରୁ ଊର୍ଦ୍ଧ୍ୱ ଟଙ୍କା ଆଦାୟ କରୁଥିବା ଅଭିଯୋଗ ହୋଇଛି।
ସୂଚନା ଅନୁଯାୟୀ, ମହାକାଳପଡ଼ା ବ୍ଲକରେ ୫୮ ଖାଉଟି ଖୁଚୁରା କେନ୍ଦ୍ର ରହିଛି। ରାଶନ କାର୍ଡ ସଂଖ୍ୟା ୪୮ ହଜାରରୁ ଅଧିକ ଥିଲା ଆଉ ୧ ଲକ୍ଷ ୮୧ ହଜାର ରାଶନ କାର୍ଡ ହିତାଧିକାରଙ୍କୁ ପଞ୍ଜିକୃତ କରାଯାଉଛି। ସେଥିମଧ୍ୟରୁ ଅଦ୍ୟାବଧି ୧ ଲକ୍ଷ ୪୦ ହଜାର ହିତାଧିକାରୀଙ୍କ କେୱାଇସି ସଂଯୋଗ କରାଯାଇଛି ବୋଲି ବିଭାଗୀୟ ସୂତ୍ରରୁ ସୂଚନା ମିଳିଛି। ରାଜ୍ୟ ସରକାରଙ୍କ ପକ୍ଷରୁ ରାଶନ କାର୍ଡ ସଂଶୋଧନ ପାଇଁ ଚଳିତ ମାସ ଶେଷ ସୁଦ୍ଧା ଆଧାର କାର୍ଡ ବା କେୱାଇସି ସାରିବା ପାଇଁ ଡ଼ିଲରମାନଙ୍କ ପକ୍ଷରୁ ତତ୍ପରତା ପ୍ରକାଶ ପାଇଛି। ଏଥିପାଇଁ କେତେଜଣ ଡ଼ିଲର ମେଶିନ ଧରି ବିଭିନ୍ନ ରାଜ୍ୟରେ ବୁଲୁଛନ୍ତି। ସେମାନେ ସେଠାକୁ ଯାଇଥିବା ଦାଦନ ଶ୍ରମିକ ଓ ଠିକାଦାରମାନଙ୍କୁ ହାତକରି କେୱାଇସି ସଂଯୋଗ କରିବା ପାଇଁ ପଦକ୍ଷେପ ଗ୍ରହଣ କରିଛନ୍ତି।
ଏଥିପାଇଁ ପ୍ରତି ଶ୍ରମିକ ୧ ହଜାରରୁ ଊର୍ଦ୍ଧ୍ୱ ଟଙ୍କା ଦେଉଛନ୍ତି। ଏ ନେଇ ହାଇଦ୍ରାବାଦ ଓ ଚେନାଇରେ ରହୁଥିବା କେତେଜଣ ଦାଦନ ଶ୍ରମିକ ଅଭିଯୋଗ କରିବା ସହ ନିଜ ନାମ ଗୋପନ ରଖିବା ପାଇଁ କହିଛନ୍ତି। ତେବେ ନାନା ସହିତ ଆଧାର ସଂଯୋଗ ନ କଲେ ଆଗାମୀ ଦିନରେ ରାଶନ କାର୍ଡରୁ ବଞ୍ଚିତ ରହିବେ ବୋଲି ଡିଲରମାନେ କହୁଛନ୍ତି। ଆମ୍ଭେମାନେ ବାଧ୍ୟ ହୋଇ ନିଜ ନିଜର ନାମ ସଂଯୋଗ କରୁଥିବା ଅଭିଯୋଗ ହେଉଛି।
ଅପରପକ୍ଷେ ମହାକାଳପଡ଼ା ବ୍ଲକ ଚାଉଳ ଯୋଗାଣକାରୀ ସଂସ୍ଥା ଖୁଚୁରା ବିକ୍ରୟ କେନ୍ଦ୍ରରେ ଯୋଗାଣ କରୁଥିବା ପ୍ରତି ଚାଉଳ ବସ୍ତାରେ ୫ କିଲୋ କମ ରହୁଥିବା ଜଣେ ଡିଲର କହିଛନ୍ତି। ଏଥିପାଇଁ ପ୍ରତିମାସରେ କେତେଜଣ ହିତାଧିକାରୀ ରାଶନ ସାମଗ୍ରୀରୁ ବଞ୍ଚିତ ରହୁଛନ୍ତି। ହେଲେ ଡିଲରମାନେ ବ୍ଲକ ଚାଉଳ ଯୋଗାଣକାରୀ ସଂସ୍ଥା କର୍ମକର୍ତ୍ତାଙ୍କୁ ପଚାରିଲେ ଉତ୍ତର ମିଳୁଛି ତୁମେ ଏ ମାସରେ ଆଡଜଷ୍ଟ୍ସ କରିଦିଅ। ପରବର୍ତ୍ତୀ ମାସରେ ନିଅଣ୍ଟ ଚାଉଳ ମିଳିବ। ଅନେକ ଖାଉଟି ଖୁଚୁରା ବିକ୍ରୟ କେନ୍ଦ୍ରରେ ସୂଚନା ଫଳକ ନ ଥିବା ଅଭିଯୋଗ କରିଛନ୍ତି। ରାଜ୍ୟ ସରକାରଙ୍କ ପକ୍ଷରୁ ରାଶନ ସାମଗ୍ରୀ ଯୋଗାଣକୁ ନେଇ ସ୍ବଚ୍ଛତା ଅବଲମ୍ବନ କରିବା ପାଇଁ ଉଦ୍ୟମ କରାଯାଉଥିବା ବେଳେ ଯୋଗାଣ ବିଭାଗ , ଚାଉଳ ଯୋଗାଣକାରୀ ସଂସ୍ଥା ଓ କେତେଜଣ ଡିଲରଙ୍କ ମଧ୍ୟରେ ଥିବା ସମ୍ପର୍କ ଯୋଗୁ ଖାଉଟିମାନେ ହଇରାଣ ହେଉଛନ୍ତି। ଏ ସଂକ୍ରାନ୍ତରେ ବ୍ଲକ ଯୋଗାଣ ଅଧିକାରୀ ସ୍ବରୂପ କୁମାର ଦାସ କହିଛନ୍ତି, ଅଭିଯୋଗ ଆସିଲେ ଏହି ଘଟଣାର ତଦନ୍ତ କରାଯିବ ।
