ଭୁବନେଶ୍ୱର,୨୮ା୨(ବ୍ୟୁରୋ):ପୂର୍ବତନ ସ୍ବାସ୍ଥ୍ୟମନ୍ତ୍ରୀ ନବ କିଶୋର ଦାସଙ୍କ ହତ୍ୟା ଅଭିଯୁକ୍ତ ପୋଲିସ ଏଏସ୍ଆଇ ଗୋପାଳକୃଷ୍ଣ ଦାସ ନିଜର କାର୍ଯ୍ୟଦକ୍ଷତା ଯୋଗୁ ଚାକିରି କାଳ ମଧ୍ୟରେ ବହୁବାର ପୁରସ୍କୃତ ହେବା ସହ ପ୍ରଶଂସାପତ୍ର ପାଇଛନ୍ତି। ୧୯୯୩ରୁ ୨୦୨୦ ମଧ୍ୟରେ ଗୋପାଳ ଜିିଏସ୍ ମାର୍କ ୧୮ଥର ପାଇଥିବା ବେଳେ ୯ଥର ଆର୍ଥିକ ପୁରସ୍କାର ଏବଂ ୧୮ ଥର ପ୍ରଶଂସାପତ୍ର ୧୮ଥର ପାଇଛନ୍ତି। ତେବେ ତାଙ୍କ ମାନସିକ ସ୍ଥିତି ଭଲ ନ ଥିବା କୁହାଯାଉଛି। ତେଣୁ ମାନସିକ ସ୍ଥିତି କ’ଣ ରହିଛି ସେନେଇ ରାଜ୍ୟ କ୍ରାଇମ୍ବ୍ରାଞ୍ଚ ପକ୍ଷରୁ ଆମେରିକାର ଗୋଇନ୍ଦା ସଂସ୍ଥା ଫେଡେରାଲ୍ ବ୍ୟୁରୋ ଅଫ୍ ଇନ୍ଭେଷ୍ଟିଗେଶନ(ଏଫ୍ବିଆଇ)ର ସହାୟତା ଲୋଡ଼ାଯାଇଛି ବୋଲି ଗୃହ ରାଷ୍ଟ୍ରମନ୍ତ୍ରୀ ତୁଷାରକାନ୍ତି ବେହେରା ସୋମବାର ବିଧାନସଭାରେ ଉତ୍ତର ରଖିଛନ୍ତି।
ଭାଜପା ସଭ୍ୟ କୁସୁମ ଟେଟେଙ୍କ ଏକ ଲିଖିତ ପ୍ରଶ୍ନର ଉତ୍ତରରେ ମନ୍ତ୍ରୀ ବେହେରା ଦେଇଥିବା ତଥ୍ୟ ଅନୁସାରେ ନବ ଦାସଙ୍କ ହତ୍ୟା ଅଭିଯୁକ୍ତ ଗୋପାଳକୃଷ୍ଣ ଦାସ ୧୯୯୨ ଜୁଲାଇ ୮ରେ ବ୍ରହ୍ମପୁର ପୋଲିସ ଜିଲାରେ ପ୍ରଥମେ କନଷ୍ଟେବଳ ଭାବେ ନିଯୁକ୍ତି ପାଇଥିଲେ। ୨୦୦୯ରେ ସେ ଏଏସ୍ଆଇ ପଦବୀକୁ ପଦୋନ୍ନତି ପାଇ ଝାରସୁଗୁଡ଼ା ଜିଲାକୁ ବଦଳି ହେବା ସହ ଜିଲାର ବିଭିନ୍ନ ଥାନା ଓ ଫାଣ୍ଡିରେ ୧୩ବର୍ଷ ଧରି କାର୍ଯ୍ୟ କରିଛନ୍ତି। ଗୋପାଳ ବଡ଼ମାଳ ଥାନାରେ ୨୦୦୯ରୁ ୨୦୧୩ , କୋଲାବିରା ଥାନାରେ ୨୦୧୩ରୁ ୨୦୧୬, ବନହରପାଲି ଥାନାରେ ୨୦୧୬ରୁ ୨୦୧୮, ବେଲପାହାଡ଼ ଥାନାରେ ୨୦୧୮ରୁ ୨୦୨୦ ଏବଂ ଗାନ୍ଧୀଛକ ଫାଣ୍ଡିରେ ୨୦୨୦ ନଭେମ୍ବର ୨୭ରୁ ୨୦୨୩ ଜାନୁୟାରୀ ୨୯ ପର୍ଯ୍ୟନ୍ତ କାର୍ଯ୍ୟରତ ଥିଲେ। ମନ୍ତ୍ରୀ ବେହେର ଦେଇଥିବା ତଥ୍ୟ ଅନୁସାରେ ଗୋପାଳ ଭଲ ବୋଲି ଜଣାପଡ଼ିଛି। ନବ ଦାସଙ୍କୁ ହତ୍ୟା କରିବାର କିଛି ସମୟ ପରେ ଗୋପାଳଙ୍କ ପରିବାର ଲୋକେ ପ୍ରଥମେ ତାଙ୍କ ମାନସିକ ଅବସ୍ଥା ଭଲ ନ ଥିବା କହିଥିଲେ। ପରେ ଗୋପାଳଙ୍କ ମାନସିକ ସ୍ଥିତି ଜାଣିବା ପାଇଁ ଏକ ମେଡିକାଲ୍ ଟିମ୍ ଗଠନ କରାଯାଇ ତାଙ୍କର ସ୍ବାସ୍ଥ୍ୟ ପରୀକ୍ଷା ଯାଞ୍ଚ କରାଯାଇଥିଲା। ମେଡିକାଲ ବିଶେଷଜ୍ଞ ଟିମ୍ର ରିପୋର୍ଟ ଅନୁସାରେ ଗୋପାଳଙ୍କ ଦୀର୍ଘ ଦିନ ଧରି ମାନସିକ ଅବସ୍ଥା ଭଲ ନ ଥିବା ଜଣାପଡ଼ିଛି। ଯଦି ଜଣେ ଲୋକ ଦୀର୍ଘଦିନ ଧରି ମାନସିକ ରୋଗରେ ପୀଡ଼ିତ, ତାହେଲେ ତାଙ୍କୁ କିପରି କାର୍ଯ୍ୟ ଦକ୍ଷତା ପାଇଁ ଏକାଧିକବାର ପୁରସ୍କୃତ କରାଗଲା, ସେନେଇ ଭାଜପା ଏବେ ପ୍ରଶ୍ନ କରିଛି। ସରକାର ପ୍ରଥମେ ଗୋପାଳ ମାନସିକ ରୋଗୀ କିମ୍ବା ଭଲ ତାହା ଏବେ ପ୍ରମାଣ କରନ୍ତୁ ବୋଲି ଭାଜପା କହିଛି।
