ଭୋପାଳ,୨୩ା୩(ପି.ଟି.): ଭୋପାଳରେ ବୁଧବାରଠାରୁ ଆରମ୍ଭ ହୋଇଛି ଆଇଏସ୍ଏସ୍ଏଫ୍ ଶୁଟିଂ ବିଶ୍ୱକପ୍। ପ୍ରତିଯୋଗିତାର ପ୍ରଥମ ଦିନରେ ଭାରତ ଗୋଟିଏ ଲେଖାଏ ସ୍ବର୍ଣ୍ଣ ଓ ବ୍ରୋଞ୍ଜ ପଦକ ହାସଲ କରିଛି। ଭାରତୀୟ ପ୍ରତିଯୋଗୀ ସରବଜୋତ ସିଂ ଏୟାର ପିସ୍ତଲ ଇଭେଣ୍ଟରେ ସ୍ବର୍ଣ୍ଣ ପଦକ ହାସଲ କରିଥିବା ବେଳେ ସମାନ ଇଭେଣ୍ଟରେ ବ୍ରୋଞ୍ଜ ପଦକ ହାସଲ କରିଛନ୍ତି ବରୁଣ ତୋମାର। ବିଶ୍ୱ ଚାମ୍ପିୟନ ଶୁଟରଙ୍କୁ ପଛରେ ପକାଇ ୨୧ ବର୍ଷୀୟ ସରବଜୋତ ଓ ୧୯ ବର୍ଷୀୟ ବରୁଣ ଚମତ୍କାର ପ୍ରଦର୍ଶନ କରିବା ସହିତ ଭାରତ ପାଇଁ ଦୁଇଟି ପଦକ ହାସଲ କରିଛନ୍ତି। ୨୦୨୧ରେ ଜୁନିୟର ବିଶ୍ୱ ଚାମ୍ପିୟନ ସରବଜୋତ ଫାଇନାଲରେ ଆଜାରବୈଜାନର ରୁସଲାନ ଲୁନେଭଙ୍କୁ ୧୬-୦ରେ ପରାସ୍ତ କରି ସ୍ବର୍ଣ୍ଣ ପଦକ ହାସଲ କରିଥିଲେ। ସରବଜୋତ କ୍ୱାଲିଫିକେଶନ ସିରଜର ୬ ରାଉଣ୍ଡରେ ଯଥାକ୍ରମେ ୯୮, ୯୭, ୯୯, ୯୭, ୯୭ ଓ ୯୭ ପଏଣ୍ଟ ସ୍କୋର କରିଥିଲେ। ପ୍ରତି ରାଉଣ୍ଡରେ ବୁଲ୍ସ ଆଇ ସ୍କୋର କରିବା ସହିତ ଯୋଗ୍ୟତା ପର୍ଯ୍ୟାୟରେ ୫୮୫ ପଏଣ୍ଟ ସହ ପ୍ରଥମ ସ୍ଥାନରେ ରହିଥିଲେ। ଚାଇନାର ଲିଉ ଜିନାଓ ୫୮୪ ପଏଣ୍ଟ ସହ ଦ୍ୱିତୀୟ ସ୍ଥାନ ହାସଲ କରିଥିଲେ। ୫୭୯ ପଏଣ୍ଟ ଅର୍ଜନ କରିଥିବା ବରୁଣ ତୋମାର ଅଷ୍ଟମ ଖେଳାଳି ଭାବରେ ଫାଇନାଲ ପାଇଁ ଯୋଗ୍ୟତା ଅର୍ଜନ କରିଥିଲେ। ର଼୍ୟାଙ୍କିଙ୍ଗ ରାଉଣ୍ଡରେ ସରବଜୋତ ୨୫୩.୨ ପଏଣ୍ଟ ଅର୍ଜନ କରି ପ୍ରଥମ ସ୍ଥାନରେ ରହିଥିବା ବେଳେ ରୁସଲାନ ୨୫୧.୯ ପଏଣ୍ଟ ସହିତ ଦ୍ୱିତୀୟ ସ୍ଥାନରେ ରହିଥିଲେ। ସ୍ବର୍ଣ୍ଣ ପଦକ ପାଇଁ ଖେଳା ଯାଇଥିବା ମୁକାବିଲାରେ ସରବଜୋତ ୧୦.୪, ୧୦.୪, ୧୦.୩, ୧୦.୨, ୧୦.୨ ଓ ୧୦.୯ ପଏଣ୍ଟ ସ୍କୋର କରିଥିଲେ। ଅନ୍ୟପକ୍ଷରେ ରୁସଲାନ ୧୦.୧, ୧୦.୧, ୯.୬, ୯.୫,୮.୯ ଓ ୧୦.୪ ପଏଣ୍ଟ ସ୍କୋର କରି ପରାଜିତ ହୋଇଥିଲେ। ଅନ୍ୟତମ ଭାରତୀୟ ପ୍ରତିଯୋଗୀ ବରୁଣଙ୍କର ଏହା ଦ୍ୱିତୀୟ ବିଶ୍ୱକପ୍ ପଦକ। ପୂର୍ବରୁ କାଇରୋରେ ଅନୁଷ୍ଠିତ ବିଶ୍ୱକପ୍ରେ ସେ ସରବଜୋତଙ୍କୁ ପରାସ୍ତ କରି ବ୍ରୋଞ୍ଜ ପଦକ ହାସଲ କରିଥିଲେ। ଏୟାର ପିସ୍ତଲ ବର୍ଗରେ ଭାରତୀୟ ପୁରୁଷ ଦୁଇଟି ପଦକ ହାସଲ କରିଥିଲେ ହେଁ ମହିଳାମାନେ ନିରାଶ କରିଛନ୍ତି। ମାନୁ ଭାକେର, ଦିବ୍ୟା ସୁବ୍ବାରାଜୁ ଓ ରିଦିମ ସାଙ୍ଗଓ୍ବନଙ୍କ ଦଳ ଫାଇନାଲ ପାଇଁ ମଧ୍ୟ ଯୋଗ୍ୟତା ଅର୍ଜନରେ ବିଫଳ ହୋଇଥିଲେ। ଅଲିମ୍ପିଆନ ମାନୁ ଭାକେର ଓ ରିଦିମ ସାଙ୍ଗଓ୍ବନଙ୍କ ତୁଳନାରେ ଭଲ ପ୍ରଦର୍ଶନ କରି ଦିବ୍ୟା ୫୭୯ ପଏଣ୍ଟ ସ୍କୋର କରି ର଼୍ୟାଙ୍କିଙ୍ଗ ରାଉଣ୍ଡକୁ ଉନ୍ନୀତ ହୋଇଥିଲେ। ମାନୁ ୫୬୮ ଓ ରିଦିମ ୫୭୨ ପଏଣ୍ଟ ହାସଲ କରି ଯଥାକ୍ରମେ ୧୬ ଓ ୧୩ତମ ସ୍ଥାନ ହାସଲ କରିଥିଲେ।
ଫୁଟ୍ବଲ ଛାଡ଼ି ଶୁଟିଂକୁ କ୍ୟାରିୟର କରିଥିଲେ
ଅମ୍ବାଲାର ଭଗୀରଥ ପବ୍ଲିକ୍ ସ୍କୁଲରେ ପାଠ ପଢୁଥିବା ସମୟରେ ସରବଜୋତ ସିଂ ଫୁଟବଲ ଖେଳ ପ୍ରତି ଆଗ୍ରହୀ ଥିଲେ। ୨୦୧୩-୧୪ ସମର କ୍ୟାମ୍ପରେ ଶୁଟିଂ ରେଞ୍ଜରେ ଅଭ୍ୟାସ ଦେଖିବା ପରେ ଏହା ତାଙ୍କୁ ଆକୃଷ୍ଟ କରିଥିଲା। ପେପର ଟାର୍ଗେଟ ଉପରେ ପିସ୍ତଲରେ ଶୁଟିଂ ମନରୁ ଯାଉ ନ ଥିବା ବେଳେ ୨୦୧୪ରେ ଶୁଟିଂକୁ କ୍ୟାରିୟର କରିବା ପାଇଁ ନିଷ୍ପତ୍ତି ନେଇଥିଲେ। ପିତା ଜଣେ ଚାଷୀ ଥିବା ବେଳେ ଶୁଟିଂ ପରି ମହଙ୍ଗା ଖେଳ ପାଇଁ ସହମତି ପ୍ରଦାନ କରିବା କଷ୍ଟସାଧ୍ୟ ଥିଲା। ତେବେ କିଛି ମାସ ଧରି ସରବଜୋତ ନିୟମିତ ଭାବରେ ପିତାଙ୍କୁ ଅନୁରୋଧ କରିବା ସହିତ ପିତା ମାନି ଯାଇଥିଲେ। ଏହାପରେ ସେ ନିଜ ଦକ୍ଷତା ବଳରେ ସଫଳତାର ଗୋଟିଏ ପରେ ଗୋଟିଏ ସୋପାନ ଅତିକ୍ରମ କରିବାରେ ଲାଗିଥିଲେ। ୨୦୨୧ରେ ସରବଜୋତ ଜୁନିୟର ଶୁଟିଂ ବିଶ୍ୱକପ୍ର ଏୟାର ପିସ୍ତଲ ବିଭାଗରେ ସ୍ବର୍ଣ୍ଣ ପଦକ ହାସଲ କରିଥିଲେ। ୨୦୨୨ କାଇରୋ ବିଶ୍ୱକପ୍ରେ ଅଳ୍ପକେ ବ୍ରୋଞ୍ଜ ପଦକ ହାସଲରୁ ବଞ୍ଚିତ ହୋଇଥିବା ବେଳେ ବୁଧବାର ସେ ଇତିହାସ ରଚିଛନ୍ତି। କାଇରୋର ବିଫଳତା ତାଙ୍କୁ ପ୍ରଦର୍ଶନରେ ଉନ୍ନତି ଆଣିବା ପାଇଁ ପ୍ରେରଣା ଯୋଗାଇଥିଲା ବୋଲି ସରବଜୋତ କହିଛନ୍ତି।
