ଭବାନୀପାଟଣା/କୋକସରା,୨୨।୮(ଉତ୍ତମ କୁମାର ଦାଶ/ ଦୁଷ୍ମନ୍ତ ପଟ୍ଟଯୋଶୀ): କଳାହାଣ୍ଡି ଜିଲା କୋକସରା ବ୍ଲକ ଓଲମା ଗାଁରେ ସଶସ୍ତ୍ର ଡକାୟତି ହୋଇଛି। ରବିବାର ବିଳମ୍ବିତ ରାତିରେ ଗ୍ରାମର ଧନଞ୍ଜୟ ସାହୁଙ୍କ ଘରେ ଏକ ଡକାୟତି ଦଳ ପଶି ୨୫ ଭରି ସୁନା ଅଳଙ୍କାର ଲୁଟି ନେଇଥିବା ଅଭିଯୋଗ ହୋଇଛି। ଡକାୟତି ଦଳ ଘରେ ପଶି ଘରର ସମସ୍ତ ସଦସ୍ୟଙ୍କୁ ଗୋଟିଏ କୋଠରୀରେ ତାଲା ପକାଇ ଦେଇଥିଲେ। ପରେ ଘରେ ଥିବା ସମସ୍ତ ଅଳଙ୍କାର ଲୁଟ୍ କରିଥିଲେ। ଏପରି କି ଅଭିଯୁକ୍ତମାନେ ଘରେ ଥିବା ସମସ୍ତ ଆସବାବପତ୍ର ଭାଙ୍ଗି ଦେଇଛନ୍ତି।
ସ୍ଥାନୀୟ ଲୋକେ ଜଣେ ଡକାୟତଙ୍କୁ ଧରିବାରେ ସକ୍ଷମ ହୋଇଥିବା ବେଳେ ପୋଲିସ ଅନ୍ୟ ଜଣେ ଡ଼କାୟତକୁ କାଉଡୋଲା ଗାଁ ନିକଟରୁ ଧରିଥିବା ସୂଚନା ମିଳିଛି। ପୋଲିସ ୨ ଡକାୟତଙ୍କୁ ଥାନାରେ ଅଟକ ରଖି ପଚରାଉଚରା କରୁଛି। ପୋଲିସ ଘଟଣାର ଅଧିକ ତଦନ୍ତ ପାଇଁ ସନ୍ଧାନୀ କୁକୁର ସହ ଘଟଣା ସ୍ଥଳରେ ପହଞ୍ଚି ଛାନ୍ଭିନ୍ ଆରମ୍ଭ କରିଛି।
