ନୂଆଦିଲ୍ଲୀ,୨୧।୪: ହୁ ହୁ ହୋଇ ବଢ଼ିବାରେ ଲାଗିଛି ସୁନା ଦର। ସୋମବାର ଦେଶର ଫ୍ୟୁଚର୍ସ ମାର୍କେଟ ମଲ୍ଟି କମୋଡିଟି ଏକ୍ସଚେଞ୍ଜରେ ସୁନାର ମୂଲ୍ୟ ରେକର୍ଡସ୍ତର ଛୁଇଁଛି। ଏହା ୯୭ ହଜାର ଟଙ୍କାର ନିକଟତର ହୋଇଛି। ବିଶେଷ କଥା ହେଉଛି କେବଳ ଏପ୍ରିଲ ମାସରେ ସୁନା ମୂଲ୍ୟରେ ଦଶ ଗ୍ରାମ ପିଛା ମୋଟ ୬,୨୦୦ ଟଙ୍କା ବୃଦ୍ଧି ହୋଇ ସାରିଛି। ସୁନା ମୂଲ୍ୟ ଆହୁରି ବୃଦ୍ଧି ପାଇପାରେ ବୋଲି କୁହାଯାଉଛି। ତେବେ ଡଲାର ସୂଚକାଙ୍କରେ କ୍ରମାଗତ ହ୍ରାସ ଏବଂ ଚାଇନା ଏବଂ ଆମେରିକା ମଧ୍ୟରେ ଚାଲିଥିବା ବାଣିଜ୍ୟ ଯୁଦ୍ଧ ଯୋଗୁ ସୁନା ମୂଲ୍ୟ ବୃଦ୍ଧି ପାଉଛି।
ସୋମବାର MCX ରେ ସୁନା ୧,୬୨୧ ଟଙ୍କା ବୃଦ୍ଧି ପାଇ ୯୬,୮୭୫ ଟଙ୍କାର ରେକର୍ଡ ସ୍ତରରେ ପହଞ୍ଚିଛି। ସେହିଭଳି ରୂପା ମୂଲ୍ୟ ୬୪୨ ଟଙ୍କା ବୃଦ୍ଧି ସହିତ ପ୍ରତି କିଲୋଗ୍ରାମ ୯୫,୬୭୯ ଟଙ୍କାରେ କାରବାର କରୁଛି। ରୂପା ମଧ୍ୟ କାରବାର ସମୟରେ ୯୬,୧୦୦ ଟଙ୍କାରେ ପହଞ୍ଚିଛି। ଗତ ସପ୍ତାହରେ ଅନ୍ତର୍ଜାତୀୟ ବଜାରରେ ଅନିଶ୍ଚିତତା ଏବଂ ଆମେରିକା-ଚାଇନା ବାଣିଜ୍ୟ ଯୁଦ୍ଧ ବୃଦ୍ଧି ପାଉଥିବା ବେଳେ ସୁନା ଏବଂ ରୂପାର ମୂଲ୍ୟରେ ବହୁତ ଅସ୍ଥିରତା ଦେଖାଦେଇଥିଲା। ସପ୍ତାହ ମଧ୍ୟରେ ସୁନା ମୂଲ୍ୟ ନୂତନ ସର୍ବୋଚ୍ଚ ସ୍ତରରେ ପହଞ୍ଚିଛି ଏବଂ ରୂପା ଦର ମଧ୍ୟ ବଢୁଛି।
ଯଦି ଆମେ ଚଳିତ ମାସ ବିଷୟରେ କହିବା କିମ୍ବା ଗତ ୩ ସପ୍ତାହ ବିଷୟରେ କହିବା ତେବେ ସୁନାର ମୂଲ୍ୟରେ ଏକ ବିରାଟ ବୃଦ୍ଧି ଘଟିଛି। ଗତ ମାସର ଶେଷ ବ୍ୟବସାୟ ଦିବସରେ ସୁନାର ମୂଲ୍ୟ ପ୍ରତି ଦଶ ଗ୍ରାମ ୯୦,୭୧୭ ଟଙ୍କା ଥିଲା, ଯାହା ଏବେ ସର୍ବୋଚ୍ଚ ସ୍ତରରେ ୯୬,୮୭୫ ଟଙ୍କାକୁ ବୃଦ୍ଧି ପାଇଛି। ଏହାର ଅର୍ଥ ହେଉଛି ସୁନା ମୂଲ୍ୟରେ ୬,୧୫୮ ଟଙ୍କା ବୃଦ୍ଧି ଘଟିଛି। ବିଶେଷଜ୍ଞଙ୍କ ମତରେ ଅକ୍ଷୟ ତୃତୀୟା ପୂର୍ବରୁ ସୁନାର ମୂଲ୍ୟ ଏକ ଲକ୍ଷ ଟଙ୍କା ଛୁଇଁପାରେ।
