ଲହୁଣୀପଡ଼ା, ୧୫।୯(ଡି.ଏନ୍.ଏ.): ସୁନ୍ଦରଗଡ଼ ଜିଲା ଚାନ୍ଦିପୋଷ ଥାନା ଗୁରୁଣ୍ଡିଆ ବ୍ଲକ ଅଧୀନ ବାଙ୍କି ନିକଟସ୍ଥ ଭାଲତା ଗ୍ରାମରେ ଗୁରୁବାର ଜଣେ ଯୁବତୀଙ୍କୁ ହତ୍ୟାକରି ଜଣେ ଯୁବକ ବିଷପିଇ ଆତ୍ମହତ୍ୟା ଉଦ୍ୟମ କରିଛନ୍ତି। ମୃତ ଯୁବତୀ ହେଲେ ଲହୁଣୀପଡ଼ା ବ୍ଳକ ଅନ୍ତର୍ଗତ ଦର୍ଜୀଂ ପଞ୍ଚାୟତ ମଧୁପୁର ଅଞ୍ଚଳର ଶାନ୍ତି ଓରାମ (୨୨)। ଯୁବକ ହେଲେ ରାଉରକେଲା ବନ୍ଧମୁଣ୍ଡା ଅଞ୍ଚଳର ଶୁକ୍ରା ଓରାମ(୨୫)। ଶୁକ୍ରାଙ୍କ ଅବସ୍ଥା ଗୁରୁତର ଥିବାରୁ ତାଙ୍କୁ ରାଉରକେଲାରେ କଡ଼ା ସୁରକ୍ଷାରେ ଚିକିତ୍ସା କରାଯାଉଛି।
ଘଟଣାରୁ ପ୍ରକାଶ ଯେ, ଶାନ୍ତିଙ୍କ ମା’ବାପାଙ୍କ ମୃତ୍ୟୁ ପରେ ଭାଲତା ଗ୍ରାମକୁ ଆସି ଭିଣୋଇ ଘରେ ରହୁଥିଲେ। ଶୁକ୍ରା ମଧ୍ୟ ଭାଲତା ଗାଁକୁ ଆସି ମାଉସୀ ଘରେ ରହୁଥିଲେ। ସେତିକିବେଳେ ଉଭୟଙ୍କ ମଧ୍ୟରେ ପ୍ରେମ ସମ୍ପର୍କ ଗଢି ଉଠିଥିଲା। ଗୁରୁବାର ଶାନ୍ତି ଏକୁଟିଆ ଥିବାବେଳେ ଶୁକ୍ରା ତାଙ୍କ ନିକଟରେ ପହଞ୍ଚି ଥିଲେ। ସାଙ୍ଗରେ ନେଇଥିବା କୀଟନାଶକ ଶାନ୍ତିଙ୍କୁ ପିଇବା ପାଇଁ ବାଧ୍ୟ କରିଥିଲେ। ଶାନ୍ତି ଏହାକୁ ବିରୋଧ କରି ଦୌଡ଼ି ପଳାଇବାକୁ ଉଦ୍ୟମ କରିଥିଲେ। ହେଲେ ଶୁକ୍ରା ତାଙ୍କୁ କାବୁକରି ନେଇଥିଲେ। ପରେ ସେ ଘର ଅଗଣାରେ ଏକ ଧାରୁଆ ଅସ୍ତ୍ରରେ ଶାନ୍ତିଙ୍କ ଗଳାକାଟି ହତ୍ୟା କରିଥିଲେ। ଏପରି କି ଶୁକ୍ରା ଆଣିଥିବା କୀଟନାଶକକୁ ପିଇଦେଇ ଆତ୍ମହତ୍ୟା ଉଦ୍ୟମ କରିଥିଲେ। ବିଷକ୍ରିୟାରେ ଛଟପଟ ହେଉଥିବା ପରିବାର ଲୋକ ଦେଖି ଶୁକ୍ରାଙ୍କୁ ରାଉରକେଲା ସରକାରୀ ଡାକ୍ତରଖାନାରେ ଭର୍ତ୍ତି କରିଥିଲେ। ଖବରପାଇ ଚାନ୍ଦିପୋଷ ପୋଲିସ ଫରେନ୍ସିକ ଦଳ ସହିତ ଘଟଣା ସ୍ଥଳରେ ପହଞ୍ଚତ୍ ମୃତଦେହ ଜବତ କରିଥିଲା। ବ୍ୟବଚ୍ଛେଦ ପରେ ପରିବାର ବର୍ଗଙ୍କୁ ହସ୍ତାନ୍ତର କରାଯାଇଛି। ପୋଲିସ ଏକ ମାମଲା ରୁଜୁ କରି ଘଟଣାର ତଦନ୍ତ ଚଳାଇଥିବା ଜଣାପଡିଛି।
