ଫାରୁଖବାଦ: ଉତ୍ତର ପ୍ରଦେଶର ଫାରୁଖବାଦରୁ ଏକ ଅଜବ ଘଟଣା ସାମ୍ନାକୁ ଆସିଛି। ବର ଟଙ୍କା ଗଣି ନ ପାରିବାରୁ କନ୍ୟା ବାହାଘର ଭାଙ୍ଗି ଦେଇଛନ୍ତି। ୨୧ ବର୍ଷୀୟା ରୀତା ସିଂଙ୍କ ବାହାଘର ମୋହିତ(୨୩)ଙ୍କ ସହ ଠିକ୍ ହୋଇଥିଲା। କିନ୍ତୁ ବିବାହ ଦିନ ହିଁ ବାହାଘର ଭାଙ୍ଗିଯାଇଛି। ମୋହିତଙ୍କ ଆଚରଣ ଦେଖି ବାହାଘର କରୁଥିବା ପଣ୍ଡିତଙ୍କର ସନ୍ଦେହ ହୋଇଥିଲା। ଏ କଥା ସେ କନ୍ୟା ଘର ଲୋକଙ୍କୁ ଜଣାଇଥିଲେ। ରୀତାଙ୍କ ଘରଲୋକେ ସତ କ’ଣ ଜାଣିବା ପାଇଁ ମୋହିତଙ୍କୁ ୩୦ଟି ୧୦ ଟଙ୍କିଆ ନୋଟ୍ ଗଣିବାକୁ ଦେଇଥିଲେ। ମୋହିତ କିନ୍ତୁ ଟଙ୍କା ଗଣିପାରି ନ ଥିଲେ। ଏହାପରେ ରୀତା ବାହାଘର କରିବେ ନାହିଁ ବୋଲି ମନା କରିଦେଲେ, ଯାହାପରେ ଉଭୟଙ୍କ ପରିବାର ଭିତରେ କଥା କଟାକଟି ଆରମ୍ଭ ହୋଇଗଲା। ଘଟଣାସ୍ଥଳରେ ଶେଷରେ ପୋଲିସ ପହଞ୍ଚି ଏହାର ସମାଧାନ କରିଥିଲା। ମୋହିତ ମାନସିକ ବିକାରଗ୍ରସ୍ତ ବୋଲି ଜଣାପଡ଼ିଥିଲା। ରୀତାଙ୍କ ବାହାଘର ଠିକ୍ କରିଥିବା ମଧ୍ୟସ୍ଥି ଯେହେତୁ କନ୍ୟା ଘରର ଘନିଷ୍ଠ ସେଥିପାଇଁ ସେମାନେ ମୋହିତଙ୍କୁ ନ ଦେଖି ତାଙ୍କ ସହ ରୀତାଙ୍କ ବାହାଘର କରିବାକୁ ରାଜି ହୋଇଯାଇଥିବା ରୀତାଙ୍କ ଘର ଲୋକେ କହିଛନ୍ତି। କନ୍ୟା ବାହା ନ ହେବା ଲାଗି ଜିଦ୍ କରିବା ଯୋଗୁ ବରଯାତ୍ରୀ ଶେଷରେ ନିରାଶ ହୋଇ ଫେରିଯାଇଥିଲା।
