କୋଚି, ୧୫।୧୨: ଭାରତରେ, ଯୌତୁକ ପ୍ରଥାକୁ ଏକ ଅପରାଧ ଭାବେ ବିବେଚନା କରାଯାଇଥାଏ। ଯୌତୁକ ଯୋଗୁ ବହୁ କ୍ଷେତ୍ରରେ ଝିଅଙ୍କୁ ବିବାହ ପରେ ଅସୁବିଧାର ସମ୍ମୁଖୀନ ହେବାକୁ ପଡ଼ିଥାଏ। ତେଣୁ ଯୌତୁକ ବର୍ଗରେ କେଉଁ ସାମଗ୍ରୀକୁ ଅନ୍ତର୍ଭୁକ୍ତ କରାଯିବା ଏବଂ କାହାକୁୂ ନୁହେଁ ସେନେଇ ବିତର୍କ ମଧ୍ୟ ଲାଗି ରହିଥାଏ। ଏପରିସ୍ଥଳେ କେରଳ ହାଇକୋର୍ଟ ରାୟ ଦେଇଛନ୍ତି ଯେ, ବିବାହରେ ମାତା-ପିତାଙ୍କ ପକ୍ଷରୁ ମିଳିଥିବା ଉପହାର ଯୌତୁକ ନୁହେଁ।
ହାଇକୋର୍ଟ କହିଛନ୍ତି ଯେ, ସୁଖମୟ ଜୀବନ ପାଇଁ ବିବାହ ସମୟରେ ଝିଇକୁ ଦିଆଯାଇଥିବା ସମସ୍ତ ଉପହାର ଯୌତୁକ ନିରୋଧକ ଆଇନ-୧୯୬୧ ଅନୁଯାୟୀ ଯୌତୁକ ବର୍ଗରେ ରଖାଯାଇପାରିବ ନାହିଁ । ଜଣେ ମହିଳାଙ୍କ ଆବେଦନ ଉପରେ କୋର୍ଟର ଜଣିକିଆ ଖଣ୍ଡପୀଠ ଏଭଳି ରାୟ ଦେଇଛନ୍ତି। ବିଚାରପତି ଏମ୍.ଆର୍. ଅନିଥାଙ୍କ ନେତୃତ୍ୱରେ ଗଠିତ ଖଣ୍ଡପୀଠ ଏକ ମାମଲାର ବିଚାର କରି ଏହା କହିଛନ୍ତି।
ଠୋଡିୟୁର ଜଣେ ବାସିନ୍ଦା କୋଲ୍ଲମ ଜିଲାର ଯୌତୁକ ନିରୋଧକ ଅଫିସରଙ୍କ ନିକଟରେ ଏକ ଆଦେଶ ବିରୋଧରେ ଆବେଦନ କରିଥିଲେ। ଆଦେଶ ଅନୁଯାୟୀ, ତାଙ୍କ ପିତାମାତା ବିବାହ ସମୟରେ ଦେଇଥିବା ସମସ୍ତ ଅଳଙ୍କାର ଉପହାର ତାଙ୍କୁ ଫେରାଇବାକୁ କୁହାଯାଇଥିଲା। ଏହି ସମଗ୍ର ପ୍ରସଙ୍ଗରେ କୋର୍ଟ କହିଛନ୍ତି ଯେ ସୁନା ଅଳଙ୍କାର ଉପହାରଗୁଡ଼ିକ ଯୌତୁକ ଭାବେ ପ୍ରଦାନ କରାଯାଇଛି କି ନାହିଁ ତାହା ଅଧିକାରୀ ନିଶ୍ଚିତ କରିଛନ୍ତି କି ନାହିଁ ତାହା ସ୍ପଷ୍ଟ ହୋଇ ପାରିନାହିଁ।
ଏଥି ସହିତ, ଦୀପ୍ତି କେ.ଏସ୍ କହିଥିଲେ ଯେ ୨୦୨୦ରେ ତାଙ୍କୁ ବିବାହ ସମୟରେ ଦିଆଯାଇଥିବା ସୁନା ଅଳଙ୍କାର ତାଙ୍କୁ ଫେରାଇ ଦିଆଯାଉ। ମହିଳା ସୂଚନା ଦେଇ କହିଛନ୍ତି ଯେ ତାଙ୍କ ଅଳଙ୍କାରକୁ ବ୍ୟାଙ୍କ ଲକରରେ ରଖାଯାଇଛି। ଏଥିସହିତ ମହିଳାଙ୍କ ଦାବି ଅନୁଯାୟୀ ତାଙ୍କୁ ସୁନା ଅଳଙ୍କାର ଫେରସ୍ତ କରିବାକୁ ଅଭିଯୁକ୍ତ ସମ୍ମତି ପ୍ରଦାନ କରିଛନ୍ତି। ଯାହା ପରେ ମାମଲା ସମାପ୍ତ ହୋଇଛି।
