ପୁରୀ,୧୮।୧୧: ଓଡ଼ିଶାର ଉପକୂଳ ଅଞ୍ଚଳରେ ଏକ ବିରଳ ଘଟଣାରେ ପୁରୀ ଜିଲା ଅସ୍ତରଙ୍ଗର ଦେବୀ ନଦୀରୁ ସ୍ଥାନୀୟ ମତ୍ସ୍ୟଜୀବୀମାନେ ଶହେ କିଲୋଗ୍ରାମରୁ ଅଧିକ ଓଜନର ଏକ ବିଶାଳ ‘ଶାଙ୍କୁଚ’ ମାଛ ଧରିଛନ୍ତି। ପ୍ରାୟ ୧୨ ଫୁଟ ଲମ୍ବର ଏହି ବିରାଟ ମାଛଟି ମାଛ ଧରିବା ସମୟରେ ପ୍ରାୟ କୋଡ଼ିଏ ଜଣ ମତ୍ସ୍ୟଜୀବୀଙ୍କ ଜାଲରେ ପଡ଼ିଥିଲା।
କାଳିଆକଣ ଗ୍ରାମର ମତ୍ସ୍ୟଜୀବୀମାନେ ପ୍ରଥମେ ଜାଲରେ ପଡ଼ିଥିବା ଭାରୀ ଟାଣକୁ କୌଣସି ଆବର୍ଜନା ବୋଲି ଭାବିଥିଲେ। କିନ୍ତୁ କିଛି ସମୟ ପରେ ଏହା ଏକ ବିଶାଳ ମାଛ ବୋଲି ଜାଣିବାକୁ ପାଇଥିଲେ। ପ୍ରାୟ ଦୁଇ ଘଣ୍ଟାର ଅକ୍ଳାନ୍ତ ପରିଶ୍ରମ ପରେ ସେମାନେ ମାଛକୁ ନଦୀକୂଳକୁ ଆଣିବାରେ ସଫଳ ହୋଇଥିଲେ। ଏହି ବିରଳ ଦୃଶ୍ୟ ଦେଖିବାକୁ ନଦୀକୂଳରେ ବହୁ ସଂଖ୍ୟକ ଲୋକଙ୍କ ଭିଡ଼ ଜମିଥିଲା।
ସୂଚନା ଅନୁଯାୟୀ, ଏହି ବିଶାଳ ମାଛଟିକୁ ତୁରନ୍ତ ୫୦,୦୦୦ ଟଙ୍କାରେ ବିକ୍ରି କରାଯାଇଛି। ପରେ ଏହାକୁ କୋଲକାତା ପଠାଯାଇଛି, ଯେଉଁଠାରେ ଏପରି ବଡ଼ ନଦୀ ମାଛର ହୋଲସେଲ ବଜାରରେ ଭଲ ମୂଲ୍ୟ ମିଳିଥାଏ। ଉପସ୍ଥିତ ଲୋକମାନେ ଏହାକୁ “ନିକଟ ଅତୀତର ସବୁଠାରୁ ବଡ଼ ମାଛ ଧରା” ବୋଲି କହିଛନ୍ତି।
