କେସିଙ୍ଗା,୧୦ା୧(ତୁମେଶ୍ୱର ସାହୁ): କଳାହାଣ୍ଡି ଜିଲା କେସିଙ୍ଗା ଏନ୍ଏସି ସ୍ତରୀୟ କଳାହାଣ୍ଡି ଉତ୍ସବ ଘୁମୁରା ୨୦୨୫ ଶୁକ୍ରବାର ଅନୁଷ୍ଠିତ ହୋଇଯାଇଛି। ଏହି ଉପଲକ୍ଷେ ସହରସ୍ଥିତ ବୁଢାଡ଼ଙ୍ଗର ମନ୍ଦିରରେ ପୂଜାର୍ଚ୍ଚନା କରି ଏକ ମଶାଲ ଯାତ୍ରା ଆନନ୍ଦ ଉଲ୍ଲାସର ସହିତ ମହାଆଡମ୍ବରରେ ଘୁମୁରା, ଆଦିବାସୀ ନୃତ୍ୟ ସହ ସହର ପରିକ୍ରମା ବେଳେ ଦୁଲୁକି ଉଠିଥିଲା ସହର ଜାତୀୟ ରାଜପଥ। ଏହି ମଶାଲ ଯାତ୍ରାରେ ଅଧ୍ୟକ୍ଷ ନୃପରାଜ ଯାଦବ ମଶାଲ ଧରି ସହର ପରିକ୍ରମା କରି ସରକାରୀ ଉଚ୍ଚ ବିଦ୍ୟାଳୟ ଖେଳ ପଡ଼ିଆ ବୁଢ଼ାରାଜା ମଞ୍ଚ ରେ ମଶାଲ ସ୍ଥାପନ କରାଯାଇ ଥିଲା।
ଏହି ମାଶାଲ ଯାତ୍ରାରେ ସମସ୍ତ ପାରିଷଦ ବୃନ୍ଦ,ଉପାଧ୍ୟକ୍ଷା , ନିର୍ବାହୀ ଅଧିକାରୀ ପ୍ରଣବ କୁମାର ଚାନ୍ଦ,ସମସ୍ତ କର୍ମଚାରୀଙ୍କ ସମେତ ବିଭିନ୍ନ ମହିଳା ଗ୍ରୁପ ଯୋଗଦାନ କରିଥିଲେ। ଏହି ମଞ୍ଚରେ ଲୋକନୃତ୍ୟ, ଲୋକଗୀତ, ଝୋଟି, ହୁଳହୁଳି, ମୁରୁଜ, ଶଙ୍ଖ ଫୁଙ୍କା, କବିତା ପାଠୋତ୍ସବ ଇତ୍ୟାଦି ଅନୁଷ୍ଠିତ ହୋଇଥିଲା।
ଏହି ଉତ୍ସବ ପାଳନ ଅବସରରେ କେସିଙ୍ଗା ସହରର ଜନସାଧାରଣଙ୍କ ପାଇଁ ବିଭିନ୍ନ ପ୍ରତିଯୋଗିତା, ଲୋକଗୀତ ଓ ଲୋକନୃତ୍ୟ ଭଳି ଆକର୍ଷଣୀୟ ପ୍ରତିଯୋଗିତା ସହ କବି ଓ କବୟିତ୍ରୀମାନଙ୍କ ପାଇଁ ମଧ୍ୟ କବିତା ପାଠୋତ୍ସବର ଆୟୋଜନ କରାଯାଇଥିଲା। ଅପରାହ୍ନରେ ସାରସ୍ବତ ସମାରୋହର ପରିସମାପ୍ତି ପରେ ଓଡ଼ିଶାର ଲବ୍ଧପ୍ରତିଷ୍ଠିତ ସାଂସ୍କୃତିକ ଦଳ ଏବଂ କେସିଙ୍ଗା ସହରର ବିଭିନ୍ନ ଶିକ୍ଷାନୁଷ୍ଠାନ ଏବଂ ସାଂସ୍କୃତିକ ଦଳଗୁଡିକ ପକ୍ଷରୁ ଚିତ୍ତାକର୍ଷକ ସାଂସ୍କୃତିକ କାର୍ଯ୍ୟକ୍ରମ ପରିବେଷଣ କରାଯାଇଥିଲା।
