ନୂଆଦିଲ୍ଲୀ,୮।୪ : ଜମ୍ମୁ-କଶ୍ମୀରର ପୂର୍ବତନ ମୁଖ୍ୟମନ୍ତ୍ରୀ ଗୁଲାମ ନବୀ ଆଜାଦ ଏକ ସାକ୍ଷାତକାରରେ ଆସାମ ମୁଖ୍ୟମନ୍ତ୍ରୀ ହିମନ୍ତ ବିଶ୍ୱ ଶର୍ମା କଂଗ୍ରେସ ଛାଡିବା ବିଷୟରେ ଏକ ମଜାଦାର କାହାଣୀ କହିଛନ୍ତି। ଏହି ସମୟରେ ଗୁଲାମ ନବୀ ଆଜାଦ ମଧ୍ୟ ରାହୁଲ ଗାନ୍ଧୀଙ୍କ ବିରୋଧରେ ଗୁରୁତର ଅଭିଯୋଗ ଆଣିଥିଲେ। ହିମନ୍ତ ଗୁଲାମ ନବୀଙ୍କ ଏହି କାହାଣୀ ଉପରେ ନିଜର ପ୍ରତିକ୍ରିୟା ରଖିଛନ୍ତି। ସେ ଏକ ଟୁଇଟରେ ଲେଖିଛନ୍ତି, ଗୁଲାମ ନବୀ ଆଜାଦଙ୍କ ବିଫଳ ଉଦ୍ୟମ ପରେ ମଧ୍ୟ ମୁଁ ୧୨ ମାସ କଂଗ୍ରେସରେ ରହିଥିଲି।
‘ମୋଜୋ’କୁ ଦେଇଥିବା ଏକ ସାକ୍ଷାତକାରରେ ଗୁଲାମ ନବୀ ଆଜାଦ କହିଛନ୍ତି, ହିମନ୍ତ କଂଗ୍ରେସରେ ଥିବା ସମୟରେ ୪୦-୪୫ ଜଣ ବିଧାୟକଙ୍କୁ ନିଜ ସମର୍ଥନରେ ନେଇ ବିଦ୍ରୋହ କରିଥିଲେ। ହିମନ୍ତ ମୋ ନିକଟତର ଥିଲେ। ଏଥିସହ ତତ୍କାଳୀନ ରାଜ୍ୟପାଳ ଜେ.ବି ପଟ୍ଟନାୟକ ମଧ୍ୟ ମୋର ନିକଟତର ଥିଲେ। ଏଭଳି ପରିସ୍ଥିତିରେ ପରିସ୍ଥିତିକୁ ନିୟନ୍ତ୍ରଣ କରିବାର ଦାୟିତ୍ୱ ମୋତେ ଦିଆଯାଇଥିଲା ।
ମୁଁ ହିମନ୍ତଙ୍କୁ ତାଙ୍କ ସମର୍ଥକ ବିଧାୟକଙ୍କ ସହ ଦିଲ୍ଲୀ ଆସିବାକୁ କହିଥିଲି। ତତ୍କାଳୀନ ଆସାମ ମୁଖ୍ୟମନ୍ତ୍ରୀ ତରୁଣ ଗୋଗୋଇଙ୍କୁ ମଧ୍ୟ ତାଙ୍କ ସମର୍ଥକ ବିଧାୟକଙ୍କ ସହ ଦିଲ୍ଲୀ ଆସିବାକୁ କୁହାଯାଇଥିଲା। ପରିସ୍ଥିତି ଦେଖି ଜଣାପଡୁଥିଲା ହିମନ୍ତଙ୍କ ପକ୍ଷରେ ଅଧିକ ସମର୍ଥନ ରହିଛି। ମୁଁ ସୋନିଆ ଗାନ୍ଧୀଙ୍କୁ ପରିସ୍ଥିତି ବିଷୟରେ ଜଣାଇଥିଲି।
ଯେତେବେଳେ ମୁଁ ଆସାମ ଯିବାକୁ ପ୍ରସ୍ତୁତ ହେଉଥିଲି, ସେତେବେଳେ ରାହୁଲ ଗାନ୍ଧୀଙ୍କଠାରୁ ଏକ କଲ ପାଇଲି। ରାହୁଲ ପଚାରିଲେ ଆମେ ଆସାମ ମୁଖ୍ୟମନ୍ତ୍ରୀଙ୍କୁ ବଦଳାଇବାକୁ ଯାଉଛୁ କି? ଏହାପରେ ରାହୁଲ ଆମକୁ ଆସାମ ଯିବାକୁ ମନା କରିଦେଇଥିଲେ। ରାହୁଲ ସେତେବେଳେ ଦଳର ଅଧ୍ୟକ୍ଷ ମଧ୍ୟ ନ ଥିଲେ। ଗୁଲାମ ନବୀ ଯେତେବେଳେ ସେ ରାହୁଲଙ୍କୁ ଭେଟିବାକୁ ଆସିଥିଲେ, ସେ ଦେଖିଲେ ରାହୁଲ ଆସାମର ତତ୍କାଳୀନ ମୁଖ୍ୟମନ୍ତ୍ରୀ ତରୁଣ ଗୋଗୋଇ ଏବଂ ତାଙ୍କ ପୁଅ ଗୌରବ ଗୋଗୋଇଙ୍କ ସହ ଚା ପିଉଛନ୍ତି। ରାହୁଲ ଗୁଲାମ ନବୀଙ୍କୁ ପ୍ରଶ୍ନ କରିଥିଲେ ଯେ ସେମାନେ ତରୁଣ ଗୋଗୋଇଙ୍କୁ କାହିଁକି ଅସୁବିଧାରେ ପକାଉଛନ୍ତି? ମୁଁ ଉତ୍ତର ଦେଇଥିଲି ଯେ ମୁଁ ଅସୁବିଧା କରୁନାହିଁ, ମୁଁ କେବଳ ଦାୟିତ୍ୱ ତୁଲାଉଛି ।
ମୁଁ ରାହୁଲଙ୍କୁ କହିଥିଲି ହିମନ୍ତ ଦଳ ଛାଡିବେ। ଏହା ଉପରେ ରାହୁଲ କହିଥିଲେ ତାଙ୍କୁ ଯିବାକୁ ଦିଅ। ରାହୁଲ କହିଥିଲେ ତାଙ୍କୁ ଆରଏସଏସରେ ଯୋଗେ ଦବାକୁ ଛାଡି ଦିଅ।
ଗୁଲାମ ନବୀଙ୍କ ସାକ୍ଷାତକାରର ଏହି ଭିଡିଓର ଜବାବ ଦେଇ ଆସାମର ବର୍ତ୍ତମାନର ମୁଖ୍ୟମନ୍ତ୍ରୀ ହିମନ୍ତ ଟୁଇଟ କରି କହିଛନ୍ତି ଗୁଲାମ ନବୀ ବିବାଦର ସମାଧାନ ପାଇଁ ବିଫଳ ଉଦ୍ୟମ କରିଥିବା ସତ୍ତ୍ୱେ ମୁଁ ୧୨ ମାସ କଂଗ୍ରେସ ଦଳରେ ରହିଥିଲି। ସେହି ୧୨ ମାସର କାହାଣୀ ମଧ୍ୟ ଆକର୍ଷଣୀୟ । ମୁଁ ଶେଷରେ ଅଗଷ୍ଟ ୨୦୧୫ ରେ କଂଗ୍ରେସ ଦଳ ଛାଡିଥିଲି।
