ନୂଆଦିଲ୍ଲୀ,୭।୭ : କରୋନା ମହାମାରୀ ଯୋଗୁ ଦେଶର ଅର୍ଥ ବ୍ୟବସ୍ଥାକୁ ବୃହତ୍ ପରିମାଣର କ୍ଷତି ହୋଇଥିବା ସରକାର ମାନିଛନ୍ତି। ଦେଶର ଅର୍ଥନୈତିକ ଅଭିବୃଦ୍ଧି ଚଳିତ ଆର୍ଥତ୍କ ବର୍ଷରେ ୪.୫% ଖସିବା ନେଇ ଆକଳନ କରାଯାଇଛି। ଅନ୍ତର୍ଜାତୀୟ ମୁଦ୍ରା ପାଣ୍ଠି(ଆଇଏମ୍ଏଫ୍) ପକ୍ଷରୁ ଏହାର ଓ୍ବାର୍ଲଡ ଇକୋନୋମିକ ଆଉଟଲୁକ୍ରେ ଭାରତର ଅଭିବୃଦ୍ଧି ଖସିବା ନେଇ ଉଲ୍ଲେଖ କରାଯାଇଛି। ଏହି ପୂର୍ବାନୁମାନ ଆଧାରରେ ଭାରତର ଅଭିବୃଦ୍ଧି କ୍ଷତିଗ୍ରସ୍ତ ରହିବ ବୋଲି ଅର୍ଥ ମନ୍ତ୍ରଣାଳୟ ପକ୍ଷରୁ ସୋମବାର ଏକ ରିପୋର୍ଟରେ ପ୍ରକାଶ ପାଇଛି। ଚଳିତ ବର୍ଷ ଏପ୍ରିଲରେ ଆଇଏମ୍ଏଫ୍ ଯେଉଁ ପୂର୍ବାନୁମାନ କରିଥିଲା ସେହି ତୁଳନାରେ ଦେଶର ଜିଡିପି ୬.୪ % ଖସିବ ବୋଲି ଆଶଙ୍କା କରାଯାଇଛି। ଦେଶର ବିକାଶ ହାର ୧.୯% ରହିବ ବୋଲି ସରକାର ଏପ୍ରିଲରେ ପୂର୍ବାନୁମାନ କରିଥିଲେ।
ଆଇଏମ୍ଏଫ୍ ଜୁନରେ ପ୍ରକାଶ କରିଥିବା ଏହାର ରିପୋର୍ଟରେ କହିଥିଲା ଯେ, ସାରା ବିଶ୍ୱର ଅର୍ଥ ବ୍ୟବସ୍ଥା ୨୦୨୦ରେ ୪.୯% ହ୍ରାସ ଘଟିବ। ଏପ୍ରିଲ ପୂର୍ବାନୁମାନଠାରୁ ଏହା ୧.୯% ଅଧିକ ରହିଛି। ବିଶ୍ୱ ଅର୍ଥ ବ୍ୟବସ୍ଥା ୩% ଖସିଯିବ ବୋଲି ପୂର୍ବରୁ ଆଶଙ୍କା କରାଯାଇଥିଲା। କରୋନା ଯୋଗୁ ବିଶ୍ୱର ଅଧିକାଂଶ ଦେଶ କ୍ଷତି ସହିବେ ବୋଲି ରିପୋର୍ଟରେ କୁହାଯାଇଥିଲା। ବିକଶିତ ଦେଶଗୁଡ଼ିକରେ ୮% ଏବଂ ଅଭିବୃଦ୍ଧିଶୀଳ ଅର୍ଥ ବ୍ୟବସ୍ଥାଗୁଡିକର ବିକାଶ ହାର ୩% ଖସିପାରେ। ୨୦୧୯-୨୦ରେ ଭାରତର ଜିଡିପି ଅଭିବୃଦ୍ଧି ୪.୨% ରହିଛି। ଏହାର ପୂର୍ବ ଆର୍ଥତ୍କ ବର୍ଷରେ ଏହା ୬.୧% ରହିଥିଲା।
ଅର୍ଥ ମନ୍ତ୍ରଣାଳୟ ରିପୋର୍ଟରେ କୁହାଯାଇଛି ଯେ, ୨୦୧୯-୨୦ରେ ସରକାର ୧୩.୫୬ ଲକ୍ଷ କୋଟି ଟଙ୍କାର ନେଟ୍ ଟିକସ ସଂଗ୍ରହ କରିଥିଲେ। ଏହା ପରିବର୍ତ୍ତିତ ଧାର୍ଯ୍ୟଲକ୍ଷ୍ୟଠାରୁ ୯.୯% ନିମ୍ନରେ ରହିଛି। ଦେଶରେ ଆର୍ଥତ୍କ କାର୍ଯ୍ୟକଳାପ ହ୍ରାସ ହେବା ଯୋଗୁ ଚଳିତ ଆର୍ଥତ୍କ ବର୍ଷ ପ୍ରଥମ ୨ ମାସରେ ଟିକସ ସଂଗ୍ରହ ହ୍ରାସ ଘଟିଛି। ମେ ୨୦୨୦ ସୁଦ୍ଧା ବିତ୍ତୀୟ ନିଅଣ୍ଟ ୪.୭ ଲକ୍ଷ କୋଟି ଟଙ୍କାରେ ପହଞ୍ଚିଛି। ରାଜସ୍ବ ସଂଗ୍ରହରେ ଋଣାତ୍ମକ ସ୍ଥିତି ଉପୁଜିବା ଯୋଗୁ ଏହା ୬୮.୯% ସ୍ତରରେ ରହିଛି। ବ୍ୟକ୍ତିଗତ ଆୟକରରେ ଅଭିବୃଦ୍ଧିରେ ନକାରାତ୍ମକ ପ୍ରଭାବ ସହ ସମସ୍ତ ପରୋକ୍ଷ ଟିକସ ସଂଗ୍ରହ ଏବଂ ଅଣ ଟିକସ ରାଜସ୍ବ ସଂଗ୍ରହ ବର୍ତ୍ତମାନ ଆଶାନୁରୂପ ହେଉନାହିଁ। ବଜାର ଉପରେ ପଡୁଥିବା ପ୍ରଭାବକୁ କମ୍ କରିବା ଲାଗି ରିଜର୍ଭ ବ୍ୟାଙ୍କ ପକ୍ଷରୁ ସ୍ବଳ୍ପ ମିଆଦୀ ଏବଂ ଦୀର୍ଘ ମିଆଦୀ ପଦକ୍ଷେପ ଗ୍ରହଣ କରାଯାଇଛି।