ନୂଆଦିଲ୍ଲୀ,୨ା୯: ଭାରତୀୟ ଅର୍ଥନୀତିର GDP ତଥ୍ୟକୁ ନେଇ ଉଠିଥିବା ପ୍ରଶ୍ନ ଉପରେ ସରକାର ଏବେ ସ୍ପଷ୍ଟୀକରଣ ଦେଇଛନ୍ତି । ଅଗଷ୍ଟ ୩୧ରେ ପରିସଂଖ୍ୟାନ ଓ କାର୍ଯ୍ୟକ୍ରମ କାର୍ଯ୍ୟାନ୍ୱୟନ ମନ୍ତ୍ରଣାଳୟ (MoSPI) ପକ୍ଷରୁ ଜାରି ହୋଇଥିବା ତଥ୍ୟ ଅନୁସାରେ, ୨୦୨୭ ଆର୍ଥିକ ବର୍ଷର ପ୍ରଥମ ତ୍ରୈମାସିକରେ ଭାରତର GDP ଅଭିବୃଦ୍ଧି ହାର ୭.୮%ରେ ପହଞ୍ଚିଛି। ଏହି ତଥ୍ୟ ସାମ୍ନାକୁ ଆସିବା ପରେ ଚର୍ଚ୍ଚା ବଢ଼ିଥିଲା । ବିରୋଧୀ ଦଳଠାରୁ ଆରମ୍ଭ କରି ସାଧାରଣ ଲୋକଙ୍କ ପର୍ଯ୍ୟନ୍ତ କିଛି ମହଲରେ GDP ଆକଳନକୁ ନେଇ ପ୍ରଶ୍ନ ଉଠିଥିଲା। ଏହାର ଦୁଇ ଦିନ ପରେ ସରକାର ପକ୍ଷରୁ ଏହି ଅଭିଯୋଗ ଉପରେ ସ୍ପଷ୍ଟୀକରଣ ଦିଆଯାଇଛି।
ସରକାର ସ୍ପଷ୍ଟ କରିଛନ୍ତି ଯେ ଚଳିତ ବର୍ଷର ବୃଦ୍ଧି ହାରକୁ ଅଧିକ ଭଲ ଦେଖାଇବା ପାଇଁ ପୂର୍ବବର୍ଷର GDP ତଥ୍ୟକୁ ଜାଣିଶୁଣି କମାଯାଇନାହିଁ । ୨୦୨୫-୨୬ ଆର୍ଥିକ ବର୍ଷର ପ୍ରଥମ ତ୍ରୈମାସିକର GDP ତଥ୍ୟରେ ପରିବର୍ତ୍ତନକୁ ନେଇ ମଧ୍ୟ ସରକାର ଜବାବ ରଖିଛନ୍ତି। ବର୍ଷ ୨୦୨୨-୨୩, ଅପଡେଟ୍ ଡାଟା ସହ ନୂଆ IIP ଏବଂ PPI ସିରିଜ୍ ସାମିଲ ହୋଇଥିବାରୁ ପୁରୁଣା ତଥ୍ୟରେ ସଂଶୋଧନ ହୋଇଛି। ତେଣୁ ପୁରୁଣା ଓ ନୂଆ GDP ସିରିଜ୍କୁ ସିଧାସଳଖ ତୁଳନା କରିବା ଠିକ୍ ନୁହେଁ ବୋଲି ସରକାର କହିଛନ୍ତି।
ମ୍ୟାନୁଫ୍ୟାକ୍ଚରିଂ କ୍ଷେତ୍ରରେ କଞ୍ଚାମାଲର ଦାମ ବଢ଼ିବାର ପ୍ରଭାବ ମଧ୍ୟ ଦେଖିବାକୁ ମିଳିଛି । ରିଅଲ୍ ଗ୍ରସ୍ ଭାଲ୍ୟୁ ଆଡେଡ୍ (GVA) ଅଭିବୃଦ୍ଧି ୯.୨ ପ୍ରତିଶତ ଥିବାବେଳେ ନୋମିନାଲ୍ ବୃଦ୍ଧି ୭.୭ ପ୍ରତିଶତ ରହିଛି। ଏହି କାରଣରୁ ଡିଫ୍ଲେଟର -୧.୫ ପ୍ରତିଶତ ଦେଖାଯାଇଛି। ତେବେ ଏହାର ଅର୍ଥ ଉତ୍ପାଦର ଦାମ କମିଯାଇଛି ବୋଲି ନୁହେଁ ବୋଲି ସରକାର ସ୍ପଷ୍ଟ କରିଛନ୍ତି। ସରକାରଙ୍କ କହିବା ଅନୁଯାୟୀ, CPI, WPI ଏବଂ GDP ଡିଫ୍ଲେଟର ଅଲଗା ଅଲଗା ଦିଗର ମୂଲ୍ୟ ପରିବର୍ତ୍ତନକୁ ମାପିଥାଏ।
ମାଇନିଂ କ୍ଷେତ୍ରରେ ଉତ୍ପାଦନ କମିଥିଲେ ମଧ୍ୟ କ୍ରୁଡ୍ ଅଏଲ୍, ଗ୍ୟାସ୍ ଓ ଧାତୁର ଅନ୍ତର୍ଜାତୀୟ ଦର ବଢ଼ିଛି। ଏହା ଯୋଗୁଁ ରିଅଲ୍ GVA -୨.୪ ପ୍ରତିଶତ ଥିବାବେଳେ ନୋମିନାଲ୍ GVA ୨୨.୩ ପ୍ରତିଶତ ରହିଛି।ସେହିପରି GDPକୁ ଉତ୍ପାଦନ ଓ ଖର୍ଚ୍ଚ—ଦୁଇଟି ଦିଗରୁ ଆକଳନ କରାଯିବା ବେଳେ ଯେଉଁ ପାର୍ଥକ୍ୟ ରହିଥାଏ, ତାହାକୁ ‘ଷ୍ଟାଟିଷ୍ଟିକାଲ୍ ଡିସ୍କ୍ରିପାନ୍ସି’ କୁହାଯାଏ। ପ୍ରାରମ୍ଭିକ GDP ଆକଳନରେ ଏଭଳି ପାର୍ଥକ୍ୟ ରହିବା ସାଧାରଣ ଏବଂ ପରବର୍ତ୍ତୀ ସଂଶୋଧନରେ ଏହା କମିପାରେ।
ଦେଶରେ ମହଙ୍ଗା ମାଡ଼ ଓ ଅନ୍ତର୍ଜାତୀୟ ପରିସ୍ଥିତିକୁ ନେଇ ଚିନ୍ତା ବଢ଼ିଥିବା ସମୟରେ GDP ୭.୮ ପ୍ରତିଶତ ବୃଦ୍ଧିର ତଥ୍ୟ ସାମ୍ନାକୁ ଆସିଥିଲା। ପେଟ୍ରୋଲ-ଡିଜେଲ୍, ସୁନା-ରୁପା ଓ ଦୈନନ୍ଦିନ ସାମଗ୍ରୀର ଦରକୁ ନେଇ ଲୋକଙ୍କ ମଧ୍ୟରେ ଚିନ୍ତା ରହିଥିବାରୁ ଏତେ ମହଙ୍ଗାଇ ମଧ୍ୟରେ ଅର୍ଥନୀତି କିପରି ଏତେ ଦ୍ରୁତ ଗତିରେ ବଢ଼ୁଛି ବୋଲି ପ୍ରଶ୍ନ ଉଠିଥିଲା।
