ନୂଆଦିଲ୍ଲୀ,୭ା୧: ଜାତୀୟ ଓ ଅନ୍ତର୍ଜାତୀୟ ସମସ୍ୟା ମଧ୍ୟରେ ଦେଶର ମୋଟ ଘରୋଇ ଉତ୍ପାଦ(ଜିଡିପି)ର ପୂର୍ବାନୁମାନ କରାଯାଇଛି। ଏପରିକି ଚଳିତ ଆର୍ଥିକ ବର୍ଷ ପାଇଁ ଭାରତର ଜିଡିପି ଅଭିବୃଦ୍ଧି ହାର ୭% ମଧ୍ୟରେ ରହିବ ବୋଲି କେନ୍ଦ୍ର ସରକାର ପକ୍ଷରୁ ପୂର୍ବାନୁମାନ କରାଯାଇଛି। ୨୦୨୨-୨୩ ଆର୍ଥିକ ବର୍ଷରେ ଦେଶର ଜିଡିପି ଅଭିବୃଦ୍ଧି ହାର ୭% ରହିବା ନେଇ ଜାତୀୟ ପରିସଂଖ୍ୟାନ କାର୍ଯ୍ୟାଳୟ (ଏନ୍ଏସ୍ଓ)ପକ୍ଷରୁ ଆକଳନ କରାଯାଇଛି। ଉଲ୍ଲେଖଯୋଗ୍ୟ, ୨୦୨୧-୨୨ ଆର୍ଥକ ବର୍ଷରେ ଦେଶର ଅଭିବୃଦ୍ଧି ହାର ୮.୭% ରହିଥିଲା। ସେହିଭଳି ଏନ୍ଏସ୍ଓ ମଧ୍ୟ ୨୦୨୨-୨୩ ଆର୍ଥିକ ବର୍ଷ ପାଇଁ ଜାତୀୟ ଆୟର ପ୍ରଥମ ଅଗ୍ରିମ ଆକଳନ (ଏଫ୍ଏଇ) ସମ୍ପର୍କରେ ଶୁକ୍ରବାର ଘୋଷଣା କରାଯାଇଛି। ଅପରପକ୍ଷରେ ଗତ ମାସରେ ରିଜର୍ଭ ବ୍ୟାଙ୍କ ପକ୍ଷରୁ ଜାରି ପୂର୍ବାନୁମାନରେ ଅଭିବୃଦ୍ଧି ହାରକୁ ମଧ୍ୟ ୬.୮%କୁ ହ୍ରାସ କରାଯାଇଥିଲା। ଫଳରେ ଦେଶର ଜିଡିପି ଅଭିବୃଦ୍ଧିର ହାର ହ୍ରାସ ହୋଇପାରେ ବୋଲି ଆଶଙ୍କା କରାଯାଉଛି। ଏପରିକି ୨୦୨୩ ଫେବୃୟାରୀ ପହିଲାରେ ୨୦୨୩-୨୪ ଆର୍ଥିକ ବର୍ଷର ବଜେଟ ପୂର୍ବରୁ ଏହି ପରିସଂଖ୍ୟାନ ଦେଶ ପାଇଁ ବେଶ୍ ଗୁରୁତ୍ୱପୂର୍ଣ୍ଣ। ସୂଚନାଯୋଗ୍ୟ, ୨୦୨୨ ମାର୍ଚ୍ଚ ୩୧ରେ ଶେଷ ହୋଇଥିବା ୨୦୨୧-୨୨ ଆର୍ଥିକ ବର୍ଷରେ ଭାରତର ଜିଡିପି ୮.୭% ହାରରେ ଥିଲା। ଏହି ଦୃଷ୍ଟିରୁ ଆର୍ଥିକ ବର୍ଷ ୨୦୨୨-୨୩ ରେ ଜିଡିପି ଅଭିବୃଦ୍ଧି ବଢ଼ିବା ବଦଳରେ କମିବା ଆଶଙ୍କ ନେଇ ବିଭିନ୍ନ ସଂସ୍ଥା ଭିନ୍ନ ଅନୁମାନ କରିଥିବା ଜଣାପଡ଼ିଛି। ଗତ ମାସରେ ରିଜର୍ଭ ବ୍ୟାଙ୍କ ଭୂ-ରାଜନୀତି ଏବଂ ବୈଶ୍ୱିକ ଆର୍ଥିକ ପରିସ୍ଥିତି ପାଇଁ ଚଳିତ ଆର୍ଥିକ ବର୍ଷ ପାଇଁ ଦେଶର ଜିଡିପି ବୃଦ୍ଧି ଅନୁମାନକୁ ୭% କମାଇ ୬.୮%ରେ ଆକଳନ କରିଥିଲା। ସେହିଭଳି କେନ୍ଦ୍ରୀୟ ବ୍ୟାଙ୍କ ୨୦୨୨-୨୩ ବର୍ଷ ପାଇଁ ବାସ୍ତବିକ ଜିଡିପି ଅଭିବୃଦ୍ଧି ୬.୯%ରେ ରଖିବା ଥିବାବେଳେ ଚଳିତ ଆର୍ଥିକ ବର୍ଷର ୩ୟ ତ୍ରୈମାସରେ ୪.୪% ଏବଂ ୪ର୍ଥ ତ୍ରୈମାସରେ ୪.୨% ଅଭିବୃଦ୍ଧି ରହିବା ନେଇ ପୂର୍ବ ଅନୁମାନ କରିଥିଲା। ସେହିପରି ୨୦୨୨ ଏପ୍ରିଲରେ ଆର୍ବିଆଇ ଦେଶର ଜିଡିପି ଅଭିବୃଦ୍ଧିର ଅନୁମାନ ୭.୮%ରୁ ହ୍ରାସ କରି ୭.୨% କରିଥିଲା। ପରେ ସେପ୍ଟେମ୍ବରରେ ଏହାକୁ ହ୍ରାସ କରି ୭% କରିଥିଲା। ଏହା ପୂର୍ବରୁ ଆଇଏମ୍ଏଫ୍ ୨୦୨୨ ଜୁଲାଇରେ ଦେଶର ଜିଡିପି ଅନୁମାନ ୭.୪% ରୁ ହ୍ରାସ କରି ୬.୮% କରିଥିଲା। ତେବେ ବିଶ୍ୱବ୍ୟାଙ୍କ ନିଜର ଜିଡିପି ପୂର୍ବ ଅନୁମାନ ୬.୫% କୁ ବଢ଼ାଇ ୬.୯% କରିଥିଲା। ସେହିପରି ଏଡିବି ଆର୍ଥିକ ବର୍ଷ ୨୦୨୨-୨୩ ପାଇଁ ଭାରତର ବିକାଶ ପୂର୍ବାନୁମାନକୁ ୭% ରେ ଅପରିବର୍ତ୍ତିତ ରଖିଛି।
