ଜେନେଭା, ୮।୯: ଗାଜା ଷ୍ଟ୍ରିପ୍ରେ ଥିବା ପାଲେଷ୍ଟିନୀୟ ଶିଶୁମାନେ ଏଣିକି ସାରା ବିଶ୍ୱ ସହ ଯୋଡ଼ି ହୋଇପାରିବେ। କାରଣ ସେମାନଙ୍କୁ ସହଯୋଗ କରିବାକୁ ଜାତିସଂଘ ଆଗେଇ ଆସିଛି। ଜାତିସଂଘ ପକ୍ଷରୁ ସେମାନଙ୍କୁ ଟାବ୍ଲେଟ ବଣ୍ଟନ କରାଯାଇଛି। ଗାଜା ଜନସଂଖ୍ୟା ୨.୩ ନିୟୁତ ହୋଇଥିବାବେଳେ ଏହାର ପ୍ରାୟ ଅଧା ହେଉଛନ୍ତି ଶିଶୁ। ସେମାନଙ୍କ ମଧ୍ୟରୁ ଅଧିକାଂଶ ଇସ୍ଲାମିକ୍ ମୁଭ୍ଭେଣ୍ଟ ହମାସ୍ ଦ୍ୱାରା ଶାସିତ ଏହି ଉପକୂଳ ଭୂଖଣ୍ଡରେ ଆବଦ୍ଧ ହୋଇ ରହିଛନ୍ତି। ଏହାକୁ ଦୃଷ୍ଟିରେ ରଖି ପାଲେଷ୍ଟିନୀୟଙ୍କ ପାଇଁ ଜାତିସଂଘ ସଂସ୍ଥା ୟୁଏନ୍ଆର୍ଡବ୍ଲ୍ୟୁଏ ପକ୍ଷରୁ ପରିଚାଳିତ ସ୍କୁଲଗୁଡ଼ିକରେ ଚଳିତ ସପ୍ତାହରେ ୮୯୦ ଛାତ୍ରୀଛାତ୍ରଙ୍କୁ ଟାବ୍ଲେଟ ବଣ୍ଟନ କରାଯାଇଛି। ଆଗକୁ ଟାବ୍ଲେଟ୍ ବଣ୍ଟନ କାର୍ଯ୍ୟକ୍ରମକୁ ବ୍ୟାପକ କରାଯିବ।
ଫଳରେ ଏହି ଛାତ୍ରୀଛାତ୍ରମାନେ ଡିଜିଟାଲାଇଜ୍ଡ ଓ୍ବାଲର୍ଡ ସହ ନିଜକୁ ଯୋଡ଼ି ଜ୍ଞାନ ଆହରଣ କରିପାରିବେ ବୋଲି ସଂସ୍ଥାର ଗାଜା ଡାଇରେକ୍ଟର ଥୋମାସ୍ ହ୍ବାଇଟ୍ କହିଛନ୍ତି। ଇସ୍ରାଏଲ୍ ପକ୍ଷରୁ ଦୀର୍ଘ ୧୫ ବର୍ଷ ଧରି ଲଗାଯାଇଥିବା କଟକଣା ଯୋଗୁ ଗାଜାର ଅର୍ଥନୀତି ଦୁର୍ବଳ ହୋଇଛି। ଫଳରେ ଗାଜାର ୭୪% ସ୍ନାତକ ବେକାର ହୋଇଯାଇଛନ୍ତି।
ସେମାନଙ୍କ ହାତରେ ଟାବ୍ଲେଟ୍ ରହିଲେ ଆଗକୁ ବିଭିନ୍ନ କମ୍ପାନୀରେ ନିଯୁକ୍ତି ସୁଯୋଗ ପାଇ ଅର୍ଥ ଉପାର୍ଜନ କରିପାରିବେ ବୋଲି ପାଲେଷ୍ଟିନୀୟ ସେଣ୍ଟ୍ରାଲ ବ୍ୟୁରୋ ଅଫ୍ ଷ୍ଟାଟିଷ୍ଟିକ୍ସ ପକ୍ଷରୁ କୁହାଯାଇଛି। ତେବେ ଗାଜାରେ ବାରମ୍ବର ବିଦ୍ୟୁତ୍ କାଟ୍ ଓ ସୀମିତ ୨ଜି ଇଣ୍ଟରନେଟ ସେବା ଏବେ ମଧ୍ୟ ଚ୍ୟାଲେଞ୍ଜ ହୋଇ ରହିଛି।
