ଗାଜା ସିଟି,୧୪ା୫:ଇସ୍ରାଏଲ୍ ଓ ହମାସ ଚରମପନ୍ଥୀଙ୍କ ମଧ୍ୟରେ ଚାଲିଥିବା ସଂଘର୍ଷ ଉଗ୍ରରୂପ ଧାରଣ କରିଛି। ଇସ୍ରାଏଲ୍ ଆକ୍ରମଣରେ ପାଲେଷ୍ଟାଇନ୍ର ୧୭ ଶିଶୁ ଓ ୭ ମହିଳାଙ୍କ ସମେତ ୮୩ ଜଣଙ୍କ ମୃତ୍ୟୁ ଘଟିଲାଣି। ଅନ୍ୟପକ୍ଷରେ ପାଲେଷ୍ଟାଇନ୍ ଆକ୍ରମଣରେ ଇସ୍ରାଏଲ୍ର ୭ ଜଣ ନିହତ ହେଲେଣି। ଏଥିସହ ୪୮୭ ଜଣ ଆହତ ହୋଇଥିବା ଗାଜାସ୍ଥିତ ହମାସ୍ ନିୟନ୍ତ୍ରଣାଧୀନ ସ୍ବାସ୍ଥ୍ୟ ମନ୍ତ୍ରଣାଳୟ ପକ୍ଷରୁ ଗୁରୁବାର ସୂଚନା ଦିଆଯାଇଛି। ଇସ୍ରାଏଲ୍ ସେନା ପକ୍ଷରୁ କୁହାଯାଇଛି ଯେ, ସୋମବାର ସନ୍ଧ୍ୟା ପରଠାରୁ ଗାଜା ଉପରେ ଆକାଶମାର୍ଗରୁ ୬୦୦ରୁ ଅଧିକ ଥର ରକେଟ ମାଡ଼ କରାଯାଇଛି। ଅନ୍ୟପକ୍ଷେ ହମାସ୍ ଚରମପନ୍ଥୀମାନେ ଇସ୍ରାଏଲ୍କୁ ଟାର୍ଗେଟ କରି ୧,୬୦୦ ରକେଟ ଆକ୍ରମଣ କରିଛନ୍ତି। ଫଳରେ ଗାଜା ଷ୍ଟ୍ରିପ୍ ଏକ ଯୁଦ୍ଧଭୂଇଁରେ ପରିଣତ ହୋଇଛି। ଉଭୟ ପକ୍ଷଙ୍କ ଆକ୍ରମଣ ଓ ପ୍ରତିଆକ୍ରମଣ ଏହି ସଂଘର୍ଷକୁ ଏକ ସମ୍ପୂର୍ଣ୍ଣ ଯୁଦ୍ଧ ଆଡ଼କୁ ଟାଣିନେଇଛି ବୋଲି ଜାତିସଂଘ ପକ୍ଷରୁ ସତର୍କ କରାଯାଇଛି। ଉଭୟ ପକ୍ଷଙ୍କୁ ନେଇ ଇଜିପ୍ଟ ପକ୍ଷରୁ ଶାନ୍ତି ପାଇଁ ଆଲୋଚନା ଆରମ୍ଭ ହୋଇଥିଲେ ହେଁ ତାହାର ସୁଫଳ ମିଳିନାହିଁ। ପୂର୍ବରୁ ଇସ୍ରାଏଲ୍ ଓ ଗାଜାର ହମାସ୍ ଶାସକଙ୍କ ମଧ୍ୟରେ ହୋଇଥିବା ସଂଘର୍ଷ ଓ ୨୦୧୪ର ଯୁଦ୍ଧ ପାଲେଷ୍ଟାଇନ୍ ଭୂଖଣ୍ଡ ଏବଂ ଇସ୍ରାଏଲ୍ ସୀମାନ୍ତରେ ସୀମିତ ଥିଲା। କିନ୍ତୁ ଏଥର ଯୁଦ୍ଧ ଅଧିକ ବ୍ୟାପକ ହେବାରେ ଲାଗିଛି। ଜାତିସଂଘରେ ମଧ୍ୟପ୍ରାଚ୍ୟ ପାଇଁ ସ୍ବତନ୍ତ୍ର କୋ-ଅର୍ଡିନେଟର ଥିବା ଟୋର ଓ୍ବେନେସ୍ଲାଣ୍ଡ ଦୁଇ ପକ୍ଷଙ୍କୁ ଉତ୍ତେଜନା ହ୍ରାସ ପାଇଁ ଆହ୍ବାନ ଦେଇଛନ୍ତି। ଗୁଳିବର୍ଷା ଓ ରକେଟ ମାଡ଼ ତୁରନ୍ତ ବନ୍ଦ କର। ଗାଜାରେ ବିଧ୍ୱଂସ୍ତକାରୀ ଯୁଦ୍ଧର ମୂଲ୍ୟ ସାଧାରଣ ଲୋକଙ୍କୁ ଦେବାକୁ ପଡ଼ୁଛି। ଶାନ୍ତି ପାଇଁ ଜାତିସଂଘ ଉଦ୍ୟମ ଚଳାଇଛି ବୋଲି ଓ୍ବେନେସ୍ଲାଣ୍ଡ ଟୁଇଟ୍ କରିଛନ୍ତି।
