ଚେନ୍ନାଇ,୩।୧ : ତାମିଲନାଡୁର ନିଲମ୍ବିତ ଭାଜପା ନେତ୍ରୀ ତଥା ଅଭିନେତ୍ରୀ ଗାୟତ୍ରୀ ରଘୁରାମ ମଙ୍ଗଳବାର ଦଳ ଛାଡିବାକୁ ଘୋଷଣା କରିଛନ୍ତି। ଏହି ସମୟରେ ସେ ତାମିଲନାଡୁ ଭାଜପା ବିରୋଧରେ ଅନେକ ଗମ୍ଭୀର ଅଭିଯୋଗ ମଧ୍ୟ କରିଥିଲେ। ଦଳରୁ ଇସ୍ତଫା ଘୋଷଣା କରି ସେ କହିଛନ୍ତି ଯେ ଭାଜପାର ରାଜ୍ୟ ୟୁନିଟରେ ପ୍ରକୃତ କର୍ମୀଙ୍କ ବିଷୟରେ କେହି ଚିନ୍ତା କରନ୍ତି ନାହିଁ। ଏଥିସହ ତାମିଲନାଡୁ ଭାଜପାରେ ମହିଳାମାନେ ସୁରକ୍ଷିତ ନୁହଁନ୍ତି।
ମିଳିଥିବା ସୂଚନା ଅନୁଯାୟୀ ଗାୟତ୍ରୀ ରଘୁରାମ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି, କେନ୍ଦ୍ର ସ୍ବରାଷ୍ଟ୍ରମନ୍ତ୍ରୀ ଅମିତ ଶାହା, ଦଳର ରାଷ୍ଟ୍ରୀୟ ଅଧ୍ୟକ୍ଷ ଜେପି ନଡ୍ଡା ଏବଂ ଜାତୀୟ ସାଧାରଣ ସମ୍ପାଦକ ବି ସନ୍ତୋଷଙ୍କୁ ଟ୍ୟାଗ କରି ଏକ ଟଚଇଟ ମାଧ୍ୟମରେ ଇସ୍ତଫା ଘୋଷଣା କରିଛନ୍ତି। ସେ ତାଙ୍କ ପୋଷ୍ଟରେ ଲେଖିଛନ୍ତି ଯେ ’ମୁଁ ତାମିଲନାଡୁ ଭାଜପାରୁ ଇସ୍ତଫା ଦେବାକୁ ନିଷ୍ପତ୍ତି ନେଇଛି କାରଣ ଏଠାରେ ମହିଳାମାନଙ୍କୁ କଥା ହେବାର ସୁଯୋଗ ଦିଆଯାଉ ନାହିଁ । ସେମାନଙ୍କୁ ସମାନ ଅଧିକାର ଏବଂ ସମ୍ମାନ ଦିଆଯାଉ ନାହିଁ। କେ.ଅନ୍ନାମଲାଇଙ୍କ ନେତୃତ୍ୱରେ ମହିଳାମାନେ ସୁରକ୍ଷିତ ନୁହଁନ୍ତି। ପ୍ରକୃତ କର୍ମୀମାନଙ୍କ ବିଷୟରେ କେହି ଚିନ୍ତା କରନ୍ତି ନାହିଁ। ପ୍ରକୃତ କର୍ମୀମାନଙ୍କୁ ଘଉଡ଼ାଇବା ଅନାମଲାଇଙ୍କର ଏକମାତ୍ର ଲକ୍ଷ୍ୟ।
ସେ ଅନ୍ୟ ଏକ ଟୁଇଟରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କୁ ମଧ୍ୟ ପ୍ରଶଂସା କରିଛନ୍ତି। ସେ ଲେଖିଛନ୍ତି ଯେ ମୋଦୀ ଜୀ ଆପଣ ସ୍ବତନ୍ତ୍ର, ଆପଣ ଜାତିର ପିତା, ଆପଣ ସର୍ବଦା ବିଶ୍ୱଗୁରୁ ଏବଂ ମୋ ଆଖିରେ ଜଣେ ମହାନ ନେତା । ଅମିତ ଶାହା ଜୀ, ଆପଣ ସବୁବେଳେ ମୋ ଆଖିରେ ଚାଣକ୍ୟ ହୋଇ ରହିଥିବେ।
ସୂଚନାଯୋଗ୍ୟ,ଗାୟତ୍ରୀ ରଘୁରାମ ଭାରତୀୟ ଜନତା ପାର୍ଟି ରାଜ୍ୟ ୟୁନିଟ ମୁଖ୍ୟ କେ. ଅନ୍ନାମଲାଇଙ୍କୁ ନିଜ ଇସ୍ତଫା ପାଇଁ ଦାୟୀ କରିଛନ୍ତି।
