ମୁମ୍ବାଇ,୧।୧୨: ଭାରତୀୟ କ୍ରିକେଟ୍ ଦଳର ମୁଖ୍ୟ ପ୍ରଶିକ୍ଷକ ଗୌତମ ଗମ୍ଭୀର ଏବଂ ଦୁଇ ବରିଷ୍ଠ ଖେଳାଳି ବିରାଟ କୋହଲି ଓ ରୋହିତ ଶର୍ମାଙ୍କ ମଧ୍ୟରେ ସମ୍ପର୍କରେ ତିକ୍ତତା ଦେଖାଦେଇଛି। ରିପୋର୍ଟ ଅନୁଯାୟୀ, ଗମ୍ଭୀର କୋଚ୍ ଦାୟିତ୍ୱ ନେବା ପରେ କୋହଲି ଓ ରୋହିତଙ୍କ ସହ ତାଙ୍କର ପୂର୍ବପରି ସୌହାର୍ଦ୍ଦ୍ୟପୂର୍ଣ୍ଣ ସମ୍ପର୍କ ଆଉ ନାହିଁ।
ଜାତୀୟ ଗଣମାଧ୍ୟମରେ ପ୍ରକାଶିତ ଏକ ରିପୋର୍ଟ ଅନୁଯାୟୀ, ଗମ୍ଭୀର, କୋହଲି ଏବଂ ରୋହିତଙ୍କ ମଧ୍ୟରେ ସମ୍ପର୍କ ଆଦୌ ଉତ୍ତମ ନାହିଁ ଏବଂ ଏହି ସମ୍ପର୍କ ଶୀତଳ ହେବାରେ ଲାଗିଛି। ଦକ୍ଷିଣ ଆଫ୍ରିକା ଦିନିକିଆ ସିରିଜ୍ ଆରମ୍ଭ ହେବା ପରେ କୋହଲି ଓ ଗମ୍ଭୀରଙ୍କ ମଧ୍ୟରେ ଆଲୋଚନା ମଧ୍ୟ ବହୁତ କମିଯାଇଛି।
ଖେଳାଳି ଓ କୋଚ୍ଙ୍କ ମଧ୍ୟରେ ଏଭଳି ଅସନ୍ତୁଳିତ ପରିସ୍ଥିତିକୁ ନେଇ ଭାରତୀୟ କ୍ରିକେଟ୍ ନିୟନ୍ତ୍ରଣ ବୋର୍ଡ ଅସନ୍ତୁଷ୍ଟ ଅଛି। ବିଶେଷକରି ସୋସିଆଲ ମିଡିଆରେ କୋହଲି ଓ ରୋହିତଙ୍କ ପ୍ରଶଂସକମାନେ ଗମ୍ଭୀରଙ୍କୁ ଯେଉଁଭଳି ଆକ୍ରମଣ କରୁଛନ୍ତି, ତାହା ବରିଷ୍ଠ ପରିଚାଳନାଙ୍କୁ ବିରକ୍ତ କରିଛି।
ଏହି ତିକ୍ତତାକୁ ଦୂର କରିବା ଏବଂ ଦୁଇ ବରିଷ୍ଠ ଖେଳାଳିଙ୍କ ଭବିଷ୍ୟତ ଉପରେ ଆଲୋଚନା କରିବା ପାଇଁ BCCI ଖୁବ୍ ଶୀଘ୍ର ଏକ ବୈଠକ ଡକାଇପାରେ। ଏହି ବୈଠକ ଦ୍ୱିତୀୟ କିମ୍ବା ତୃତୀୟ ଦିନିକିଆ ମ୍ୟାଚ୍ ସମୟରେ ରାୟପୁର କିମ୍ବା ବିଶାଖାପାଟଣାରେ ହୋଇପାରେ ବୋଲି ସୂଚନା ମିଳିଛି।
