ନବରଙ୍ଗପୁର,୩।୨(ବି.ପ୍ର.): ନବରଙ୍ଗପୁର ପୌର ସଂସ୍ଥାରେ କାର୍ଯ୍ୟରତ ସାନିଟାରୀ ଏକ୍ସପର୍ଟ ମନୋଜ ଦତ୍ତ ଆବର୍ଜନା ଉଠାଇବା ଠେଲାଗୁଡିକ କାବାଡିଆ ଦକାନରେ ବିକ୍ରି କରିବାକୁ ନେଇଥିଲେ। ଏହାର ଭିଡିଓ ଏବେ ଭାଇରାଲ ହେଉଛି। ମନୋଜ ଏବଂ ଭିଡିଓ କରୁଥିବା ବ୍ୟକ୍ତିଙ୍କ କଥାବାର୍ତ୍ତା ଏଥିରେ ରହିଛି। ପୌରସଂସ୍ଥା ନିର୍ବାହୀ ଅଧିକାରୀ, କାଉନ୍ସିଲ ଓ ପୌରାଧ୍ୟକ୍ଷଙ୍କ ଅଜାଣତରେ ବିକ୍ରି କରାଯାଉଛି। ସରକାରୀ ଜିନିଷ ବିକ୍ରି କରିବାକୁ ଆଣିଛନ୍ତି କିଛି ସମସ୍ୟା ହେବ ନାହିଁକି ବୋଲି ବ୍ୟକ୍ତି ଜଣଙ୍କ ପ୍ରଶ୍ନ କରିଛନ୍ତି। ସେହିଭଳି କିଛି ଅସୁବିଧା ହେବ ନାହିଁ ବୋଲି ମନୋଜ କହୁଛନ୍ତି। ଅଯଥା ଭିଡିଓ କରନ୍ତୁ ନାହିଁ ବୋଲି ସେ କହୁଥିବା ଉକ୍ତ ଭିଡିଓରେ ରହିଛି। ଭିଡିଓ ଭାଇରାଲ ହେବାପରେ ମନୋଜଙ୍କୁ ପଚାରିବାରୁ ପୁରୁଣାଗୁଡିକ ଥିଲା ବିକ୍ରି କରି ନୂଆ ଆଣିବା ପାଇଁ ଚେଷ୍ଟା କରାଯାଉଛି ବୋଲି କହିଛନ୍ତି। କାଉନ୍ସିଲରେ ତାହା ଅନୁମୋଦନ ହୋଇଛିକି ଓ ନିର୍ବାହୀ ଅଧିକାରୀ ଜାଣିଛନ୍ତିକି ବୋଲି ପ୍ରଶ୍ନ କରିବାରୁ ସେ କୌଣସି ଉତ୍ତର ଦେଲେ ନାହିଁ। ଆକ୍ସନ ପାଇଁ ଆହ୍ବାନ କରାଯାଇଥିଲା କି ବୋଲି ପଚାରିବାରି ଆକ୍ସନ ପାଇଁ ଆହ୍ବାନ ହୋଇ ନାହିଁ। ତେବେ ବିକ୍ରି ପାଇଁ କିଭଳି ନେଇଥିଲେ ବୋଲି ପଚାରିବାରୁ ସେ କଥା ଛାଡ଼ନ୍ତୁ ବୋଲି କହିଥିଲେ। ସହରର ୧୭ ୱାର୍ଡରେ ସଠିକ ଭାବେ ଆବର୍ଜନା ଉଠିନାହିଁ କର୍ମଚାରୀ ଜଣଙ୍କ ଆବର୍ଜନା ଉଡୁଥିବା ଠେଲାକୁ ବିକ୍ରି କରିବାପାଇଁ ମସୁଧା ଚଳାଇଛନ୍ତି। ଏକଥାକୁ ଜନସାଧାରଣ ସହଜେ ଗ୍ରହଣ କରି ପାରୁ ନାହାନ୍ତି। ପୌର ସଂସ୍ଥା ନିର୍ବାହୀ ଅଧିକାରୀ ପ୍ରାଣନାଥ ସେଠଙ୍କୁ ପଚାରିବାରୁ କାଉନ୍ସିଲରେ ମନୋଜ ଉପରେ ଏହାବ୍ୟତିତ ଅନେକ ଅଭିଯୋଗ ହୋଇଛି। ଜିଲାପରିଷଦ ମୁଖ୍ୟ ଉନ୍ନୟନ ଅଧିକାରୀଙ୍କୁ କାର୍ଯ୍ୟାନୁଷ୍ଠାନ ଗ୍ରହଣ ପାଇଁ ଜଣାଇ ଦିଆଯିବ ବୋଲି ସେ କହିଛନ୍ତି।
