ଗଞ୍ଜାମ,୧୭।୮(ଡି.ଏନ୍.ଏ.): ଗଞ୍ଜାମ ସହରରେ ବୁଲା ଗୋରୁଙ୍କ ପାଦୁର୍ଭାବ ଦିନକୁ ଦିନ ବଢ଼ିବାରେ ଲାଗିଛି। ବର୍ତ୍ତମାନ ଗୋରୁଙ୍କ କବଜାରେ ସହରର ମୁଖ୍ୟ ରାସ୍ତା। ଏମାନଙ୍କୁ ହଟାଇବା ପାଇଁ ବିଭିନ୍ନ ସଂଗଠନ ପକ୍ଷରୁ ବାରମ୍ବାର ଏନ୍ଏସି ପ୍ରଶାସନକୁ ଅଭିଯୋଗ କରିଆସୁଥିଲେ ମଧ୍ୟ କୌଣସି ପଦକ୍ଷେପ ଗ୍ରହଣ କରାଯାଉନାହିଁ। ସା ହେଲେ ବୁଲା ଗୋରୁମାନେ ସାନବଜାରଠାରୁ ବଡ଼ବଜାର ଓ ତ୍ରିବେଣୀ ମଠ ପର୍ଯ୍ୟନ୍ତ ମାଳ ମାଳ ହୋଇ ବୁଲୁଥିବାରୁ ଯାତାୟାତରେ ନାହିଁ ନ ଥିବା ସମସ୍ୟା ସୃଷ୍ଟି ହେଉଛି। ଏନେଇ ବିଭିନ୍ନ ସମୟରେ ଛୋଟ ବଡ଼ ଦୁର୍ଘଟଣା ମଧ୍ୟ ଘଟୁଛି। ତଥାପି ପ୍ରଶାସନର ଚେତା ପଶୁନି । କିଛି ଦିନ ତଳେ ଏନ୍ଏସି କାର୍ଯ୍ୟନିର୍ବାହୀ ଅଧିକାରୀ ଦାୟିତ୍ୱରେ ଥିବା ତହସିଲଦାର ଅରୁଣ କୁମାର ନାୟକ ସୁଇପେରଙ୍କ ଦ୍ୱାରା ସହର ମଧ୍ୟରୁ ବୁଲା ଗାଈଗୋରୁଙ୍କୁ ହଟାଯାଇ ଷ୍ଟାଡିୟମରେ ଭର୍ତ୍ତି କରାଯାଇଥିଲା। କିନ୍ତୁ ତା ପର ଦିନ ଗାଈ ମାଲିକମାନଙ୍କ ପ୍ରତି କାର୍ଯ୍ୟାନୁଷ୍ଠାନ ନ ନିଆଯିବାରୁ ପୂର୍ବଭଳି ଏବେ ସହରରେ ଶହ ଶହ ଗାଈଗୋରୁ ଅବାଧରେ ବୁଲୁଥିବା ଦେଖିବାକୁ ମିଳିଛି । ଯାହା ଫଳରେ ସ୍ଥାନୀୟ ଅଞ୍ଚଳବାସି ଅସୁବିଧାର ସମ୍ମୁଖୀନ ହେଉଛନ୍ତି । ବର୍ତ୍ତମାନ ଚାଷ ସମୟ ହୋଇଥିବା ବେଳେ ଉକ୍ତ ଗୋରୁ ଚାଷ ଜମିରେ ପଶି ଧାନ ନଷ୍ଟ କରୁଥିବା ପୁଇଁତୋଳା ଚାଷୀମାନେ ଅଭିଯୋଗ କରିଛନ୍ତି। ତେଣୁ ପ୍ରଶାସନ ଏ ଦିଗରେ ଦୃଷ୍ଟି ଦେଇ ଗାଈ ମାଲିକଙ୍କୁ ଚି଼ହ୍ନଟ କରି ଆବଶ୍ୟକ କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ ଦାବି ହୋଇଛି । ଏ ସମ୍ପର୍କରେ ତହସିଲଦାର ଅରୁଣ କୁମାର ନାୟକ କହିଛନ୍ତି ସାହି ସାହିରୁ ଅଳିଆ ଆବର୍ଜନା ଆଣୁଥିବା ଏନ୍ଏସି ଅଳିଆଆବର୍ଜନା ଗାଡିରେ ଗାଈମାନଙ୍କୁ ବାନ୍ଧିବା ପାଇଁ ପ୍ରଚାର କରାଯାଉଛି। ତଥାପି ଲୋକେ ସଚେତନ ନୁହଁନ୍ତି। ତେଣୁ ଖୁବ୍ଶୀଘ୍ର ପରବର୍ତ୍ତୀ ପଦକ୍ଷେପ ଗ୍ରହଣ କରାଯିବ ବୋଲି ସେ କହିଛନ୍ତି ।
