ବ୍ରହ୍ମପୁର ଅଫିସ,୪।୪: ଆଗାମୀ ସାଧାରଣ ନିର୍ବାଚନ ପାଇଁ ଏବେଠୁ ଶାସକ ଓ ବିରୋଧୀ ଦଳ ପକ୍ଷରୁ ପ୍ରାକ୍ ପ୍ରସ୍ତୁତି ଚାଲିଛି। ଦଳର ପ୍ରତିଷ୍ଠା ଦିବସ ଏବଂ ବିଜୁ ପଟ୍ଟନାୟକଙ୍କ ଜୟନ୍ତୀ ଦିବସରେ ବିଜେଡି ପକ୍ଷରୁ ଗଞ୍ଜାମ ଜିଲାର ୧୩ ନିର୍ବାଚନମଣ୍ଡଳୀରେ ବିଭିନ୍ନ କାର୍ଯ୍ୟକ୍ରମ ମାଧ୍ୟମରେ ଭୋଟ ରାଜନୀତି ଆରମ୍ଭ ହୋଇଛି। ମୁଖ୍ୟ ବିରୋଧୀ ଦଳ ଭାଜପାର ମଣ୍ଡଳ ଓ ବୁଥ୍ସ୍ତରୀୟ ସଶକ୍ତୀକରଣ ଅଭିଯାନକୁ ଜୋରଦାର କରାଯାଇଛି। ତେବେ ସର୍ବପୁରାତନ ଦଳ କଂଗ୍ରେସ ପଛରେ ପଡ଼ିଛି। ଅପରପକ୍ଷରେ ବିଜେଡିର କେତେକ ଜନପ୍ରତିନିଧି ଆଗାମୀ ନିର୍ବାଚନ ମଇଦାନକୁ ନ ଓହ୍ଲାଇ ସେମାନେ ପୁଅଙ୍କୁ ରାଜନୀତି ପାଇଁ ବାଟ ଛାଡ଼ିଦେବାର ବିଭିନ୍ନ ମହଲରେ ଚର୍ଚ୍ଚା ହେଉଛି। ଦିଗପହଣ୍ଡି ବିଧାୟକ ସୂର୍ଯ୍ୟ ନାରାୟଣ ପାତ୍ର ୧୯୯୦ରୁ ୨୦୧୯ ମଧ୍ୟରେ ହୋଇଥିବା ୭ ନିର୍ବାଚନରେ ୨ ଥର ଜନତା ଦଳରୁ ଏବଂ ୫ ଥର ବିଜେଡିରୁ ବିଧାନସଭାକୁ ଲଗାତର ନିର୍ବାଚିତ ହୋଇଥିଲେ। ଏକାଧିକ ଥର ମନ୍ତ୍ରୀ ହୋଇ ଗୁରୁତ୍ୱପୂର୍ଣ୍ଣ ବିଭାଗ ସମ୍ଭାଳିଥିଲେ। ଶେଷରେ ସାମ୍ବିଧାନିକ ପଦ ବାଚସ୍ପତି ହୋଇଥିଲେ। ଅସୁସ୍ଥତା ଯୋଗୁ ଗତ ବର୍ଷ ଜୁଲାଇରେ ଇସ୍ତଫା ଦେଇଥିଲେ। ସେ ଦୀର୍ଘଦିନରୁ ନିର୍ବାଚନମଣ୍ଡଳୀକୁ ଆସୁନାହାନ୍ତି। ବିଜେଡି ରାଜ୍ୟ କାର୍ଯ୍ୟକାରିଣୀ ସଦସ୍ୟ ଥିବା ପୁତ୍ର ବିପ୍ଳବ ପାତ୍ର ବିଧାନସଭା କ୍ଷେତ୍ରରେ ବୁଲୁଛନ୍ତି। ତେଣୁ ସୂର୍ଯ୍ୟଙ୍କ ପୁତ୍ର ଉତ୍ତରାଧିକାରୀ ହେବାର ଅନୁଗତ କର୍ମୀ ଚର୍ଚ୍ଚା କରୁଛନ୍ତି।
ଦିଗପହଣ୍ଡି ବିଜେଡି ରାଜନୀତି କ୍ରମଶଃ ରୋଚକ ହେବାରେ ଲାଗିଛି। ବିପ୍ଳବଙ୍କୁ ଚ୍ୟାଲେଞ୍ଜ କରି ପୂର୍ବତନ ବ୍ଲକ ଅଧ୍ୟକ୍ଷ ବିପିନ ପ୍ରଧାନ ମଧ୍ୟ ଦିଗପହଣ୍ଡି ନିର୍ବାଚନମଣ୍ଡଳୀରେ କର୍ମୀଙ୍କୁ ନେଇ ବିଭିନ୍ନ କାର୍ଯ୍ୟକ୍ରମ କରୁଛନ୍ତି। ଉଭୟ ବିପ୍ଳବ ଓ ବିପିନ ଆଗାମୀ ନିର୍ବାଚନରେ ବିଜେଡି ଟିକେଟ ପାଇବା ନିମନ୍ତେ କସରତ ଚଳାଇଛନ୍ତି। ବ୍ରହ୍ମପୁରର ଜଣେ ବରିଷ୍ଠ ନେତା ମଧ୍ୟ ଦିଗପହଣ୍ଡି କ୍ଷେତ୍ର ପାଇଁ ସଜବାଜ ହେଉଛନ୍ତି। ସେ ନିର୍ବାଚନମଣ୍ଡଳୀର ପ୍ରମୁଖ କର୍ମୀଙ୍କ ସହ ଯୋଗସୂତ୍ର ସ୍ଥାପନ ସହ ବେଳେବେଳେ ବିଭିନ୍ନ କାର୍ଯ୍ୟକ୍ରମରେ ଯୋଗ ଦେଉଛନ୍ତି।
ସେହିପରି ଚିକିଟି ବିଧାନସଭା ଆସନରୁ ୧୯୯୦ ନିର୍ବାଚନରେ ଥରେ ଜନତା ଦଳରୁ ଏବଂ ୨୦୦୦ରୁ ୨୦୧୯ ମଧ୍ୟରେ ଲଗାତର ୫ ଥର ବିଜେଡିରୁ ବିଧାୟିକା ହୋଇଥିବା ଉଷା ଦେବୀ ଏବେ ନଗର ଉନ୍ନୟନ ମନ୍ତ୍ରୀ ଅଛନ୍ତି। ପୂର୍ବରୁ ମଧ୍ୟ ସେ ଦୁଇଥର କ୍ୟାବିନେଟ୍ ମନ୍ତ୍ରୀ ହୋଇଥିଲେ। ଉଷା ଦେବୀ ମଧ୍ୟ ଆଗାମୀ ନିର୍ବାଚନ ନ ଲଢ଼ିବା ସମ୍ପର୍କରେ ଅନେକେ ଚର୍ଚ୍ଚା ହେଉଛି। ତାଙ୍କ ପୁତ୍ର ଚିନ୍ମୟାନନ୍ଦ ସ୍ବରୂପ ଦେବ ଦୀର୍ଘଦିନରୁ ରାଜନୀତି କରୁଛନ୍ତି। ସ୍ବରୂପ ମୁଖ୍ୟତଃ ପାତ୍ରପୁର ବ୍ଲକରେ ଅଧିକ ସମୟ ଦେଉଛନ୍ତି। ସେହି ବ୍ଲକ ଭାଜପା ଦଖଲକୁ ଯାଇଥିବାରୁ ଏହାକୁ ହାତେଇବାକୁ ପ୍ରୟାସ କରୁଛନ୍ତି। ଉଷା ପୁତ୍ରଙ୍କୁ ପ୍ରୋଜେକ୍ଟ କରୁଥିବା ଚର୍ଚ୍ଚା ହେଉଛି। ଆସିକା ବିଧାୟିକା ମଞ୍ଜୁଳା ସ୍ବାଇଁଙ୍କ ପୁତ୍ର ନଚିକେତା ସ୍ବାଇଁ ମଧ୍ୟ ଆଗାମୀ ନିର୍ବାଚନରେ ବିଜେଡିରୁ ପ୍ରାର୍ଥୀ ହୋଇପାରନ୍ତି ବୋଲି ରାଜନୀତି ମହଲରେ ମତ ପ୍ରକାଶ ପାଇଛି। ସେ ଏବେ ଯୁବ ବିଜେଡି ସଙ୍ଗଠନରେ ସକ୍ରିୟ ଅଛନ୍ତି ଏବଂ ଜୋନ୍ ସଭାପତି ଦାୟିତ୍ୱ ତୁଲାଉଛନ୍ତି। ଉପରୋକ୍ତ ୩ ନିର୍ବାଚନମଣ୍ଡଳୀରେ ବିଧାୟିକା ଓ ବିଧାୟକଙ୍କ ପୁତ୍ରମାନେ ରାଜନୀତିରେ ଅଧିକ ସକ୍ରିୟ ହୋଇଛନ୍ତି। ତେବେ ବିଜେଡି ମୁଖିଆ କ’ଣ ନିଷ୍ପତ୍ତି ନେବେ ସେନେଇ ଦଳର କର୍ମୀ ଅପେକ୍ଷା କରିଛନ୍ତି।
