କେନ୍ଦ୍ରାପଡ଼ା,୨୧ା୪(ଜଗନ୍ନାଥ ଧଳ)କେନ୍ଦ୍ରାପଡ଼ା ବିଧାନସଭା ଆସନରେ ପୁଣିଥରେ ଗଣେଶ୍ୱର ବେହେରା ଏବଂ ଡ.ସିପ୍ରା ମଲ୍ଲିକଙ୍କ ମଧ୍ୟରେ ଲଢ଼େଇ ଦେଖିବାକୁ ମିଳିବ। ଶନିବାର ବିଧାୟକ ଶଶିଭୂଷଣ ବେହେରାଙ୍କ ବଦଳରେ ଗଣେଶ୍ୱରଙ୍କୁ ବିଜେଡି ପ୍ରାର୍ଥୀ କରିଥିବାବେଳେ କଂଗ୍ରେସ ଏହି ଆସନ ପାଇଁ ସିପ୍ରାଙ୍କୁ ଚୟନ କରିଛି। ଏଠାରେ ଗତ ୩ ନିର୍ବାଚନରେ ଭାଜପା ତୃତୀୟ ସ୍ଥାନରେ ରହିଥିବାବେଳେ ଦଳ ଚଳିତ ନିର୍ବାଚନ ପାଇଁ ଏଯାଏ ପ୍ରାର୍ଥୀ ଘୋଷଣା କରିନାହିଁ।
୨୦୦୯ରେ କେନ୍ଦ୍ରାପଡ଼ା ଆସନକୁ ଅନୁସୂଚିତ ଜାତି ପାଇଁ ସଂରକ୍ଷିତ ରଖାଯାଇଥିଲା। ସେହିବର୍ଷ ହୋଇଥିବା ନିର୍ବାଚନରେ ସିପ୍ରା ଓ ଗଣେଶ୍ୱର ବିଧାୟକ ପ୍ରାର୍ଥୀ ଭାବେ ମୁହଁାମୁହିଁ ହୋଇଥିଲେ। ସେତେବେଳେ ସିପ୍ରା ବିଜେଡିରୁ ଏବଂ ଗଣେଶ୍ୱର କଂଗ୍ରେସରୁ ପ୍ରାର୍ଥୀ ହୋଇଥିଲେ। ଇତିମଧ୍ୟରେ ଉଭୟଙ୍କ ଦଳ ବଦଳ ହୋଇଛି। ୧୫ ବର୍ଷର ବ୍ୟବଧାନ ପରେ ଉଭୟଙ୍କ ମଧ୍ୟରେ ଲଢ଼େଇ ଏକ ରୋଚକ ସ୍ଥିତି ସୃଷ୍ଟି କରିବ ବୋଲି ଆଲୋଚନା ହେଉଛି।
୨୦୦୯ ନିର୍ବାଚନରେ ୧,୧୮,୬୭୮ ମତଦାତାଙ୍କ ମଧ୍ୟରୁ ୬୨,୪୩୬ଜଣଙ୍କ ଭୋଟ ସିପ୍ରାଙ୍କୁ ମିଳିବା ପରେ ସେ ବିଜୟୀ ହୋଇଥିଲେ। ଦ୍ୱିତୀୟ ସ୍ଥାନରେ ଥିବା ଗଣେଶ୍ୱର ୪୬,୫୦୫ ଭୋଟ ପାଇଥିଲେ। ଭାଜପା ପ୍ରାର୍ଥୀ ବିଜୟ କୁମାର ମଲ୍ଲିକ ୬,୮୬୧ ଭୋଟ ପାଇଥିଲେ। ଏହି ନିର୍ବାଚନ ପରଠାରୁ ସିପ୍ରା ମୁକାବିଲା କରିବା ପାଇଁ ଆଉ ସୁଯୋଗ ପାଇ ନ ଥିଲେ। ଅପରପକ୍ଷେ ଏହି ନିର୍ବାଚନମଣ୍ଡଳୀରେ ଗଣେଶ୍ୱର ଏକାଧିକ ଥର ପ୍ରତିଦ୍ୱନ୍ଦ୍ୱିତାକୁ ଓହ୍ଲାଇ ଭାଗ୍ୟ ପରୀକ୍ଷା କରିଛନ୍ତି। ୨୦୦୯ରେ ତାଙ୍କୁ ୩୯.୧୯ ପ୍ରତିଶତ ଜନସମର୍ଥନ ମିଳିଥିବାବେଳେ ୨୦୧୪ରେ ୪୩.୧ ପ୍ରତିଶତ ଭୋଟପାଇଥିଲେ। ସେହିପରି ୨୦୧୯ରେ ବିଜେଡି ପ୍ରାର୍ଥୀ ତଥା ପୂର୍ବତନ ଅର୍ଥମନ୍ତ୍ରୀ ଶଶିଭୂଷଣ ବେହେରାଙ୍କଠାରୁ ସେ ମାତ୍ର ୬,୫୮୫ ଖଣ୍ଡ ଭୋଟରେ ପରାଜିତ ହୋଇଥିଲେ। ଗଣେଶ୍ୱର କେନ୍ଦ୍ରାପଡ଼ା ପୌରାଞ୍ଚଳରୁ ଶଶିଭୂଷଣଙ୍କଠାରୁ ଅଧିକ ଭୋଟ ପାଇଥିଲେ। ଏହି ସଂରକ୍ଷିତ ଆସନରେ ଭୋଟରଙ୍କ ସଂଖ୍ୟା ୨,୨୮,୫୯୬ରେ ପହଞ୍ଚତ୍ଛି। ଦଳବଦଳ କରି ୨ ପ୍ରାର୍ଥୀ ମୁହଁାମୁହିଁ ହେଉଥିବା ବେଳେ ଦଳୀୟ ଅସନ୍ତୋଷକୁ ନେଇ ଗଣେଶ୍ୱର ଅଧିକ ଚିନ୍ତାରେ ଅଛନ୍ତି। ଦୀର୍ଘବର୍ଷ ଧରି ବିଜେଡିରେ ରହି କାର୍ଯ୍ୟ କରୁଥିବା ଆଶାୟୀଙ୍କ ଆଶା ଗଣେଶ୍ୱର ଆସିବା ପରେ ମଉଳିଯାଇଛି। ଏଥିପାଇଁ ଗତ ୬ ଓ ୭ ତାରିଖରେ ଆଶାୟୀ ପ୍ରାର୍ଥୀମାନେ ଖୋଲାଖୋଲି ଭାବେ ଗଣେଶ୍ୱରଙ୍କ ପ୍ରାର୍ଥତ୍ତ୍ୱ ବିରୋଧରେ ସଭାପତି ନବୀନ ପଟ୍ଟନାୟକଙ୍କ ଦୃଷ୍ଟି ଆକର୍ଷଣ କରିଥିଲେ। ଏପରି କି ଭୁବନେଶ୍ୱର ଶଙ୍ଖଭବନ ଆଗରେ ଦଳୀୟ ସମର୍ଥକଙ୍କ ସହ ସିପ୍ରା ବିଧାୟକ ପ୍ରାର୍ଥୀ ହେବା ପାଇଁ ଦାବି କରିଥିଲେ। ଏନେଇ କୌଣସି ପ୍ରତିକ୍ରିୟା ନ ମିଳିବାରୁ ସେ ବିଜେଡି ଛାଡ଼ି କଂଗ୍ରେସରେ ଯୋଗଦେଇଥିଲେ। କଂଗ୍ରେସ ତାଙ୍କୁ ଶନିବାର ଏହି ଆସନରୁ ପ୍ରାର୍ଥୀ କରିବା ପରେ ସ୍ଥିତି ରୋଚକ ହେବ ବୋଲି କୁହାଯାଉଛି।
