ଭଞ୍ଜନଗର,୧୪/୧୧(ବାବୁଲା ପ୍ରଧାନ)-ଗଞ୍ଜାମ ଜିଲା ଭଞ୍ଜନଗର ଘୁମୁସର ଉତ୍ତର ବନଖଣ୍ଡ ତାରସିଂ ରେଞ୍ଜରେ ଶୁକ୍ରବାର ଗଜସାଥି ତାଲିମ ଶିବିର ଜିନିଷ ଅନୁଷ୍ଟିତ ହୋଇଥିଲା। ଏଥିରେ ଭଞ୍ଜନଗର ବିଧାୟକ ପ୍ରଦ୍ୟୁମ୍ନ କୁମାର ନାୟକ ମୁଖ୍ୟ ଅତିଥି ଭାବେ ଯୋଗଦେଇ ହାତୀ ସୁରକ୍ଷାରେ ଗଜସାଥି ଏବଂ ସାଧାରଣଜନତାଙ୍କ ଭୂମିକା ଗୁରୁତ୍ୱପୂର୍ଣ୍ଣ ବୋଲି କହିଥିଲେ। ତେଣୁ ଗଜ ସାଥି ସୁରକ୍ଷାରେ ବିଭାଗକୁ ସହଯୋଗ କରିବା ପାଇଁ ବିଧାୟକ ଉପସ୍ଥିତ ଗଜସାଥିଙ୍କୁ ଆହ୍ବାନ କରିଥିଲେ। ଡିଏଫଓ ହିମାଂଶୁ ଶେଖର ମହାନ୍ତି, ଏ ସି ଏଫ ବିମଳ ପ୍ରଧାନ, ମୁଜାଗଡ଼ ରେଞ୍ଜର ବିମ୍ବାଧର ସାହୁ, ତାରସିଂ ରେଞ୍ଜର ପ୍ରଶାନ୍ତ ବେହେରା, ଗାଲେରୀ ରେଞ୍ଜର ଜ୍ଞାନେନ୍ଦ୍ର ଲିମା, ଜଗନ୍ନାଥପ୍ରସାଦ ରେଞ୍ଜର ସୁଜାତା ପଣ୍ଡା, ଜଗନ୍ନାଥପ୍ରସାଦ ବ୍ଲକ ଉପାଧ୍ୟକ୍ଷ ନୀଳାଚଳ ଖିଲାର ପ୍ରମୁଖ ଯୋଗୋଦେଇ ନିଜର ବକ୍ତବ୍ୟ ରଖିଥିଲେ।
ଶିବିରରେ ଗଜସାଥିଙ୍କ ଦାୟିତ୍ବ, ବିଭାଗ ମଧ୍ୟରେ ସମନୟ ରକ୍ଷାକରି ସୂଚନା ଦେବା, ବିଦ୍ୟୁତ୍ ହୁକିଂ ଉପରେ ନଜର ରଖିବା, ଚାଷୀଙ୍କ ଫସଲ କ୍ଷୟକ୍ଷତି ହେଲେ ତାଙ୍କୁ ସହଯୋଗ କରିବେ, ବନ୍ୟପ୍ରାଣୀ କିଭଳି ସୁରକ୍ଷିତ ରହିବେ ସେନେଇ ଗ୍ରାମବାସୀଙ୍କୁ ସଚେତନ କରାଇବେ ସେଉପରେ ତାଲିମ ଦିଆଯାଇଥିଲା। ଏହି ବନଖଣ୍ଡରେ ୨୫୦ ଜଣ ଗଜସାଥି ଅଛନ୍ତି। ସେମାନଙ୍କୁ ଧାନ ଫସଲ ସମୟରେ ବର୍ଷକୁ ୫ ମାସ ରଖାଯାଉଛି। ଏନେଇ ସେମାନଙ୍କୁ ମାସିକ ଏକ ହଜାର ଟଙ୍କା ପ୍ରୋତ୍ସାହନ ରାଶି ପ୍ରଦାନ କରାଯାଉଛି। ଆଜି ସନ୍ଧ୍ୟା ସୁଦ୍ଧା ଏହି ବନଖଣ୍ଡରେ ୭୦ଟି ହାତୀ ଥିବାବେଳେ ଦକ୍ଷିଣ ଘୁମୁସର ବନଖଣ୍ଡରେ ୬ ଟି ହାତୀ ଥିବା ଜଣାପଡିଛି । ଏହି ଅବସରରେ ଗଜସଥିଙ୍କୁ ସେମାନଙ୍କ ଉପକରଣ ପ୍ରଦାନ କରାଯାଇଥିଲା।
Dharitri – Odisha’s No.1 Odia Daily
