ପାରଳାଖେମୁଣ୍ଡି,୮।୮(ଡି.ଏନ.ଏ.): ଗଜପତି ଜିଲାର ପାରଳାଖେମୁଣ୍ଡିଠାରେ ଏକ ନିଆରା ଘଟଣା ଦେଖିବାକୁ ମିଳିଛି। ପୋଷା କୁକୁର ମୃତ୍ୟୁରେ ପରିବାରର ଜଣେ ସଦସ୍ୟଙ୍କୁ ହରାଇବା ଭଳି ତା’ ମାଲିକ ଶୋକ ପ୍ରକାଶ କରିବା ସହ ବାଜା ବଜାଇ ସ୍ବତନ୍ତ୍ର ଢଙ୍ଗରେ ଅନ୍ତିମ ବିଦାୟ ଦେଇଛନ୍ତି।
ଗଜପତି ଜିଲା ସଦର ମହକୁମା ପାରଳାଖେମୁଣ୍ଡିର ଆନ୍ଧ୍ର ବ୍ୟାଙ୍କ ନିକଟରେ ରହୁଥିବା ଟୁନୁ ଗୌଡ଼ ନାମକ ଜଣେ ବ୍ୟକ୍ତିଙ୍କ ପୋଷା କୁକୁର ଅଞ୍ଜଳିର ମୃତ୍ୟୁ ଘଟିଥିଲା। କୁକୁରର ମୃତ୍ୟୁରେ ଟୁନୁଙ୍କ ପରିବାର ଶୋକରେ ଭାଙ୍ଗିପଡିଥିଲେ। କୁକୁରର ଅନ୍ତିମ ଯାତ୍ରା ପାଇଁ ଫୁଲରେ ସୁସଜିତ ଏକ ଗାଡିର ବନ୍ଦୋବସ୍ତ କରାଯାଇଥିଲା। ଗାଡିରେ କୁକୁରର ମୃତଦେହ ରଖାଯିବା ସହ ବାଜା ବଜାଇ ସହର ପରିକ୍ରମା କରାଯାଇଥିଲା। ପରେ ମୃତଦେହକୁ ଶ୍ମଶାନ ଘାଟ ନିଆଯାଇଥିଲା। ସେଠାରେ ଅଞ୍ଜଳିର ଅନ୍ତିମ ସଂସ୍କାର କରାଯାଇଥିଲା। ଟୁନୁଙ୍କ ପଶୁଙ୍କ ପ୍ରତି ଭଲପାଇବା ଏବେ ସ୍ଥାନୀୟ ଅଞ୍ଚଳରେ ଚର୍ଚ୍ଚାର ବିଷୟ ପାଲଟିଛି।
