ଟୋକିଓ: ଜାପାନରେ ଏକ ବୈପ୍ଳବିକ ଘଟଣା ସାମ୍ନାକୁ ଆସିଛି, ଯାହା ସମଗ୍ର ବିଶ୍ୱରେ ମହିଳାମାନଙ୍କ ପ୍ରେରଣାଦାୟୀ ହୋଇପାରିଛି। ଜାପାନ ଏୟାରଲାଇନ୍ସର ମୁଖ୍ୟ କାର୍ଯ୍ୟନିର୍ବାହୀ ଅଧିକାରୀ (ସିଇଓ) ଭାବରେ ମିସୁକୋ ଟୋଟୋରି ନିଯୁକ୍ତ ହୋଇଛନ୍ତି। ପ୍ରଥମ ମହିଳା ଭାବେ ଟୋଟୋରି ଏହି ଦାୟିତ୍ୱ ଗ୍ରହଣ କରିଛନ୍ତି। ଜାପାନର ଶୀର୍ଷ କମ୍ପାନୀଗୁଡ଼ିକ ମଧ୍ୟରୁ ୧ ପ୍ରତିଶତରୁ କମ୍ କମ୍ପାନୀ ମହିଳାଙ୍କ ନେତୃତ୍ୱରେ ଚାଲିଥିବା ବେଳେ ଟୋଟୋରିଙ୍କ ନିଯୁକ୍ତି ସହ ଏହି ତାଲିକାରେ ଏବେ ଜାପାନ ଏୟାରଲାଇନ୍ସ ଯୋଡ଼ି ହୋଇଛି। ଜାପାନ ଏୟାରଲାଇନ୍ସର ଏହି ବଡ ଘୋଷଣା ମହିଳା ସଶକ୍ତୀକରଣ ପାଇଁ ଏକ ମାଇଲଖୁଣ୍ଟ ହୋଇଥିବା ବିବେଚନା କରାଯାଉଛି। ଜଣେ ଫ୍ଲାଇଟ୍ ଆଟେଣ୍ଡାଣ୍ଟ ଭାବେ ନିଜ କ୍ୟାରିୟର ଆରମ୍ଭ କରିଥିବା ଟୋଟୋରି ଜାପାନ ଏୟାରଲାଇନ୍ସର ସିଇଓ ଭାବେ ନିଜ କାର୍ଯ୍ୟଭାର ଗ୍ରହଣ କରିବାକୁ ନେଇ ଚାରିଆଡ଼େ ବେଶ୍ ଚର୍ଚ୍ଚା ହେଉଛି।
ଅନୁଯାୟୀ, ମିସୁକୋ ଟୋଟୋରି ୧୯୮୫ ମସିହାରେ ବିମାନ ସେବାରେ ଜଣେ ସାଧାରଣ ଆଟେଣ୍ଡାଣ୍ଟ ଭାବେ ନିଜ କ୍ୟାରିୟର ଆରମ୍ଭ କରିଥିଲେ। ତିନି ଦଶନ୍ଧି ଧରି ସେ ନିଜ କାର୍ଯ୍ୟକୁ ନିଷ୍ଠାର ସହ କରିବା ପରେ ୨୦୧୫ରେ ସେ ବରିଷ୍ଠ କ୍ୟାବିନ କ୍ରିଉ ସଦସ୍ୟ ଭାବେ ନିଯୁକ୍ତ ହୋଇଥିଲେ। ଏବେ ତାଙ୍କୁ ଜାପାନ ଏୟାରଲାଇନ୍ସର ସଭାପତି ତଥା ସିଇଓ ଭାବେ ନିଯୁକ୍ତ କରାଯାଇଛି। ତେବେ ଜାପାନ ଏୟାରଲାଇନ୍ସର ପୂର୍ବ ସିଇଓମାନଙ୍କଠାରୁ ଟୋଟୋରିଙ୍କ ପୃଷ୍ଠଭୂମି ସମ୍ପୂର୍ଣ୍ଣ ଭିନ୍ନ ଥିବା ଜଣାପଡ଼ିଛି। ଏହି ପଦବୀରେ ଅବସ୍ଥାପିତ ଶେଷ ୧୦ ଜଣ ବ୍ୟକ୍ତିଙ୍କ ମଧ୍ୟରୁ ୭ ଜଣ ଜାପାନର ଶୀର୍ଷ ବିଶ୍ୱବିଦ୍ୟାଳୟରୁ ଡିଗ୍ରୀ ହାସଲ କରିଛନ୍ତି। ଅନ୍ୟପକ୍ଷରେ ଟୋଟୋରି, ଅପେକ୍ଷାକୃତ କମ୍ ସମ୍ମାନଜନକ ନାଗାସାକିର କ୍ୱାସୁଇ ମହିଳା ଜୁନିୟର କଲେଜରୁ ସ୍ନାତକ ଡିଗ୍ରୀ ହାସଲ କରିଛନ୍ତି। ଟୋଟୋରିଙ୍କୁ ସିଇଓ କରିବା ପଛରେ ଜାପାନ ଏୟାରଲାଇନ୍ସ ପକ୍ଷରୁ ଅନେକ କାରଣ ଦର୍ଶାଯାଇଛି। ନିଜ କ୍ୟାରିୟରରେ ସୁରକ୍ଷିତ ଉଡ଼ାଣ କାର୍ଯ୍ୟ ଓ ପରିଚାଳନା, ବିମାନ ସେବାରେ ତାଙ୍କର ଅଭିଜ୍ଞତା ଏବଂ କୋଭିଡ ମହାମାରୀ ସମୟରେ ନିରାପଦ କାର୍ଯ୍ୟ ପରିଚାଳନା କରିବାରେ ଟୋଟୋରିଙ୍କ ଅବଦାନକୁ ଦୃଷ୍ଟିରେ ରଖି ଏହି ନିଷ୍ପତ୍ତି ନିଆଯାଇଥିବା ଜାପାନ ଏୟାରଲାଇନ୍ସ ପକ୍ଷରୁ କୁହାଯାଇଛି।
ଏହି ଅବସରରେ ୫୯ ବର୍ଷିୟା ଟୋଟୋରି କହିଛନ୍ତି, ଜାପାନ ଏବେ ମହିଳା ପରିଚାଳକଙ୍କ ସଂଖ୍ୟା ବୃଦ୍ଧି କରିବାର ପ୍ରାରମ୍ଭିକ ଲକ୍ଷ୍ୟ ପୂରଣ କରିବାକୁ ଚେଷ୍ଟା କରୁଛି। ଜାପାନରେ ଏବେ ମହିଳାମାନେ ନିଜକୁ ସକ୍ରିୟ ରଖିବାକୁ ଚାହଁୁଥିବା ଟୋଟୋରି କହିଛନ୍ତି। ଭବିଷ୍ୟତରେ ଏଠାରେ ମହିଳାମାନଙ୍କର ଅଧିକ ପ୍ରଗତି ହୋଇପାରିବ ବୋଲି ସେ ଦୃଢ଼ୋକ୍ତି ପ୍ରକାଶ କରିଛନ୍ତି।
